1640

 

1. Adr: Andreas Danielis – Aut: Laurentius Ludenius (Disputatio physica de morte: quae, /.../ in Regia Academia Gustaviana, quae Dorpati est /.../ die 8. Julij, anno 1640. publice /.../ disputationis exercitio committebatur, praeside Laurentio Ludenio, /.../ respondente Andrea Danielis, /.../ - Dorpati Livonorum, 1640: Lit. acad.)

SKB, H, BRAN, [Tartu UB]

GRATULATIO

Doctissimo et Humanissimo Dn. [1]

RESPONDENTI.

ANDREAS DANIELIS,

Per Anag.

ARDENS ADIS LENIA.

 

                        Sic memor, ANDREA, fati Mortisque futurae,

                                    LENI ARDENS animo LENIA dexter ADIS.

                        Paulatim emorimur, momenta extingvimur uno;

                                    Hoc animis volvens LENIA semper ama.

Quod g. app.

LAURENTIUS LUDENIUS,

J.U.D. et Professor.

 

2. Adr: Andreas Danielis – Aut: Johannes Holm (cf. 1) SKB, H, BRAN, [Tartu UB]

GRATULATIO

                        Aspera sunt rebus DAmnosae tormina mortis,

                        Causa Necans tumidis quae occulta meatibus Abdit.

                        Publicat AnDreas causas, evellEre duras

                        NItitur, expositis Radiatas arte figurIS.

            5          Ardua plana Dolas, discursibus Eruis uncos

                        Laus Ne’ est? mensuret rectae rationis Amussis.

                        Asperae inflatis vELis tua carbasa virtuS.

Mihi conjunctissimo hilari et fideli animo g.

JOHANNES Holm / Norcopens.

 

3. Adr: Andreas Danielis – Aut: Petrus L. Schonbergius (cf. 1)

SKB, H, BRAN, [Tartu UB]

GRATULATIO

                        Qvolibet puncto, velut umbra, corpus

                        Morbidum nostrum sequitur subinde;

                        Mors ita et nosmet comitatur ipsos

                                                            Falce secante.

            5          Dic quis hoc secum reputet virorum?

                        Foeminae, et vitam cupiunt senilem

                        Virgines comptae, simul ac Alumni,

                                                            Nestoris annos.

                        Singulis mens est eadem, voluntas

            10        Vna vivendi. Morieris autem

                        Foedus antiquum est; memorare pauci

                                                            Fata laborant.

                        ANDREA, sed tu venientis horam

                        Mortis evolvis, refricasque causas

            15        Abditas: Te ergo celebrare pergit

                                                            Musicus ordo.

                        Abditas causas aperire perge

                        Mortis; Et mortis numera recessus:

                        Sic tibi nunquam veniet nociva

            20                                            Parca futura.

Fratri et contubernali suo dilecto

ita gratulari voluit

Petrus L. Schonbergius,

Ost-Gothia Svecus.

 

4. Adr: Ericus Haquini Bobergius – Aut: Laurentius Ludenius (Disputatio practica de turbulentorum directione: quae, /.../ Regia Academia Gustaviana, quae Dorpati est /..../ 26. die Septembris /.../ anno 1640. publice /.../ disputationis exercitio committebatur, praeside Laurentio Ludenio, /.../ respondente Erico Haquini Bobergio, /.../ - Dorpati Livonorum, 1640: Typ. acad.)                           Västerås StB, [Tartu UB]

GRATULATIO

Doctissimo et Humanissimo

Dn. RESPONDENTI.

ERICUS HAQVINI BOBERGIUS:
Per Anag.

HOC QVIA IN RE SUBIBIS: URGE.

 

                        Artis opus, formare animos bene pacis ad usum,

                        Ne ferrum excussis egeant vibrare lacertis!

                        HOC IN RE pulcrae Artis opus QVIA, Erice, SVBIBIS,

                        Per Veterum, ut fieri possit, praecepta reponens;

            5          VRGE HOC Artis opus: Christo Duce et Auspice Christo,

                        Sic genus humanum positis sibi consulet armis.

Quod animitus ap.

LAURENTIUS LUDENIUS,

PH. et J.U.D. ac Professor.

 

5. Adr: Ericus Haquini Bobergius – Aut: Ericus Lerbeckius (cf. 4)

Västerås StB, [Tartu UB]

GRATULATIO

                        Fortiter Aonijs pergens vigilare Camoenis,

                        Assiduaque manu pervolvere scripta Sophorum,

                        Augustum nomen magnam laudemque meretur.

                        Recto, BOBERGI, contendis tramite ad ista.

            5          Dum pulcrae instillas morum praecepta Juventae,

                        Et quod sit litis moderamen disseris apte:

                        Fortiter Aonijs perge invigilare Camoenis,

                        Assiduaque manu pervolvere scripta Sophorum,

                        Augustum hinc nomen, magnamque merebