1639

 

1. Adr: Svanto Baner – Aut: Sveno Magni Hagelstenius (Disputatio philosophica de virtute heroica; quam, /.../ in Regia Academia Gustaviana, quae Dorpati /.../ est sub praesidio /.../ Michaelis Savonii, /.../ pro magisterii philosophici privilegiis et immunitatibus consequendis, publicae disquisitioni et censurae, ad diem 18. Octob. /.../ submittit Sueno Magni Hagelsten. – Dorpati Livonorum, 1639: Typ. acad.) (cf. 21)                                                                                    SKB, [Tartu UB]

DEDICATIO

ILLUSTRI ET GENEROSISSIMO

DOMINO

DN. SVANTONI  BANER/

Haereditario de Wynääss/L. B. de Tärnöö et

Diurstholm /  Domino de Runnenburg et Smilten etc.

Domino ac Nutricio suo gratiosissimo.

 

                        Inclyte Mecoenas, Generosi pectoris Heros,

                                    Banerio Illustri stemmate nate Baro,

                        Ardua Celsorum, majorum facta tuorum,

                                    Illustri Annales dexteritate sonant.

            5          Mens eadem cunctis Patriae inservire saluti,

                                    Virtus celsa sago; celsaque fama toga.

                        Te simul invitat Virtus, ut ad arduo tendas,

                                    Et genus exaeques, exsuperesque tuum.

                        Efflorescit Honos Tuus, et Tua Gloria surgit,

            10                    Dum Marti atque Arti dedita corda geris.

                        Gratulor; inque animi signum gratantis, Ovantis,

                                    Offero demissa parvula dona manu.

                        Parvula dona fero, sibi quae Nutritius Heros,

                                    Deberi, solita pro pietate, docet.

            15        Esto[1] aliqualis enim venturi fructus Honoris,

                                    Serviet ille Deo, serviet ille tibi.

                        Inde Honor inde tuum Nomenque Laudesque manebunt

                                    Et mea musa tuis serviet usque viis.

Quod humiliter et submisse vovebat

Vestrae Jllustris Generositatis humilis Alumnus

 

2. Adr: Ericus Haquini Bobergius – Aut: Laurentius Ludenius (Disputatio philosophica, de animae humanae origine, quam, /.../ in Regia Academia Gustaviana, quae Dorpati est die 5. Octobris anno 1639. /.../ publicae censurae submittit sub praesidio /.../ Petri A. Schomeri, /.../ Ericus Haquini Bobergius /.../ author et respondens. – Dorpati Livonorum, 1639: Typ. acad.)                  SKB, [Tartu UB]

GRATULATIO

Doctissimo et Humanissimo

RESPONDENTI.

ERICUS HAQVINI BOBERGIUS:

Per Anagram.

JUS URGE: ABHINC QVIES ORBI.

 

                        Jvs Animarum URGE: Christo Duce et Auspice, nostro

                                    SVRGET ABHINC ORBI deliciosa QVIES.

Quod ap.

Laurentius Ludenius, PH.

et J. U. D. ac Profes.

 

3. Adr: Ericus Haquini Bobergius – Aut: Salomon Matthiae (cf. 2)         SKB, [Tartu UB]

GRATULATIO

Hvmana ingentem mentis scrutaris abyssum,

Miraris Genij liberioris opes:

Felix, qui te nosse cupis: bene perge Supremum

Nosse Deum, post te messe: Beatus eris.

M. Salomon Matthiae

Ebr. Ling. P.P.

 

4. Adr: Ericus Haquini Bobergius – Aut: Seguardus Olai Wallander (cf. 2)

SKB, [Tartu UB]

GRATULATIO

Eusebiae et Sophiae decus immortale, BOBERGI,

Aonij et nostri gloria magna chori;

Ingenium magnum magnus tibi finxit Apollo,

Qvod propria majus sedulitate facis:

5          Qvippe tuis Thesibus, valido qvas Marte tueris:

Vnde sit humana mentis origo, doces.

                                    Consveto nisu, Christo Duce et Auspice Christo,

                                                  Insta Pierijs invigilare Choris;

                        10        Et tibi pulcra canent sacrae praeconia Musae,

                                                Atque tuum lauru cinget Apollo caput.

Debiti honoris gratia adscripsit

SEGVARDVS OLAI WALLANDER

W.-Gothia Svecus.

 

5. Adr: Ericus Haquini Bobergius – Aut: Petrus Jonae Bock (cf. 2)        SKB, [Tartu UB]

GRATULATIO

Admireris opus nascentis originis: ipso

Est anima humana e traduce, dante Deo.

Haec tibi ne dubiam moveat sententia mentem,

Consulo BOBERGi sedulitate Theses.

Qvod gratulaturus apponebat

PETRUS JONAE Bock

Wermelandia Svecus.

 

6. Adr: Johannes Bringius – Aut: Johannes Mag. Silerus (Disputatio philosophica de liberalitate; quam, /.../ in Regia Academia Gustaviana, quae Dorpati est sub praesidio /.../ Michaelis Savonii, /.../ pro magisterii philosophici privilegiis et immunitatibus consequendis, publicae disquisitioni et censurae, ad diem 18. Octob. /.../ submittit Johannes Bringius, /.../ - Dorpati Livonorum, 1639: Typ. acad.)   H, [Tartu UB]

GRATULATIO

Praestantissimo et Doctissimo Ju-

veni Viro,

Dn. JOHANNI BRINGIO, in Acade-

mia GUSTAVIana, pro Laurea Magistri reportanda,

de LIBERALITATE; soliciter dispu-

tanti.

 

Est pulchrum larga depromere munera dextra,

Quod tu, mi BRINGI, mente lubente facis;

Pulchrius est valido virtutem Marte tueri,

Quod quoque, mi BRINGI, mente lubente facis.

5          Dum pro illa pugnas armis rationis et artis,

                                    Protinus unde tibi pulchra tiara datur.

                        Hanc cole virtutem, pulchramque tuere tiaram,

                                    Et tibi perpetuum crescet in orbe decus.

                        Plaude paterna domus te filius usque salutat

            10                    BRINGIVS, atque unum lumen in arte venit.

Animi declarandi ergo apponebat

Joh. Mag. Silerus.

 

7. Adr: Johannes Bringius – Aut: Haquinus Platinus (cf. 6)                      H, [Tartu UB]

GRATULATIO

O BRINGI, Aoniae decus immortale cohortis,

Et Dorpatensis gloria magna chori;

                        Rem magnam dextre praestas, dum fortia bella

                                    Pro virtute sacra Marte favente geris.

            5          Hinc tibi dante Deo, sit amici nomen honoris

                                    Ceu meruit pietas, sedulitasque tua.

                        Aspiret Christus coeptis, et vota secundet:

                                    Inter honoratos lucida stella mices.

Alacri animo adscripsit

Haquinus Platinus Smol. S.

 

8. Adr: Johannes Bringius – Aut: Faderus Arvidi Wraelius (cf. 6)           H, [Tartu UB]

GRATULATIO

Sacrarum BRINGI Musarum candida proles;

Muneris es largus, munera larga feres:

Nam tibi de Lauru sertum connectet Apollo,

Spectata ut virtus fiat aperta tua.

Honoris et fausti ominis E.

scripsit

Faderus Arvidi Wraelius,

Smol. S.

 

9. Adr: Philippus Crusius et Ottho Bruggemannus – Aut: Adamus Schafferus (Illustrissimi et celsissimi principis ac domini /.../ Friderici, haeredis Norwegiae, Ducis Schleswici, Holsatiae, Stormariae, ac Dithmarsiae, comitis Oldenburgae et Delmenhorsti, etc. consiliariis /.../ et per Moschoviam in Persiam legatis magnis, /.../ Philippo Crusio, J. U. licentiato, /.../ Otthoni Bruggemanno, jam, /.../ e Persia Reducibus. /.../ Adamus Schafferus, Hervorda Guestphalus, in comitatu quondam alumnus. – Dorpati, 1639: Typ. acad.)                                                       Tartu UB

PROSPHONETIKON

Magnifici Virtute Viri, super aethera noti,

Egregio officio LEGATI et munere magni,

Delicium DUCIS HOLSATIAE, rata gloria Gentis,

Praesidiumque meum, et Studiorum dulce levamen:

5          Sic, comitante Deo, Christo Duce, et Auspice Flatu,

                        Vos tandem Reduces post perpessa esse pericla[2],

                        Quis non laetetur? qvis non rata jubila tollat?

                        Exactis agitur jam qvartus mensibus annus,

                        Holsaticae postqvam terrae pulcerrima tempe

            10        Liqvistis Valedicentes pietate Propinqvis;

                        Ad terram ivistis peregrino Sole calentem.

                        Mirati Levones; Miratus Moschus et Indus

                        Vos ire ad claras Regalis Persidos oras.

                        Persia nascentis fulget sub solis Eoo,

            15        Dives agris, dives positis in foenore terris.

                        Regia vidistis late fulgentia Sceptra.

                        Ipse Pater Patriae sancta virtute serenus,

                        Rex hominum, claris aeternum Regibus ortus;

                        Postqvam accessistis vultu laetatus amico,

            20        Et vos porticibus confestim accepit in amplis,

                        Et Celsi Holsatiae Ducis Illustrissima jussit

                        Enarrare cito gravium mandata laborum.

                        Dixerat: et facilis data postqvam copia fandi;

                        Narrastis; Dux Holsatiae FRIDRICVS, amici

            25        Orbis honor, celsis prognatus Regibus Heros,

                        Consulat in medium veluti, et rata commoda Gentis

                        Amplificare velit nova per commercia rerum.

                        Audijt excelsus postqvam Rex, inclytus Heros,

                        Portandas longinqva novas per compita merces;

            30        Hinc et amicitias aeterno foedere claros

                        Jungendos inter Populos, Gentemque togatam:

                        Inclyta Regalem penetrarunt gaudia mentem.

                        Illustres Regni Proceres, ubi talia fat<is>

                        Percepere novo; dixerunt candida verba,

            35        Et sunt laetati, mercis Mutator Eoae

                        Qvod novus Holsaticis e terris dexter adesset.

                        Convenere ratis inter se protinus actis,

                        Et nova perpetuo junxerunt foedere pacta.

                        Et bona conjuncto sunt Voto verba precati:

            40        Eoae felix sit permutatio mercis,

                        Holsaticae felix siet apportatio sortis.

                        Hoc erat! hoc unum felix communeque votum,

                        Mutua ut alternis tradantur munera dextris!

                        Omnibus exactis; Regali et divite pompa

            45        Dicitur extremum Vale; Dicitur, Auspice Christo,

                        Ite bonis avibus; Celso Veneranda referte

                        Hinc mandata Duci; Feliciter ite, redite

                        Holsaticae in terrae pulcerrima regna; Serenos

                        Adjungam Comites viae, et omnia commoda pandam.

            50        Dixerat: et cito Moschoviae transfertur ad oras

                        Candida fama rei. Magnus Dux, inclytus Heros,

                        Moschoviae exultat; bona pergit dicere verba;

                        Et cum laetitia Reduces Vos accipit altum;

                        Regales offertque, novos atque addit honores,

            55        Exultatque maris spatiosa per aequora Caspi

                        Ire redire Viros: Bona coepit dicere verba;

                        Eoae felix sit permutatio Mercis,

                        Holsaticae felix siet apportatio sortis.

                        Dixerat: et terrae Proceres feliciter adsunt,

            60        Et Ducis insigni pompa ducuntur ad aulam,

                        Ac multum summo praeclari augentur honore;

                        Accipiunt, redduntque rato dictamine voces,

                        Et juncta Illustri Peditumque Eqvitumque caterva

                        Sancto e Moschovia bene dimittuntur honore.

            65        Audijt id postqvam tellus Livonica: multum

                        Jugiter exultat; laetantur viscera terrae!

                        Plaudit Mercurij soboles Dorpatica: Apollo

                        Dexter ovat, recitatque melos Citharaque Lyraque.

                        Inclyta telluris totius Gloria Riga

            70        Plaudit ovans: plaudit Revalia Marte superba;

                        Plaudit in ingenuo celeberrima pectore Narva;

                        Laetitiae plausu Parnovia tota triumphat;

                        Dantur ubique novo voto nova gaudia; dicunt;

                        Eoae felix sit permutatio Mercis,

            75        Holsaticae felix siet apportatio sortis.

                        Audijt Holsatici Dux Illustrissimus orbis,

                        Et Proceres terrae Illustres, et Civicus ordo,

                        Et bona confestim coeperunt dicere verba.

                        Dixerunt: o Magnifici pro tempore nostri

80        LEGATI, Reduces laeto sint sidere nobis.

            Neqvicquam sunt multorum ignari ante malorum,

            Holsaticae postqvam migrare e finibus, ante

                        Qvattuor o anno, sunt ausi, et credere Ponto

                        Sese inceperunt; coelum undique et undique Pontus,

            85        Spirarunt Venti, fluctus et ad astra voluti.

                        Vix orbem medium nox horis acta subibat,

                        Cum subito torqvent in saxa Oilandica navem.

                        Ad coelum palmas tendunt cum voce supinas,

                        Et precibus certant, vix spes superasse videtur,

            90        Qvando Legatus, curis licet aeger obortis,

                        Incipit; o Socij, mens nostra est nescia Fati:

                        Ah! revocate animum et rebus servate secundis;

                        Et facilem dabit his finem Divina potestas.

                        Hinc licet argenti, gemmarum pondus et auri,

            95        Commissum noctu cymbae mergatur, idipsum

                        Lux tamen orta dabit, veluti lux reddidit orta.

                        Altera cymba agitur, sed mergit in aeqvora fluctus,

                        Apparent vasto nantes in gurgite nautae;

                        Eluctantur aqvis: Faber ast lignarius unus

            100      Fluctibus opprimitur, tristem subit aequore mortem.

                        Sol ruit interea, et miscetur murmure Pontus,

                        Optati crescunt venti spirantque secundi,

                        Vela ferunt, scopulis abcedunt Numine fausto.

                        Laeva Kalmariam, hinc Oiland dextraque relinqvunt.

            105      Praetereuntque gravem scopulum, qui Svecica Virgo

                        Dicitur; ast facti magno cum murmure Venti

                        In coecum impellunt conversa cuspide mentem,

                        Et tamen inde abeunt; crebro flat turbine ut Eurus,

                        Incerti Livonum longe junguntur ab oris,

            110      Qvinque dies totos jactantur in aeqvore vasto.

                        Aeolus ex oculis rapuit coelumque diemque,

                        Disjecitque ratem; praesentem singula mortem

                        Intentant; tandem stridens Aqvilone procella

                        Malum aversa ferit sub prima crepuscula noctis,

            115      Franguntur vela, antennae atque statumina navis,

                        Revalia longe arcentur; maria omnia circum

O errant Fatis acti! mox luce seqventi

                        Defessi nautae tendunt ad proxima cursu

                        Littora, turritas veniunt Hohelandiae ad oras;

            120      Anchora de prora jacitur, stat littore puppis,

                        Qvisque DEo memori persolvit pectore grates.

                        Annua dum redeunt data Martinalia festa,

                        Atque alia ex alijs Fatis in Fata vocantur,

                        Deficit ecce rudens! in saxa latentia fracta

            125      Torqvetur navis rapidis et mergitur undis.

O facies miseranda rei! pelluntur ad oras

                        Hohlandae, bis sex ibi qvattuor atque diebus

                        Haerent, et ducunt extrema per omnia vitam!

                        Sed tandem, summo sic disponente Jehova,

            130      Haec Hohelanda duas naves Riga excipit ora,

                        Nau-que-fragos, vivos in littora firma reponunt.

                        Tantae molis erat tractare negotia! felix

                        Persidos, Holsatiaeque siet qvo vectio mercis.

                        Illustris Dux Holsatiae sic ore profatus,

            135      Et Proceres terrae Illustres, et Civicus ordo,

                        Dixerunt bona verba: simul per vota precantur;

                        Qvos habet o Reduces Levonum pulcerrima terra,

                        Incolumes hinc Holsaticis reddantur et oris.

                        Sit faustum et felix! Reduces fausto omine sitis

            140      Holsatiae terris: sint omnia facta beata!

                        Eoae felix sit permutatio Mercis,

                        Holsaticae felix siet apportatio sortis.

                        Omnia felici succurrant omina Fato;

                        Persia, Moschovia, et tellus Livonica, et orbis

            145      Holsatiae felix totum laetetur in aevum:

                        Dentur ubique novo pulcerrima gaudia plausu.

                        Haec ego. Magnifici vos longos vivite soles,

                        LEGATI adsitis Fama super aethera noti;

                        Incolumes vitam Pylios ducatis in annos,

            150      Nomen et immensum volet immortale per orbem.

Dnn. suis Mecoenatibus, Felicem e Persia

reditum ita devote gratulabatur

ADAMUS SCHAFFERUS, Hervorda Gvestphalus,

in comitatu quondam Alumnus.

 

10. Adr: Olaus Nicolai Duncanus – Aut: Laurentius Ludenius (Oratio in felix novi anni 1639. auspicium, ex aureo dicto, quod est Matth. 6. v. 33. quaerite primum Regnum Dei, et justitiam ejus, et haec omnia vobis adjicientur; proponens, qui processus in vocationis nostrae laboribus esse debeat; quam /.../ in Regia Academia Gustaviana, quae Dorpati est /.../ 16. Januarij anno 1639. /.../ publice habebat Olaus Duncanus, junior, /.../ - Dorpati Liv., 1639: Typ. acad.)          SKB, UUB, [Tartu UB]

GRATULATIO

Doctiss. et Ornatissimo Dn.

PERORANTI.

OLAUS NICOLAI DUNCANUS:

Per Anag.

I INCOLA! USU ANNOS DULCA.

 

INCOLA terrarum nunc I feliciter: VSV

EDVLCA vitae venientis svaviter ANNOS.

Justitiam Christi quaeaemus et inclyta Regna,

Ac aderunt praesens vitae quibus indiget VSVS.

Quod ap.

Laurentius Ludenius,

J.V.D. et

Professor.

 

11. Adr: Martinus Nicolai Faxelius – Aut: Laurentius Ludenius (Disputatio philosophica de forma; quam /.../ in Regia Livonum Academia Gustaviana, quae Dorpati est /.../ sub praesidio /.../ Michaelis Savonii, /.../ pro magisterii reportanda laurea /.../ publico examini ad d. 16. Octob. /.../ submittit Martinus Nicolai Faxelius, /.../ - Dorpati Livonorum, 1639: Typ. Acad.)                          UUB, H, [Tartu UB]

GRATULATIO

Doctissimo et Humanissimo Dn.

RESPONDENTI.

MARTINUS NICOLAI FAXELIUS,

Per Anag.

I NVNC: ILLA FAXIT JESUS-AMOR.

 

I NVNC: victrices licitum est contingere Lauros,

Et meritas prima cingere fronde comas.

JESVS noster AMOR rata NVNC ILLA omnia FAXIT,

ILLA, piis votis quae placuere tuis.

Quod animitus app.

LAURENTIUS LUDENIUS, Holsat.

PH. et J.U.D. ac Prof. Jur. Orat. ac Poës.

 

12. Adr: Martinus Nicolai Faxelius – Aut: Johannes Erici <Stregnensis> (cf. 11)

UUB, H, [Tartu UB]

GRATULATIO

                                               Undique Mavors

                                                Implet opacum

                                               Cladibus orbem,

                                               Cuspide laesa

                                 5            Regna laborant.

                                               Soeviat armis

                                               Mars truculentus,

                                               Regna tumultu

                                               Plena sonentque:

                                 10          Non tamen armis

                                               Dorptica Musa

                                               Pressa, movetur.

                                               Fulget adinstar

                                               Lucis in umbris,

                     15          Sydere fausto

                                               Aequa Camoenis

                                               Transigit annos.

                                               Hinc studiorum

                                               Allicit alma

                                 20          Pondere virtus

                                               FAXELIUM usque

                                               Pergat ut acris

                                               Omnibus horis

                                               Et colat Artes,

                                 25          Unde resurgat

                                               Gloria magna.

                                               Tu studiorum

                                               Victor in arce,

                                               Diligis Artes,

                                 30          Ingenijque

                                               Dexteritate

                                               Excolis Artes.

                                               Hinc tua tandem

                                               Tempora lauro

                                 35          Cinget Apollo,

                                               Laude beabit,

                                               Nobilitata

                                               Tollet ad astra.

                                               Gratulor inde

                                 40          Rite tibique,

                                               Rite tuisque:

                                               Gratulor inde

                                               Fausta precando

                                               Fausta canendo

                                 45          Mente favente.

Ita Dn MARTINO FAXELIO, pro

summo in Philos. Gradu disputanti

gratulari voluit

Johannes E. Stregn.

Philosoph. Candidat.

 

13. Adr: Jacobus Friederich – Aut: Laurentius Ludenius (Oratio metrica in felix novi anni, supra a  millesimum, sexcentesimum trigesimi noni auspicium: quam, /.../ in Regia Academia Gustaviana, quae Dorpati est /.../ ipsis Calendis Januarij <1.1.> anno 1639. publice /.../ recitabat Jacobus Friederich, /.../ - Dorpati, 1639: Typ. acad.)

UUB, [Tartu UB]

DEDICATIO

Dn. Lectoris Vita et Incolumitas

Votum meum

 

                        Auspicijs, Pie Christe, tuis Coelestibus, Annus

                        Induat o iterum sese! Feliciter ipsis

                        Primis laeta tuis dicantur verba Calendis.

                        Te sine non poterunt Annorum tempora verti;

            5          Et certa ratione geri quid, et ordine certo.

                        Ast nobis, Te dante, Annorum secula circum

                        Cum redeunt, foetusque ferunt variosque lepores:

                        Spirat odorato florum nova gratia Vere,

                        Florida praegnantem Cererem bene temperat Aestas,

            10        Discolor arboreos reddit Pomona sapores,

                        Defluus atque Hyemem feliciter irrigat imber.

                        Te dante, Arctoae nitidissima Gloria Gentis

                        REGINA, Heroina sacrum Jovis incrementum,

                        Delicium Patriae VIVIT; cito magna gerendi

            15        Praecipitat tempus; Pro Sacris, militat armis;

                        Certat ad obsequium magni solertia Martis,

                        Expedit et bella augendo vibrata sarissa.

                        Te dante, est felix nostri Tutela Lycei,

                        In Patriis crescit sacrosancta Ecclesia terris,

            20        Et pulcrae nullo pereunt discrimine Leges.

                        Te Duce, pulcra Boni metrice Anni exordia dicet

                        Nobilis Eusebiae cultor Pietate, JACOBUS

                        FRIDENRICH/ duodena hodie cum linea plena

                        Vmbra tangetur. Resonent Academica Tempe!

            25        Celse Gubernator Levonum, Dux militiaj

                        Illustris, Baro Illustris, BENEDICTE, Potentum

                        OXENSTJERNORUM Decus immortale Virorum;

                        Magnifice o Rector; Soboles Illustris amandi

                        Mercurij; et nostri Proceresque Patresque Lycei,

            30        Atque Novenarum Cultor studiose Sororum;

                        Adsis: Pulcra Novi sume Anni Exordia: Grata

                        Carpe manu Strenam: Christo Duce et Auspice Christo,

                        Omnia Principijs insunt atque ultima primis!

Perscriptum Dorpati 1. di<e> Jan. Anno 1639.

V. J. G.

humiliter,

V. M. J. R. et E.

reverenter,

V. H. et P.

amice colens,

LAVRENTIVS LVDENIVS, Holsat:

PH. et  J. V. D. Poët. Cor. Professor

Juris, Oratoriae et Poës.

 

14. Adr: Jacobus Friederich – Aut: Laurentius Ludenius (cf. 13)            UUB, [Tartu UB]

GRATULATIO

Nob. et Humaniss. Dn.

PERORANTI.

JACOBVS FRIEDENRICH/

Per Anag.

HIC CVRA FIDERE BONIS.

 

                        Grata Novi quando sic Anni Exordia pandis,

                                    In Christo HIC tua sit FIDERE CVRA BONIS.

Quod ap.

LAVRENTIVS LVDENIVS,

J. V. D. et Professor.

 

15. Adr: Jacobus Friederich – Aut: Adrianus Verginius (cf. 13)  UUB, [Tartu UB]

GRATULATIO

JACOBVS FRIEDENREICH / RIGA-LIVONVS,

SANCTAE THEOLOGIAE STVDIOSVS:

kat' ¢nagr.b in a mutato.

AGE, ANNI HVIVS FINIS ADEST, CHRISTO

DEO VERO SIT LAVS AC GLORIA VOCE.

 

                        Eja AGE, FINIS ADEST; in quo nos viximus, ANNI                                                                HVJVS ADEST FINIS, principiumque Novi.

                        Fundite laetitiam palmis, AC plaudite VOCE,

                                    CHRISTO SIT VERO GLORIA LAVSque DEO.

Amico suo fraterno lubens f.

ADRIANUS VERGINIUS, Julino-Pomeranus,

Ecclesiae Nuggensis Pastor, et Scholae Senatoriae

Dorpat. p.t. Moderator.

 

16. Adr: Jacobus Friederich – Aut: Johannes Fabricius (cf. 13)  UUB, [Tartu UB]

GRATULATIO

                        Non capies Sophiae magmentum? disseris alte!

                        Disseris, ut doceas Sophiae cemelia sanctae

                        Qvaerere, qvam Christus coelo nos cordis in imo

                        Erudit. O Sophiae vos SANCTA SILENTIA Sanctae!

            5          Disseris, ut discas in amore qviescere Christi.

                        Verus amor, veram Christi qvi corde qvietem

                        Qvaerit! vera qvies, qvam Christus amascit; amorem

                        Pectore qvae Christi qvaerit! Si qvaeris utrumque,

                        Nonne perennantis Sophiae magmenta capesses?

Debiti honoris ergo adjecit

JOHANNES FABRICIVS,

SS. Theol. Studiosus.

 

17. Adr: Jacobus Friederich – Aut: Hermann Schwemler (cf. 13)           UUB, [Tartu UB]

GRATULATIO

                        Aurea nunc vere sunt secula: non tamen auro

                                    Venit honos: Christo conciliatur amor.

                        Pulsa novo est anno mala res: pulcerrima Christo

                                    Jura Poli nobis sunt: Pietate colunt

            5          Terra salumque Polusque DEUM: Fridrice, loquela

                                    Est tua Fridenreich: aurea secla refers.

Herm. Swemler.

 

18. Adr: Jacob Friederich – Aut: Johannes Abrahams Diemerus (Dissertatio theologica de Deo in essentia uno, et in personis trino. Quatuor dictorum classicorum. Ex Deuteron. 6. v. 4., Psalm. 33. v. 6., Matth. 28. v. 19., 2. Corinth. 13. v. 13. ¢n£lusin; et praecipuorum erotematum x»gesinexhibens in Regia Academia Dorpatensi publicae censurae subjicietur praeside Andrea Virignio /.../ respondente Jacobo Friederich /.../ d. < > April. /.../ - Dorpati Livonorum, 1639: Lit. acad.)

H, EAB, [Tartu UB]

GRATULATIO

 

AD NOBILISSIMUM ET HUMA-

nissimum Dn. Respondentem de SS.

Trinitate disserentem.

                                          

                                               JACOBE Mystagoge

                                               Trinunitatis, ecquae

                                               Potiora possis hisce,

                                               Et hactenus per actis

                                 5            Proferre et expedire?

                                               Non posse, mi videris;

                                               Nam sacra plura, sacra

                                               De Trinitate dixti[3]

                                               Diebus hisce lapsis:

                                 10          Almum Deum parentem,

                                               Pro concione dixti.[4]

                                               Almum Deumque Gnatum,

                                               Pro concione dixti.[5]

                                               Almum Deumque Flamen.

                                 15          Pro concione dixti.[6]

                                               Et sacra plura, sacra

                                               De Trinitate dices

                                               Iam jam die futura.

                                               Sic perge, perge! Nunquam

                                 20          Meliora tu docebis.

                                               Sic perge, perge! grande

                                               Referes decus. Videbis

                                               Trinunitatem, et ecce

                                               Videbis ipse, et ecce

                                 25          Tunc Gloriae coronam

                                               Virgunculam Coronam

                                               Capies loco brabei.

                                               Capies sed ipse Tu, Tu

                                               Trinunitatis almae,

                                 30          IACOBE, Mystagoge.

Quod animitus Amico suo

syncere precatur

Johannes Abrahamus Diemerus

Lynh. Austr. SS. LL. St:

 

19. Adr: Christophorus Günterberch – Aut: Laurentius Ludenius (Historia monarchiae Persarum: quam,  /.../ in Regia Academia Gustaviana, quae Dorpati est /.../ oratione solenni die 2. Maji, /.../ anno 1639 publice /.../ posteritati consecrabat Christophorus Günterbech, /.../ - Dorpati Liv., 1639: Typ. acad.)                      SKB, LAB, [Tartu UB]

GRATULATIO

Nobilissimo et Doctissimo

DN. PERORANTI.

CHRISTOPHORUS GUNTERBERCHIUS;

Per Anag.

O REGIT HUNC CHRISTUS (PROH)

SUB RE.

 

O regit hunc Christus (proh) sub re divite: Christus

                                    Vsque regat, Regum dinumeretque vices.

Quod animitus ap.

LAURENTIUS LUDENIUS, J.V.D.

et Professor.

 

20. Adr: Christophorus Günterberch – Aut: Rudolph Strauch (cf. 19)

SKB, LAB, [Tartu UB]

GRATULATIO

                        Docte Persarum depingis Regna: Monarchas,

                                    Fortunas pacis, bellaque rite refers;

                        Vt varios discas casus constanter obire,

                                    Perge; tuis coeptis annuat alma Trias!

5             Wem Frömmikeit gefelt /

                          Wer Tugend stets Wehrt helt /

                                      Wird nimmer trawren;

                          Er wird nicht leicht befleckt /

                          Von lasten angesteckt /

10                        Steht wie die Mawren.

                          Weil jhr dieselbe Liebt /

                          Sie euch hinführo giebt /

                                      Ruhm /Lob / begnügen.

                          Fahrt fohrt / vnd stelt jhr nach /

15            Der Himmel wird ewr sach

                                      Nach willen fügen.

Haecce in gratiam Commensalis sui

svavissimi in Sveciam abituri-

entis deproperabat

Rudolphus Strauch/ Windoviensis.

 

21. Adr: Sveno Magni Hagelstenius – Aut: Laurentius Erici Gavelius (Disputatio philosophica de virtute heroica; quam, /.../ in Regia Academia Gustaviana, quae Dorpati /.../ est sub praesidio /.../ Michaelis Savonii, /.../ pro magisterii philosophici privilegiis et immunitatibus consequendis, publicae disquisitioni et censurae, ad diem 18. Octob. /.../ submittit Sueno Magni Hagelsten. – Dorpati Livonorum, 1639: Typ. acad.) (cf. 1)                                                                                SKB, H, [Tartu UB]

GRATULATIO

 

Praestantissimo nec non Doctissimo

DN. RESPONDENTI.

Sympatriotae et amico syncere dilecto, pro

summo in Philosoph. gradu consequendo

disputanti.

 

                        Sic bene sectaris Clarijs versatus in agris,

                                    Virtutem magno SVENO labore sacram?

                        Quaerere quam debent illustri stemmate nati,

                                    Reges et Proceres, magnanimique Duces.

            5          Heroum exemplum mansit GUSTAVUS ADOLPHUS

                                    Rex, patriaeque Pater Divus honore manet.

In signum infucatae amicitiae,

lubens apposuit,

Laurentius Erici Gavelius,

Gevalia Svecus.

 

22. Adr: Heinrich Hein – Aut: Laurentius Ludenius (Sceptris Academicis, quae, /.../ in magnificum pro t. rectorem /.../ Heinricum Heinium, Rostochiensem, Megapolitanum, J.U.D. /.../ in Regia Academia Gustaviana, quae Dorpati est /.../ juris professorem, Juridicaeque Facultatis pro t. decanum /.../ et summi Dicasterij ibidem adsessorem; /.../ magnificus /.../ pro t. exrector /.../ Andreas Virginius, nob. Pom. haereditarius in Schwessien, SS. theol. D. et professor primarius, ejusdemque facultatis pro t. decanus /.../ nec non protosynedrij adsessor, publice solenniterque 30. die Octobris anno 1639. /.../ conferebat: gratulantur /.../ Musae Embecciades. – Dorpati Livonorum, 1639: Lit. acad.)                                                                                   H, [Tartu UB], [UUB (def)]

GRATULATIO

                        Excellens, HEINI, Themidos gravitate Professor,

                        Eunomiae sublime decus, pulcerrima Gentis

                        Laus Megalespoleos, Levonum omni notior orbe,

                        Arctoi e Regis Dorptae Prudentibus, ingens

            5          Consulere in medium et dubijs succurrere rebus:

                        Salve! dum geminum Christus proponit honorem,

O Collega, REDVX, HERCLESque Academice, Salve!

Inclyta scitatum te sancti Oracula Regni

Miserat in dubio suspensa Academia casu.

            10        Namque sacrum aeternae fulcrum Pietatis, et illud

                        Dulce jubar terrae, Divus GVSTAVUS ADOLPHVS,

                        Ardua progenies Regum, Celsissimus Heros;

                        Eripuit postquam diverso ex hoste trophaea,

                        Eruit et Levones belli e graviore tumultu;

            15        Illustris Victor; celsum dum laeta triumphum

                        Vox canit, et longas resonant Capitolia pompas;

                        Respicit, et quanta discit Livonia tellus

                        Continua gravium serie calcata malorum

                        Fessa labat; passim infelix dum soevit Erinnys

            20        Contemptrix superum, tristisque avidissima fraudis.

                        Indoluit soevarum inter deserta ferarum

                        Agrestes humilem Levones traducere vitam!

                        Regia ferre jubet dociles mandata per aures

                        Vt deponantur gentilia numina pagis,

            25        Vana superstitio et veterum cultura Deorum.

                        Imperat ut veri coelestes Numinis haustus

                        Accipiant populi, mentesque in nube jacentes

                        Sancte illustrentur divini ad luminis ignes.

                        Imperat ut Probitas omnes cingatur in usus,

            30        Temperet et praestans humana pericula virtus.

                        Mox loca dat populis, ubi Christum jugiter orent:

                        Sanctae Palladium erigitur sublime Minervae; et

                        Hic, ubi Dorpatum surgunt Academica Tempe

                        Rex pius, invitat pretiis, et praemia ponit

            35        Digna Professore, ingenuo qui tincta lepore

                        Corda creet Juvenum, monitis et voce magistra

                        Informet, dotesque alto cum pectore jungat.

                        Rex pius, invitat pretiis, et plurima ponit

                        Praemia; Mercurii ut Soboles, generosa Propago,

            40        Dum dociles facilesque anni, dum mobilis aetas,

                        Addiscat sancti divina Oracula Verbi;

                        Quodque Stagirites, schola dixit quodque Platonis;

                        Papinianus item, et celebris medica Arte Machaon.

                        Assignata tamen deerant data jugera campi,

            45        Certaque diversis exercita frugibus arva;

                        Prataque et arboribus spectabilis undique sylva.

                        Quippe, Patre patriae Divus GVSTAVVS ADOLPHVS

                        Linquebat dulces Animas pro Arisque Focisque

                        Ante, suos caperent quam facta exordia fines.

            50        Vidit; et indoluit sacrum Jovis Incrementum

                        Regibus Arctois CHRISTINA Heroibus orta;

                        Dixit; sancta Aris alimenta et commoda Musis

                        Sufficiam; Cererem expediam; dabo jugera campi,

                        Vt quoties Soles longinqua retorserit aestas,

            55        Hinc propriis toties reditum det culmus aristis

                        Et medio addictas aestu terat area fruges.

                        Regia, cara Deo, Pietas ita dixerat; atque

                        Aeterno veniunt haec Vero consona verba.

                        Sospes adest, Comitum Angelica stipante caterva,

            60        HEINIVS Orator; proponit humillima vota,

                        Quae demisso Embecciades de pectore promunt

                        Atque humiles orant Regalia Numina Musae:

                        Si visum, ut segetes reddensque alimenta quotannis

                        Assignetur humus Dorptensibus aequa Camoenis.

            65        Dixerat: Illustris Regina his annuit; optant

                        Idque e Reginae Arctoae Primatibus omnes.

                        Optata accipimus diffusi jugera campi

                        Agrestesque Lares, et certa mapalia; ceu sunt

                        Quadringentae Hubae, triginta tresque: relatae

            70        In decies septem et quatuor pulcro ordine pagos,

                        Hic ubi confinis bellacibus Ingria Moschis;

                        Gaudeat ut tantis crescens Academia donis,

                        Paulatim et propriis flavescat campus aristis.

                        Sanctae Reginae meritas persolvere grates

            75        Quis poterit? Referat Numen Coeleste. Precemur,

                        Delicium Patriae vivat, per secula vivat,

                        Et maneat clemens nostri tutela Lycej,

                        Audendo bella expediat victricibus armis.

                        Illustres Regni Proceres per secula vivant;

            80        Rideat et vultu illustris fortuna sereno.

                        HEINI, delicium Musarum Nobile, Salve;

O Collega Redux! Christo Duce et Auspice Christo,

                        Inde, ubi magnanimis contermina Svecia Gothis

                        Rite Redux, Salve: manet alta mente repostum[7]

            85        Quaesitum auxilium et nascentis commoda Musae.

                        Nulla operis famam poterit delere vetustas,

                        Posteritas laudes aeternum extendet in aevum,

                        Laetas ingeminant grates Academica Templa,

                        Eusebia, Eunomia et Panacea et candida Pallas,

            90        Et laeti Juvenes et ovantes voce Camoenae.

                        Hinc, dum Magnificas Illustris muneribus hujus:

                        Delicias gustas; Dörptensis sancta Lycei

                        Sceptra gerens; ut sis felix Academicus Hercles,

                        Coelica dispositisque aspiret Gratia coeptis

            95        Atque det usque operis cursus venerata secundos,

                        Omnium idem nostrum est unum communeque votum.

                        Te Rectore, sacris Habitacula credita Musis

                        Regifica auguste surgant ad sidera pompa:

                        Impleat et Virtus venturi pulpita secli;

            100      Atque quod esse velit faustum Deus arbiter aevi,

                        DORPTA  sui mundi microcosmos, Martia muris

                        Filia Mercurij, Aonidum Germana resurget!

                        Salve, HEINI, meritis Hercles Academice, Salve;

                        Semper honos, nomenque tuum laudesque manebunt.

Quod ve<n>erando suo Dn. Collegae gratiae

LAURENTIUS LUDENIUS, Holsat. PH.

et J. V. D. ac Professor Juris, Orat. et Poëseos.

 

23. Adr: Heinrich Hein – Aut: Johannes Vallander (cf. 22)

H, [Tartu UB], [UUB (def)]

GRATULATIO

                        Dic tuae laudis, Vir Clare, Encomia, versu

                                    Ecquid opus tenui commemorare tibi?

                        Alterius nescit Virtus laudarier ulnis;

                                    Ipsa sibi victrix subsequa secla fovet.

            5          Duntaxat grator Sceptris. Hoc insuper addo,

                                    Te tria commendant; Gloria, Laus, et Honor.

                        Haec te commendant; ego quae commendo Poëtis,

                                    Uberiore quibus Carmine Vena fluit.

Johan. Vallander L.C.

 

24. Adr: Heinrich Hein – Aut: Johannes Schlechter (cf. 22)

H, [Tartu UB], [UUB (def)]

GRATULATIO

Nec mea Calliope, mea nec Tritonia Pallas,

            Longa solet metrico plectra polire modo.

Hinc gracili paucis ludam modulante Thalia,

            Complectens uno plurima vota metro.

            5          Sis felix; foveasque tuos, faveasque Camoenis,

                                    Sceptra gerenda colens, Sceptra colenda gerens.

Felicioris ominis E. accinebat

JOHANNES Schlechter/ Rig. Liv.

 

25. Adr: Heinrich Hein – Aut: Hermann Schwemler (cf. 22)

H, [Tartu UB], [UUB (def)]

GRATULATIO

                         1.

Ich erfrewe mich von Hertzen/

                   Wenn ich euch O Galathee/

                   Und die Charitinnen seh’

                   An der kühlen Embeck schertzen:

      5     Da ihr schöne Cräntze bindet/

                   Auff den angenehmen schein/

                   Da Herr HEIN wird Rector seyn/

                   Da Ihr Lorbeersträuche windet.

 

                         2.

            Dorpt/ laß deine Musen singen/

      10    Ich will selbsten nach gebühr

                   Unser Themis Edlen Zier

                   Meine grobe Seitten zwingen:

                   Was auch sonst zu seinen Ehren/

                   Bey mir immer müglich ist/

      15    Will Jch ohne Müh vnd Frist/

                   Gerne wissen anzukehren.

           

                         3.

Itzt rint vnsre Hippocrene,

Fama flieget durch die Lufft

Wenn sie diesen Tag aussrufft

      20    Durch ein hohes Lobgethöne:

                   Auff zu solchen Ehrensachen/

                   Dieser Tag ist nichts als Pracht/

                   Pallas hat jhn selbst gemacht/

                   Siehet wie die Wolcken lachen.

 

                         4.

      25    Wünschet das Herr HEINE lebe/

                   Wünschet daß sein trewer Fleiß

                   Vber allen Neid und Preiß

                   Auff dem hohen Pindus schwebe:

                   Wünschet daß sein Ruhm vnd Ehre/

      30    So den Sternen auch bekandt/

                   Sich durch Phoebus weise Hand

                   An den Zinnen stündlich mehre.

 

            Qvi bibis Embeccam, qui Dunam, curre Livone,

                                    Currite quos HEINI, currite, tangit amor.

            35        Alta datae laudis reboabit buccina, Musae

                                    Cingite fronde comam; curre sacrata Themis.

                        Bartole, Balde veni: subito concurrite cives,

                                    HEINIVS en Rector pulpita scandit Atlas.

                        Quod si quis vestrum, Iuvenes, non venerit, illi

40                    Imprecor ut nunquam Pallados amne bibat.

Imprecor ut nullo capiatur honoris amore,

            Ut Craesi capiat munera nulla precor.

Imprecor ut pulcris placeat non ille puellis,

            Qui timet haec, hodie promptus adesse potest.

Herman Swemler.

 

26. Adr: Heinrich Hein – Aut: Jacobus Lotichius (cf. 22) H, [Tartu UB], [UUB (def)]

GRATULATIO

                                               Qvaenam nova illa Pompa?

                                               VIR CLARE, CLARE DOCTOR

                                               LEGUM ARBITER PERITE,

                                               Quaenam nova illa Pompa?

                                 5            Orchestra nam Lycej

                                               Est undiquaque cincta

                                               Tapetibus. Juventa

                                               Pindoque Phocidique

                                               Gratissima, astat illic,

                                 10          Coetusque Gratiarum;

                                               Bene, verba tersa Pithus[8]

                                               (Mellifluo lepore

                                               Ceu Tulliana mista) e

                                               Labris Viri utriusque

                                 15          Manantia, haurientes.

                                               Ostrinus ille amictus

                                               Humeros viri decore

                                               Onustat, et venustat.

                                               Aurata bina Sceptra

                                 20          Bini, hic et ille, gestant.

                                               Comitatur hic et ille

                                               Comitatur ille et iste.

                                               Et hic, et ille, et iste,

                                               Quos rythmica potessit

                                 25          Chely vibrare nervos,

                                               In tempus hocce praesens

                                               In ejus atque laudes

                                               Deponit atque defert.

                                               Et hic, et ille, et iste,

                                 30          Et omnis, universa

                                               Quos ambit haecce Dorpta,

                                               Concurrit et recurrit;

                                               Vultuque (quem venustat

                                               Severitas decora

                                 35          Et dignitas honora)

                                               Viri Gradus supremi

                                               Gaudet frui et fruisci.

                                               Quaenam nova illa Pompa?

                                               Evax! Nova haecce Pompa?

                                 40          Insignis haecce Pompa,

                                               Solennis haecce pompa,

                                               Merito TIBI irrogatur,

                                               VIR CLARE, CLARE DOCTOR:

                                               Tapeta namque structa,

                                 45          Et vestis illa Coae,[9]

                                               Et illa bina Sceptra,

                                               Et quicquid ille et ille

                                               Et quicquid ille et iste

                                               Molitur: Haecce cuncta

                                 50          Te nuncupant aperte

                                               Nostri caput Lycej;

                                               Et nuncupant aperte

                                               Nostri Ducem Lycej.

                                               Hinc salve, et usque salve

                                 55          O numen atque Lumen

                                   O Lumen atque numen.

                                               Nostrae sacrae Palestrae.

                                               Et ter, quaterque salve

                                   O Ductor atque Doctor,

                                 60          O Doctor atque Ductor

                                               Nostrae sacrae Palestrae.

                                               Hinc ergo, CLARE DOCTOR,

                                               Sis RECTOR atque DUCTOR,

                                               Sis aequus arbiter, qui

                                 65          Justa bilance cuncta

                                               Perpendit ac rependit!

                                               In Lege Jus sit: Et Tu

                                               VIR MAGNE, MAGNE RECTOR,

                                               Justi memento et Aequi

                                 70          Themidos memor verendae.

                                               Sua Titius reservet,

                                               Servet suumque Cajus:

                                               Et quicquid hic et ille,

                                               Et quicquid ille et iste

                                 75          Movet, vel usque patrat,

                                               Astraea justa tollat:

                                               Sis aequus arbiter, qui

                                               Justa bilance cuncta

                                               Perpendit ac rependit.

                                 80          Sed eja, ne quid errem!

                                               VIR MAGNE, MAGNE RECTOR;

                                               Ut Judici subinde

                                               Et huic, et illi, et omni

                                               Fuitque eritque laudi

                                 85          Fuisse perbenignum:

                                               Tibi sic eritque laudi

                                               Fuisse perbenignum

                                               Benignitasque longe

                                               Superat Severitatem.

                                 90          Hinc ergo, CLARE DOCTOR,

                                               Sis DUCTOR, at benignus;

                                               Sis RECTOR, at benignus;

                                               Sis RECTOR atque DUCTOR

                                               Sis DUCTOR atque RECTOR

                                 95          Uterque sed benignus.

                                               Ne soevias in ausus

                                               Improvidae Juventae;

                                               Et quicquid hic et ille,

                                               Et quicquid ille et iste

                                 100        Patraverit, Paterne

                                               Discerne, solve, tolle.

                                               Sic rite, sicque vere

                                               Et hic, et ille, et iste

                                               Et omnes, Universa

                                 105        Quos ambit haecce Dorpta,

                                               TE, ut sentiunt aperte

                                               Nostri Caput Lycej;

                                               Ut sentiuntque aperte

                                               Nostri Ducem Lycej,

                                 110        Sic sentientque aperte

                                               Nostri Patrem Lycej

                                               Ego insuper trecentis,

                                               Et insimul trecentis,

                                               TE laudibus movere

                                 115        Ultra Poli rotatus,

                                               Sum promptus et paratus.

JACOBVS LOTICHIVS.

 

27. Adr: Heinrich Hein – Aut: Rudolph Strauch (cf. 22) H, [Tartu UB], [UUB (def)]

GRATULATIO

Est onus omnis honos: sed honos facit omne onus omni       

Vt leve sit: vincit deliciosus honos.

Officij fers jugis onus, Venerande Professor,

            Magnifici sequitur devenerandus honos.

            5          Hic felix sit honos: nec onus sit Sceptra tenere:

                                    Prosperitet summus tradita Sceptra DEVS.

addebat  l. mque

RUDOLPHUS Strauch/ Wind-Cur.

 

28. Adr: Heinrich Hein – Aut: Johannes Vestringius (cf. 22)

H, [Tartu UB], [UUB (def)]

GRATULATIO

                        HEINI, cor Themidos, decus immortale sororum,

                                    Phoebus post multos quem veneratur avos,

                        Qui potuere inter lituos pacemque tonare

                                    Quorum ori contra consonuere Scholae,

            5          Te priscis iterum nunc auget honoribus aether,

                                    Quos nemo nisi mens tam generosa capit.

                        Stat mea Musa tremens varijs rationibus acta,

                                    Et tacuisse nefas et cecinisse pudet.

                        Hinc pudor, inde nefas, illinc infantia parvis

            10                    Incoeptis obstat, undique Musa riget.

                        Si dico quod non proprio tantummodo magnus

                                    Nomine, quod propria non modo laude clues;

                        Magni quod proavi sua nomina magna secuti

                                    Et sua junxerunt nomina nominibus:

            15        Mens generosa scio proavum fastidit honore

                                    Crescere; parta a te gloria, stemma facit.

                        Ergo quid satius? quam ter tria pocula Musis

                                    Consecrasse novem, ter tria pocla[10] tibi.

Debita ex observantia scripsit

Johannes Vestringius.

 

29. Adr: Heinrich Hein – Aut: Casparus Eggerdes (cf. 22)

H, [Tartu UB], [UUB (def)]

GRATULATIO

HEINRICVS HEINIVS DOCTOR.

Per anagr.

HIC RITVS HONORI: DEVINCES.

                                            

                        Clarum novumque jam, subis negotium,

                        Munusque clara mente quam dignissimum,

O Magne Iuris Doctor, et Legum gravis

Consulte, dum Sceptris novis et inclytis

            5          Celebris Universitatis Dorpticae

                        Ornatus, istam fronte laeta suscipis

                        Provinciam, provinciam multo quidem

                        Labore septam, sed tamen gratissimae

                        Famae et perennis gloriae plenissimam.

            10        HIC namque RITVS annuus cedet tibi

                        Et omnibus tuis HONORI mutuo

                        Ac debito. Dent Fata quaeso coelica,

                        Vt hoc decus nomenque sancti muneris,

                        Quo sponte jam fungere, crescat indies

            15        Magis magisque floreat Concordia,

                        Et alma Virtus hic perennet undique.

                        Sic omne DEVINCES onus, sit munia

                        Laboriosa perferes, sic Numina

                        Regesque Phoebi pro optima placentia.

            20        Vires alacres largiatur Optimus                     

                        Deus tibi, atque trina secla Nestoris.

Quod ex animo precab.

CASPARUS  Eggerdes/ Rostoch.

Megap. SS. Theol. Stud.

 

30. Adr: Heinrich Hein – Aut: Adam Schaffer (cf. 22) H, [Tartu UB], [UUB (def)]

GRATULATIO

                        Plaude Decus Sophiae, et nostri bene plaude Lycei!

                        Sic Tua Te Virtus sic sic in Sceptra reponit

O ingens HEINI, decus immortale Lycei,

Vir Pietate, probus nulli es probitate secundus.

            5          Scilicet exactum calles jam doctus ad unguem,

                        Quid Themidos, quid sit Virtutis munere fungi:

                        Hinc ob utrumque reor, quod quovis indice, clarus

                        Eunomiae Doctor Themidosque Professor amicae.

                        Sic et ob hoc ipsum, vel quovis judice, clarus

            10        Judicij Adsessor; nunc idem Rector et audis

                        Dorpatici Magnus Parnassi, maxime Fautor.

                        Hinc ob utrumque reor, quod dignus amore et honore.

                        Scilicet exactum calles jam doctus ad ungvem,

                        Quid Themidos quid sit Virtutis munere fungi.

            15        O ingens HEINI, decus immortale Lycej,

                        Sic Tua Te Virtus sic sic in Sceptra reponit,

                        Plaude Decus Sophiae, et nostri bene plaude Lycej.

Moris et Honoris E. gratulab.

adproperabat

ADAMVS SDHAFFERVS

Med. Stud.

 

31. Adr: Heinrich Hein – Aut: Fridericus Heinius (cf. 22) H, [Tartu UB], [UUB (def)]

GRATULATIO

                        Sic iterum, Venerande Parens, Duce et Auspice Christo,

                                    Christo, qui coeli Regia Sceptra tenet,

                        Te Dorpatensis jam Academicus ordo Senatus

                                    Rectorem creat hoc munere Magnificum.

            5          Te Grex Aonius laetis amplectitur ulnis,

                                    Proque Magistratu gaudet habere suo.

                        I pede felici, quo te vocat inclyta virtus:

                                    Te Duce, constanter gaudia Phoebus amet.

                        Ipse Pater rerum tibi clemens adsit Iöva,

            10                    Prosperet et clari muneris acta tui.

                        Sic bene Magnifico claresces semper honore,

                                    Et pia Posteritas dixerit acta rei.

                        Sic haec orta dies tibi jucundissima! Dicam,

                                    Salve exorta dies, fausta futura meis.

Sic Patri suo charissimo filiali-

ter gratulatur

Fridericus Heinius.

 

32. Adr: Heinrich Hein – Aut: Michael Hochenius (cf. 22)

H, [Tartu UB], [UUB (def)]

GRATULATIO

                        Dum virtute tua dignum, dignissime RECTOR,

                                    Egregium officium Magnificumque subis:

                        Offertur merito tibi, dico; et grator honori

                                    Magnifico, Musae et nectare quique calet.

            5          Vive diu, et felix nobis, dignissime RECTOR,

                                    Vive ac in laudem cresce subinde DEI.

Michael Hochenius Transyl.

 

33. Adr: Heinrich Hein – Aut: Friedrich Kühn (cf. 22) H, [Tartu UB], [UUB (def)]

GRATULATIO

                        Scilicet ut tendens ad summa cacumina montis

                                    Primum lassatur, deinde quiescit ovans:

                        Sic conscendenti sublimis culmen honoris

                                    Post varios casus gloria pulcra datur.

            5          Et tibi sudanti dudum, venerabile pectus,

                                    Virtutis merces, gloria dulcis adest:

                        Nempe tibi clarum, tua MAGNIFICENTIA, nomen

                                    Iam datur, et RECTOR munere Magnificus.

                        Gratulor ergo tibi tanto de nomine, virtus

            10                    Quod dudum meruit: sit tibi faustus honor!

                        Incolumis vivat tua MAGNIFICENTIA, coepto

                                    Scrutator cordis semper adesse velit!

Debitae observantiae et honoris E.

gratulabatur

FRIDERICVS Kühn/ Osilia

Liv. Arensberg.

 

34. Adr: Heinrich Hein – Aut: Christian Eberhardt (cf. 22)

H, [Tartu UB], [UUB (def)]

                                    GRATULATIO

                        Res Claris praeclara Viris, sed plena laboris,

                                    Aoniae celsae sceptra tenere domus.

                        Munere enim gravium Procerum generosa probantur

                                    Pectora, quae meritis et pietate micant.

            5          Hoc tibi honoris onus, decus immortale Lycei,

                                    Aeternum Columen praesidiumque meum,

                        Tradit Athenaei Dorpti censura Senatus

                                    Dum dat Musarum jura regenda tibi.

                        Fata ergo aspirant: voveo, Clarissime Doctor,

            10                    Vt peragas munus prosperitate novum.

                        Sic Salvatoris cumuletur gloria summi

                                    Floreat et crescat docta Helicona cohors:

                        Vsque tuum nomen vulgetur famaque in orbem,

                                    Quae non extremis sit moritura rogis.

Hisce Mecoenati suo aeternum colendo

gratulari voluit

CHRISTIANVS Eberhardt/

Gryphisw. Pomer.

 

35. Adr: Heinrich Hein – Aut: Ulrich Volbergen (cf. 22)

H, [Tartu UB], [UUB (def)]

GRATULATIO

                        Exoritur novus  exactis nunc mensibus actus,

                                    Actus qui cunctis jubila laeta parit:

                        Cum tibi Magnificum Regimen Sceptrumque Lycei

                                    Musarum Praeses, doctus Apollo dedit.

            5          Dignus es, o Themidos Doctor, quem mactat, honore

                                    Virtus: Tu dignus ferre brabea data.

                        Dignus MAGNIFICI RECTORIS nomine, dignus,

                                    Gloria quem Sceptri parta labore manet.

                        Hinc te circumstant Charites, Nymphaeque sorores,

            10                    Atque tuis meritis carmina digna canunt.

                        Gratatur pubes studiosa; caterva Sophorum

                                    Applaudens, laudes tollit ad astra tuas.

                        His me conjungo, et pleno tibi gratulor ore;

                                    Faustum sit regimen, faustaque Sceptra diu.

Haec pauca debiti officij ergo

lubens apposuit

Ulricus Volbergen

Riga-Livonus.

 

36. Adr: Heinrich Hein – Aut: Martin Henschel (cf. 22)

H, [Tartu UB], [UUB (def)]

GRATULATIO

                        Praemia si doctis doctus promittit Apollo:

                                    Si datur augustis laurea digna Viris:

                        Jure tibi mittit jam praemia doctus Apollo,

                                    Teque virum augustum laurea pulcra manet;

            5          Nam dudum Juris-Consultus jure vocaris,

                                    Doctorisque diu nomen et omen habes.

                        Ergo haud immerito RECTOREM Heliconis amantem

                                    Te nunc MAGNIFICUM docta Minerva creat.

                        Gratulor inde tibi, RECTOR venerande, quod hocce

            10                    Sceptrum sis nactus: Det tibi fausta DEUS!

 

                                                            Idem.

 

                        E„ kal¦ paideuto‹j nšmei ¢ndr£sin «qla 'ApÒllwn:

                             e„ d…dotai stšfanoj d£fninoj ™uprepšsin:

                        'Axi£ soi pšmpei nàn «qla d…kaioj 'ApÒllwn,

                             Kaˆ soi kednot£tJ prosfšretai stšfanoj:

          15      'Essˆ ge ™k polloà sofÕj, ºd dikastikÕj ¢n»r,

                             'Hd did£skontoj fa…dimon oÛnom' œceij.

                   ToÞneka ¹metšroio klutou ¥rconta luke…ou

                             Kud£limon to plÁqÒj se profšrousi sofîn.

                   ToÚtou sugca…rw sk»ptrou soi, Fšrtate ¥ner,

          20                Tou b…ou ™ucÒmenoj cr»sima p£nta sšo.

MARTINUS HENSCHELIUS

Wrizen. March.

 

37. Adr: Heinrich Hein – Aut: Volmar Holtzhausen (cf. 22)

H, [Tartu UB], [UUB (def)]

GRATULATIO

                        Ne reliquis docte dicentibus, o mea Musa,

                        Exilis quamvis, videaris sola tacere;

                        Laeta canas, quantum potes, atque silentia rumpas,

                        Dignum hunc laude virum tollas ad sidera honore

            5          Tergemino; et celebres, quantum jam voce valebis,

                        Quem decorat gravitas fastu jucunda remoto,

                        Quemque novem Nymphae potarunt nectare dulci,

                        Et cui Magnificos in Apollinis agmine fasces

                        Dat Dorpatensis jam nunc Academia habere.

            10        Est hic, cui cordi sunt altum Helicona petentes,

                        Quique suum studium omne in eorum commoda confert,

                        Artibus insignes ut tandem evadere possint.

                        Ergo hic in longam producat fata senectam,

                        Officioque dato summus benedicat JÖVA.

Honoris et fausti ominis E. scripsit

VOLMARUS Holtzhausen

Revalia Livonus.

 

38. Adr: Johannes Jonae <Carolstadius> – Aut: Ericus Haquini Bobergius (Oratio de liberalitate: quam /.../ in Regia Academia Gustaviana, quae Dorpati est /.../ die 15 Maji, anno 1639. publice /.../ enarrabat Johannes Jonae Carolstadius, /.../ - Dorpati Livonorum, 1639: Lit. acad.)[11]                          SKB, Karlstad StB, [Tartu UB]

GRATULATIO

Humanissimo et Literatissimo Dn.

PERORANTI.

 

                        Egregia est virtus depromere munera larga,

                                    Quod mi, JANE, refers ore decente tuo:

                        Hanc cole virtutem studio per tempora vitae,

                                    Sic tibi post cineres inclyta fama manet.

Ericus Haquini Bobergius.

 

39. Adr: Johannes Jonae <Carolstadius> – Aut: Laurentius Olai Morenius (cf. 38)

SKB, Karlstad StB, [Tartu UB]

GRATULATIO

Est virtutis opus, virtutis dicere laudes;

Hoc tu, JANE, facis dum pulpita celsa Lycej

Scandis, et exponis fluitantis munere linguae,

Quid sit munifica depromere munera dextra.

Laur. Olai Morenius.

 

40. Adr: Johannes Kemnitius – Aut: Laurentius Ludenius (Oratio in salutiferam passionem Domini et Salvatoris nostri Jesu Christi, typos, quibus Christi passio in Moyse atque prophetis fuit praefigurata, breviter exponens: quam, /.../ in Regia Academia Gustaviana, quae Dorpati est /.../ ipso die Parasceves anno 1639. publice /.../ enarrabat Johannes Kemnitius, /.../ - Dorpati Liv., 1639: Typ. acad.)

SKB, Växjö LB, LAB, [Tartu UB]

GRATULATIO

Doctissimo et Ornatissimo

DN. PERORANTI.

JOHANNES CEMNITIUS;

Per Anag.

HINC INSTO; JESU MANE.

 

                        Sic nihil in JESV mihi clauditur! omne reclusum

                        Cor patet: est transfixa Caro; simul intima cerno

                        Viscera. Distendit pia Brachia, quo attrahat ad se

                        Judaeos Gentesque omnes, quibus omnibus offert

            5          Amplexus, rivos et sancti flumina Amoris.

                        HINC INSTO, INSTO; MANE mecum, dulcissime JESV;

                        Et lucem in tenebris, vitamque in morte videbo.

Quod ap.

LAVRENTIVS LVDENIVS, J.V.D.

et Professor.

 

41. Aut: Haquinus Andreae Kylander – Aut: Johannes Holm (Oratio in felix novi anni auspicium; quam, /.../ in Regia Academia Gustaviana, quae Dorpati est /.../ 3. die Januarij, anno M.DC.XXXIX. publice/.../ enarrabat Haquinus Andreae Kylander, /.../ - Dorpati Liv., 1639: Typ. acad.)

SKB, UUB, LNB, [Tartu UB]

GRATULATIO

Iuveni Literis moribusque cultissimo

Dn. HAQVINO A. KYLANDRO,

de Novi Anni auspicio publice docteque peroranti,

Amico et Sympatriotae suo peramando.

 

                        Sic Vetus auspiciis felicibus exijt Annus,

                                    Se inque suos gyros motibus astra rotant.

                        Aurea fluxerunt; nostra, in pejora senescunt

                                    Tempora, et adversis obvia cuncta malis.

            5          Undique jactantur mala toxica, fulminat armis

                                    Mars, rabidoque fremit dente cruenta manus.

                        Quid coeli facies? quid hiulca tonitrua frendent?

                                    Vel quid portendunt horrida sceptra soli?

                        Haec tua perpendit lectissima lingua; Lycei

            10                    Unde tua clare pulpita voce sonant.

                        Omnia, quo praesens redeat feliciter Annus

                                    Optas; vis, patriae commoda cuncta fluant.

                        Ulterius gnavum studiis intende laborem,

                                    Sic tibi per Musas fama perennis erit.

JOHANNES Holm / Norcop.

 

42. Adr: Haquinus Andreae Kylander – Aut: Andreas Danielis (cf. 41)

SKB, UUB, LNB, [Tartu UB]

GRATULATIO

                        Navis ut a ventis jactatur in aequore vasto,

                                    Sic Hominum varijs vita repleta malis.

                        Praelia nos torquent, sinuat se multa famesque,

                                    Nostraque tabificus corpora languor habet.

            5          Omnia mirae tuae monstrat facundia linguae, et

                                    HAQVINE, eximie vena diserta probat,

                        Dum felix Anni auspicium per vota precaris

                                    Ut venia admissi criminis ampla siet.

                        O coeptum dextre pergas transmittere cursum,

            10                    Sic tua fama micat, sic tua vita nitet.

ANDREAS DANIELIS, O. Gothia Svec. TH St.

 

43. Adr: Haquinus Andreae Kylander – Aut: Nicolaus Petri Drysander (cf. 41)

SKB, UUB, LNB, [Tartu UB]

GRATULATIO

                        Otia nulla tuis studiis concedis, HAQVINE,

                                    Annum quando notas rite colore novum.

                        Incoeptis insta, Christumque ardenter adora,

                                    Post dulces fructus ferre laboris erit.

NICOLAUS PET. Drysander

Ost-Gothus.

 

44. Adr: Petrus Langius – Aut: Laurentius Ludenius (<Disputatio de> oeconomica: quae, /.../ in Regia Academia Gustaviana, quae Dorpati est /…/ 6. die Februar. anno 1639. /.../ disputationis exercitio, /.../ publice /…/ committebatur, praeside Laurentio Ludenio, /…/ respondente Petro Langio, /.../ - Dorpati Livonorum, 1639: Lit. acad.)

Göttingen UB, [Tartu UB]

GRATULATIO

Praestantiss. et Humaniss. Dn.

RESPONDENTI.

PETRUS LANGIUS;

Per Anagr.

SALUS PINGETUR.

 

                        Alma Domus quacunque SALVS, PINGETVR: Apelles

                                    Alter ades, qvando PINGis id Artis opus.

Quod animitus pr.

LAURENTIUS LUDENIUS

J.U.D. et Professor

 

45. Adr: Petrus Langius – Aut: Adrianus Verginius (cf. 44) Göttingen UB, [Tartu UB]

GRATULATIO

 

                        Qua ratione domus bene sit curanda, volutat

                                    LANGIUS, ut tandem sit bonus Oeconomus.

                        Judice me, LANGI, prudenter talia volvis,

                                    Praebet enim lucrum provida cura domus.

            5          Nec certe exiguam, LANGI, laudem inde reportas,

                                    Quod curanda doces qua ratione domus.

Adrianus Verginius, Julino-

Pomeranus, Eccl. Nügg. Pastor, et

Scholae Senat. Dorp. p.t. Moderator

 

46. Adr: Petrus Langius – Aut: Andreas Sandhagius (cf. 44)

Göttingen UB, [Tartu UB]

GRATULATIO

                        Scitorum Sophiae perite LANGI,

                        Quidni, practica scripta si Sophorum

                        Arrident animo, juvat referre,

                        Clari Principis, aut gravis Senatus

            5          Quae sint munia, quae sient decora?

                        Cur, quaeso, potius lubet, periti

                        Partes, quae Oeconomi sient, docere:

                        De Sponsalibus et novis Maritis

                        Cur conferre magis placet loquelas?

            10        Sortem nempe tuam tenere mavis;

                        Hocque exercitio parare mentem

                        Rebus propediem cupis gerendis,

                        Felix auspicium, precor, gerenti

                        Discentique sit, ut queas probata

            15        Doctis dicere; sis (brevique fias)

                        Felix Oeconomus, bonus Maritus.

Ita ludens vovebam

ANDREAS SANDHAGIUS

Northusanus.

 

47. Adr: Petrus Langius – Aut: Hermann Swemler (cf. 44)Göttingen UB, [Tartu UB]

GRATULATIO

                        Haec tria Thespiadum sensim remorantur alumnos,

                                    Turpis, iners, coecus, crapula, somnus, amor.

                        Haec tria commendant illos et honoribus ornant

                                    Sobria, nava, piae, vota, Minervae, preces.

            5          Otia blanda fugis; Christo Duce, strenue ab imis

                                    Sedibus ad summos niteris ire gradus.

                        Oeconomum ostendis: quondam aurea vellera habebis

                                    Oeconomus quae olim Phasidos ora tulit.

Suo Langio

HERMAN. SWEMLER

 

48. Adr: Petrus Langius – Aut: Andreas Verginius (Mhlšth theologica de melithmšroij prophetae verbis Esa. 53. v. 5. Ipse vulneratus est propter iniquitates nostras, attritus propter scelera nostra: disciplina pacis nostrae super eum, et vibice ejus sanati sumus. Quam /.../ in Regia Livonum /.../ Academia Gustaviana, praeside /.../ Andreae Virginio, /.../ publicae suzht»sej subjicit Petrus Langius, /.../ ad diem < > Martij /.../ - Dorpati Livonorum, 1639: Lit. acad.)                                EAB, [Tartu UB]

GRATULATIO

In Disputationis Materiam.

 

                        Protulit hanc olim perversus Apella loquelam:

                                    Saepius abjicitur mentio clara virum.

                        Qui fit, ut et Jesu crucifixi oblivio vestras

                                    Non capiat mentes? Vox Bovis ista fuit!

            5          Qui capit in coelum transferri talia nunquam

                                    Eructet, prohibent hoc sacra jussa DEI:

                        Crebra Redemptoris potius pia mentio fiat,

                                    Pro nobis siquidem passio facta DEI.

                        Inde jubet Pietas, Lex aequi poscit, ut omnes

            10                    Christiani Christi vulnera sancta notent:

                        Svadet idem fructus, vult hoc aeternaque vita,

                                    Qua Christo speras adveniente frui.

                        Suscipis ergo pium, Langi peramande, laborem,

                                    Dum de morte DEI verba diserta facis.

            15        Sufficiensque lÚtron Christi defendis acute:

                                    Laus erit hic, illic gloria magna tibi.

Lubens adjecit

ADRIANUS VERGINIUS, Julino-

Pomeranus Ecclesiae Nuggensis Pastor

et Scholae Senator. Dorpat. p.t.

Moderator.

 

49. Adr: Petrus Langius – Aut: Hermann Schwemler (cf. 44)     EAB, [Tartu UB]

GRATULATIO

                        Laude supersedeo, nec enim generosa reqvirunt

                                    Vina hederam: utilitas ipsa probabit opus.

Herm. Swemler.

 

50. Adr: Petrus Langius – Aut: Jacobus Lotichius (cf. 44)                      EAB, [Tartu UB]

GRATULATIO

                        Vulnera respiciens Christi svavissime Langi

                                    Dignus laude tuus plausibilisque labor!

                        Innocuus patitur REX Regum, criminis insons,

                                    Quem laqueo fixum serta cruenta premunt.

            5          Insontis peperere TIBI data flagra salutem;

                                    Sana et in illius membra cruore tua.

Amicitiam contestandi gratia

adjecit

Jacobus Lotichius

 

51. Adr: Petrus Langius – Aut: Johannes Kemnitius (cf. 44)                   EAB, [Tartu UB]

GRATULATIO

                        In studio et stadio sancti, mi Petre, laboris

                                    Si pergis, Patriae commoda multa dabis.

                        In studio verae pietatis pergere crebro

                                    Si tendis, fama sidera alta volas.

            5          Perge, tuis laetum cursum conatibus opto,

                                    Ut labor iste tuus, sit brevis atque levis.

f.

Johannes Kemnitius,

Dorp. Livonus.

 

52. Adr: Ericus Petri Lerbeckius – Aut: Laurentius Ludenius (Disputatio philosophica de sensibus internis; quam, /.../ in Regia Academia Gustaviana, quae Dorpati /.../ est sub praesidio /.../ Michaelis Savonii, /.../ pro magisterii philosophici privilegis et immunitatibus consequendis, publicae disquisitioni et  censurae, ad diem <16> Octob. /.../ submittit Ericus Petri Lerbeckius, /.../ - Dorpati Livonorum, 1639: Typ. acad.)

SKB, H, [Tartu UB]

GRATULATIO

Doctissimo et Humanissimo Dn.

RESPONDENTI.

ERICUS PETRI LERBECCIUS

Per Anag.

IS PIUS; ECCE CURRET LIBER

 

                        IS PIVS; ECCE Deo Duce, CVRRET LIBER ab omni

                                    Malo mali discriminis;

                        Pieriis meritum sertis ornabit Apollo,

                                    Lauro volens cinget comam.

Quod in felix auspicium

app.

LAURENTIUS LUDENIUS, Holsat. PH.

et J.V.D. ac Professor Juris, Orat. et Poëseos.

 

53. Adr: Ericus Petri Lerbeckius – Aut: Isacus Sicrenius (cf. 52)

SKB, H, [Tartu UB]

GRATULATIO

                        Qui Sophiae sacris, sudore operatur honesto,

                                    Ipse operam cum spe divite rite locat.

                        Namque sui gnavum cultorem, ponit Honoris

                                    In currum, et clarum tollit Apollo virum.

            5          Dum Mysteria Naturae, <r>imaris acute,

                                    Et passu Sophiae curris eunte viam,

                        LERBECKI, veluti meruit Virtusque laborque

                                    Ecce Comes temet gloria vera manet.

Moris et amoris ergo appos.

M. Isacus Sicrenius Holm.

 

54. Aut: Ericus Matthiae Litorinus – Aut: Johannes E. Stregnenis (Disseratio theologica de bonis operibus, /.../ in Regia Academia Livonum Gustaviana sub praesidio /.../ Andreae Virginii, /.../ publicae ventilationi proposita ab Erico Matthiae Roslagia-Sveco /.../ die 3. <5.> Augusti. – Dorpati Livonorum, 1639: Typ. acad.)

SKB, EAB, [Tartu UB]

GRATULATIO

Praestantissimo atque Doctissimo Viro-Juveni

Dn. ERICO MATTHIAE Roslagia-

Sveco, Philosoph. Cand. Thesium harum

Authori, Fratri et Amico unice dilecto.

 

                        LATONAE PROLES, magnus Crinitus APOLLO,

                                    Per quem concordant singula coepta tua,

                        Ingenij dotes tibi magnas indidit ille,

                                    Vt Musis Sacris pectora nata geras.

            5          Rorantem ingenij curvamine temperat arcum,

                                    Vt vigil<e>s Musis sedulitate sacris.

                        Hinc SOPHIAE spissas sulcasti Vomere arenas,

                                    Obveniant istinc munera magna tibi.

                        Nunc Librum vitae scrutaris pectore laeto,

            10                    Et pia pro Christi nomine bella geris.

                        Qui cupis assertor doctrinae illius haberi,

                                    Perlegis, inque pium lecta reducis opus.

                        Hinc te laude cano, bene te quoque dignor honore,

                                    Dum Studio Sacro praemia summa paras.

Ita gratulari voluit ac debuit

Johannes E. Stregnensis

Philosoph. Cand.

 

55. Adr: Petrus Andreae Schomerus – Aut: Andreas Virginius (Disputatio theologica solennis, de libero arbitrio, tum in genere, tum in specie, Dei, angelorum, diabolorum et hominum, juxta quadruplicem eorundem statum, quam, /.../ in Reg. Acad. Gustaviana, quae Dorpati est praeside /.../ Andreae Virginio,  /.../ pro gradu in theologia summo consequendo, publicae disquisitiorum et censurae submittit /.../ Petrus Andreae Schomerus /.../ ad diem 25. Septembr. /.../ - Dorpati Livonorum, 1639: Typ. acad.)                     SKB, UUB, Växjö LB, H, LAB, EAB, [Tartu UB]

GRATULATIO

Prosfwn»mata

Quibus

Reverendo et Clariss. VIRO
Dn. M. Petro Schomero,

SS. Theol. Candidato, et Profess. in Regia Aca-

dem. GUSTAVIana Ordinar. designato,

Pro Summo in Theolog. gradu publice disputanti,

Gratulantur Collegae et Amici.

 

                        Dum gemino felix ardet SCHOMERUS amore,

                                    Nempe piae Sophiae et Nobilis Eusebiae;

                        In solidum fertur se devovisse duabus,

                                    Nempe piae Sophiae, Nobili et Eusebiae.

            5          Sit felix! solvit simul illis vota duabus,

                                    Dicetur Sophiae DOCTOR et Eusebiae.

 

Aliud.

 

                        Multum divina posuisti tempus in arte;

                                    Hinc inter Doctos nobile nomen habes.

                        Clarus es ingenio; mentis felicia praesens

            10                    Arguit examen dona, SCHOMERE, tua.

                        Te Docti merita cohonestant laude, tibique

                                    Optant ex animo prospera fata, viri:

Queis sua syncero jungit de pecto-

re vota

ANDREAS VIRGINIUS D.

et P.P.

 

56. Adr: Petrus Andreae Schomerus – Aut: Georgius Stiernhielm (cf. 55)

SKB, UUB, Växjö LB, H, LAB, EAB, [Tartu UB]

GRATULATIO

ANAPESTICUM PARTHENIACUM.[12]

 

                                               Qvo te nunc Enthea vasti

                                               Virtus rapit Ingenii, qvo

                                               Veheris, venerande Magister?

                                               Quo scandis, Amice SCHOMERE?

                                 5            Necdum vis sistere cursum?

                                               Tu, qui modo vim Numerorum

                                               Doctae monstrare juventae

                                               Arcanam, et solvere duros,

                                               Nectit quos ALGEBRA, gryphos

                                 10          Magna cum laude solebas;

                                               Et in Artibus ARCHIMEDAEIS

                                               Noctesque diesque sueras

                                               Insumere; Quique figuras

                                               Dextre varias meditari

                                 15          Atque enucleare solebas;

                                               Qui claves candidi Olympi

                                               Tractasti; Qui reserare

                                               Astrorum fata potenter

                                               Terrae impendentia nosti.

                                 20          Qui casus SOLIS et ortus

                                               Numeras, LVNAEque labores.

                                               Cui nota ferocia MARTIS,

                                               Cui MERCVRII astus et error,

                                               VENERISque IOVISque benigni

                                 25          Aspectus, diaque virtus;

                                               Mora SATVRNIque nota omnis.

                                               Quem maximo in aethere nullum

                                               Aut Schema, aut Thema latere

                                               Potuit. Te non satiant haec?

                                 30          Coelos transcendis et Astra.

                                               Tu Solem despicis, Arcton

                                               Superas geminam, rutilorum

                                               Longe volitans super ignes

                                               Astrorum; COELICOLIS TE

                                 35          Dum MENTIBVS insinuare

                                               Pergis; dum mystica curas

                                               Iussa Omnipotentis, et ejus

                                               Patefit tibi sancta voluntas,

                                               Tu caetera deseris; ILLI,

                                 40          Qui Coelos, qui Mare, Terram,

                                               Fabricavit, et omnia, adhaerens,

                                               ILLVM Tu amplecteris VNum,

                                               Studiis dum THEIOLOGIAE[13]

                                               Vigilas; et te speciosis

                                 45          Israelis fontibus abdis.             (Vulg. Ps. 67.27)

                                               Perge, eia, ut pergis, et instant

                                               Non solum Heliconia serta;

                                               Verum et tua tempora cinget

                                               Decus aethereum, decus almum,

                                 50          Decus immortale, quod optas;

                                               Dia redimita Corona

                                               Aeternum frons radiabit.

Ex syncero congratulationis affectu

adpositum a

Georgio Stiernhelm Nob. Sveco,

supremorum in Livonia Judic.

Regiorum Adsessore.

 

57. Adr: Petrus Andreae Schomerus – Aut: Laurentius Ludenius (cf. 55)

SKB, UUB, Växjö LB, H, LAB, EAB, [Tartu UB]

GRATULATIO

M. PETRUS ANDREAE SCHOMERUS.

Per Anag. geminum;

RE MUSAE DECUS; REM PORTANS:
TERRA DECUS MUSAE PROMENS.[14]

 

                        Clare Vir; insignem te Pallas reddidit Arte,

                                    Edocuit felix Eusebia, Vrania.

                        Musae Embecciades Nomen memorabile dicunt,

                                    Re Genij laudes uberiore canunt:

            5          Narrant; RE MVSAE DECVS est, REM pectore PORTANS

                                    Quando salutifero corda lepore creat,

                        Quando sacras Iuvenum dotes cum mente reponit,

                                    Quando voce Bonos instruit, Arte Bonos.

                        TERRA DECVS MVSAE PROMENS est Svecica; PROMENS

            10                    Est MVSAE Levonum TERRA beata DECVS.

                        Sit faustum et felix: Christo Duce et Auspice Christo,

                                    Promeritas Lauru cinget Apollo comas:

                        Et data vivaci decorabunt secula laude,

                                    Dum MVSAE PROMENS Patria TERRA DECVS.

Quod ipsum Collegae suo devene-

rando animitus exoptabat

LAVRENTIVS LVDENIVS,

Holsat. PH. et J.V.D. Profes-

sor Juris, Orat. et Poëseos.

 

58. Adr: Sveno Spinerus – Aut: Nicolaus Olai (Dissertatio theologica de justificatione, /…/ in Regia Academia Livonum Gustaviana, sub praesidio /…/ Andreae Virginii, /…/ publicae ventilationi proposita a /…/ Svenone Spinero /…/ d. 29. Novemb. <7.2.1640>. – Dorpati Livonorum, 1639: Typ. acad.)

SKB, UUB, EAB, [Tartu UB]

GRATULATIO

Claritate, Doctrina et Humanitate conspicuo

Dn. RESPONDENTI.

 

                                    Quid proprium meritum? Infusum quid? Quale et inhaerens?

                                    Num possunt homines haec justificare beate?

                                    Absit. Namque Dei solum nos Gratia salvat;

                                    In merito Christi felix fiducia vivit.

5          Ardua proponens haec dogmata, Clare Magister,

                                    Salvifica illustras animos atque imbuis Arte:

                                    Candidus hinc quondam mirabere limen Olympi.

Honoris et amoris causa gratul. fudit

M. NICOLAVS OLAI Calmariensis.

 

59. Adr: Ambernus Andreae Storch – Aut: Laurentius Ludenius (Oratio de peregrinatione: quam, /.../ in Regia Academia Gustaviana, quae Dorpati est /.../ 13. die Martij anno 1639. publice /.../ enarrabat Ambernus Andreas Storch, /.../ - Dorpati, 1639: Typ. acad.)                                                                     SKB, UUB, [Tartu UB]

GRATULATIO

Doctiss. et Humanissimo Dn.

PERORANTI.

 

Pulcrum est; Mortales peregrinas visere terras,

Et multa a pueris praeter sua littora nosse.

AMBERNE, Eusebiae et Sophiae pulcerrima Pubes,

Sit faustum et felix; Christo Duce et Auspice Christo,

            5          Allicis, ut Boreae extremo damnata sub axe

                        Stagna petam, et rigidis nunquam non cana pruinis;

                        Et Libyae rapidas Austrique tepentis arenas

                        Aspiciam, et nigros populos, Solemque remotum.

                        I bene; quo tua te Virtus vocat, i pede fausto,

            10        Et tua narrentur per totas Nomina terras.

Quod animitus app.

LAURENTIUS LUDENIUS, Holsat.

Ph. et J.V.D. ac Professor.

 

60. Adr: Ambernus Andreae Storch – Aut: Ericus Haquini Bobergius (cf. 59)

SKB, UUB, [Tartu UB]

 GRATULATIO

                        Est pulcrum, fateor, Patriam lustrare paternam,

                                    Et non in matris ponere membra sinu.

                        Pulcrius est multo peregrinas visere terras,

                                    Non semper patrij rura videre soli.

            5          Qui sic? Spectantur domibus decorata superbis

                                    Oppida et ex solido marmore templa sacra.

                        Discuntur mores varij, discuntur et artes,

                                    Virtutis studium crescit et artis amor.

                        Ante o qui timuit maris undas atque procellas,

            10                    Ille audet valida nave secare freta.

                        Qui timuit, cum forti audet certare leone,

                                    Infractoque animo fata subire mala.

                        Hoc, AMBERNE, docet tua nos Oratio docta,

                                    Quam Lector jugi sedulitate leges;

            15        Sic bene percipies, data quod lustratio terrae

                                    Hinc peregrinanti commoda multa ferat.

 

In felicem Abitum et Reditum.

 

O AMBERNE, tibi quae jam sententia surgit?

Vis nunc ad Patrij tendere tecta soli?

                        Non obstare tuis possim conatibus aequis,

            20                    (Fumum ego de patriis opto videre focis).

                        Ergo precor salvus redeas ad tecta paterna,

Et salvus redeas. Frater amande, redi.

Honoris, amoris et moris ergo scripsit

ERICVS HAQVINI BOBERGIVS,

W. Gothia Svecus.

Ill. et Gen. Dn. An. Cr. H. Gub.

Rig. Liv. stipend.

 

61. Adr: Ambernus Andreae Storch– Aut: Ambernus Laurentii Muraeus (cf. 59)

SKB, UUB, [Tartu UB]

GRATULATIO

O AMBERNE, mihi cognato sangvine juncte,

Exponis miro facundae munere lingvae,

Quae fiet utilitas, multum telluris obire,

Nec non fluctivagum conscendere navibus aequor.

            5          Non ignota refers: nam te duxit tua virtus,

                        Per varias terras, atque aequora concita ventis,

                        Queis ita lustratis, patrios jam vise Penates.

                        Te DEus astripotens comitetur, coepta secundet,

                        A cervice tua propellat fata maligna.

Quod animitus precatur

AMBERNUS LAURENTII MURAEUS,

W. Gothia Svecus.

 

62. Adr: Ambernus Andreae Storch – Aut: Petrus Caroli Undenius (cf. 59)

SKB, UUB, [Tartu UB]

GRATULATIO

                        In Sophiae multum sudas, AMBERNE, vireto

                                    Phoebi subsidio, Palladis auxilio.

                        More vel ursorum fingis lingisque cerebri

                                    Foetus atque favos, Numinis auspicio:

            5          Dum peregrinantum varios profare labores,

                                    Ostendis fructus deliciasque simul.

                        Laus ea permagna est, varias invisere terras:

                                    Et non in patrijs usque latere focis.

                        Sic perge, ut pergis, Clarijs ornate Camoenis

            10                    AMBERNE, et Phoebus praemia laura dabit.

                        Quod superest, sine fine precor; Moderator Olympi

                                    Te salvum in patriam promoveat reducem.

                        Hoc precor. Hoc capias synceri pignus amoris:

                                    Vtere successu prosperiore. VALE.

In tesseram syncerae amicitiae et fra-

ternitatis deproperabat

PETRVS CAROLI VNDENIVS,

W.-Gothus S.

 

63. Adr:  Petrus Caroli Undenius – Aut: Ericus Haquini Bobergius (Oratio de ira; quam, /.../ in Regia Academia Gustaviana, quae Dorpati est /.../ die 11. Maji, anno 1639. publice /.../ enarrabat Petrus Caroli Undenius, /.../ - Dorpati Livonorum, 1639: Typ. acad.)                                                       SKB, UUB, Växjö LB, [Tartu UB]

GRATULATIO

Eruditione et moribus Ornatissimo Iuveni,

Dn. PETRO CAROLI UNDENIO

erudite et diserte de IRA peroranti, Amico

suo syncere dilecto.

 

                        Irarum multi volvunt sub pectore fluctus;

                                    Sed pauci, vere, quid siet Ira, sciunt.

                        At tu, PETRE, sacrae decus immortale Camoenae,

                                    Nestorea lingua, quid siet Ira, doces!

            5          Affectus alios proprio sic pinge colore;

                                    Et surgent rerum commoda multa tibi.

Ericus Haquini Bobergius, W. G. S.

 

64. Aut: Sequardus Olai Wallander – Ericus Haquini Bobergius (Oratio de felicitate: quam, /.../ in Regia Academia Gustaviana, quae Dorpati est /.../ die 27. Aprilis, anno 1639. /.../ publice habebat Segvardus Olai Wallander, /.../ - Dorpati Livonorum, 1639: Typ. acad.)                                                         SKB, Växjö LB, H, LAB,[Tartu UB]

GRATULATIO

Humanissimo et Literatissimo Peroranti

Dn. SEGVARDO OLAI WALLAN-

DRO WW-Gothia S. Amico suo

syncere dilecto;

 

                        Perge Bonum Summum vigilanti quaerere cura,

                        Illius et laudes Ornatis dicere verbis,

                                                            Tempus in omne tuum.                                                            Hinc tibi surget honor longo durabilis aevo,

            5          Atque favente Deo, perdulcia gaudia, nullo

                                                            Emoritura die.

Ita gratulari debuit ac voluit

ERICUS HAQVINI BOBERGIUS

W. Gothia S.

 

65. Adr: multi (Magnificis /.../ viris in /.../ Republica Rigensi Patribus Patriae Dn. Burgravio, consulibus, syndico, senatoribus, mecoenatibus et promotoribus suis /.../) – Aut: Jacob Friedenreich (Dissertatio theologica de Deo in essentia uno, et in personis trino. Quatuor dictorum classicorum. Ex Deuteron. 6. v. 4., Psalm. 33. v. 6., Matth. 28. v. 19., 2. Corinth. 13. v. 13. ¢n£lusin; et praecipuorum erotematum x»gesinexhibens in Regia Academia Dorpatensi publicae censurae subjicietur praeside Andrea Viriginio /.../ respondente Jacobo Friederich /.../ d. < > April. /.../ - Dorpati Livonorum, 1639: Lit. acad.) (cf. 18)                   H, EAB, [Tartu UB]

DEDICATIO

 

                        Evnomiae et Themidos Columen, venerande Senatus,

                                    Delicium Patriae, Praesidiumque Bonis:

                        Multa equidem, fateor, Vobis ego debeo; Verum

                                    Non est solvendo nostra Thalia, scio.

            5          Fecero, quod possum: ceu possum, mitto tenellum

                                    Hoc scriptum. Faveat deliciosa Fides;

                        Si dabitis promptas sumpto in conamine vires;

                                    Vivite felices, vivite et incolumes.

Devote precatur

et exercitium hoc Theolog.

in Debiti honoris ac gratitudinis arrham

D. O. C.

JACOBUS FRIEDERICH

Respondens.



[1] Esto : S calamo additum -que

[2] pericla D metri causa

[3] dixti edd metric causa

[4] dixti edd metric causa

[5] dixti edd metric causa

[6] dixti edd metric causa

[7] repostum  H metri causa

[8] V. 11-21 deletum in U

[9] V. 45-54 deletum in U

[10] pocla  H U metri causa

[11] Cf. in SKB et UUB Oratio de liberalitate: quam, /…/ in Regia Academia Gustaviana, quae Dorpato est /…/ die < > Maij, anno 1640. publice /…/ enarrabat Johannes Jonae Carolstadius, /…/. – Dorpati Livonorum, 1640: Lit. acad. Argumentum idem et gratulationes eaedem.

[12] Cf. Samlade skrifter av Georg Stiernhielm. Utgivna av Johan Nordström ach Bernt Olsson. In: Svenska Författare utgivna av Svenska vitterhetssamfundet VIII. Första delen, andra bandet, fjärde häftet. Lund: Bloms Boktrykeri AB 1987, Editio 170-172, Commentarium 589-590.

[13] THEIOLOGIAE edd metri causa

[14] Anagrammata non recte constructa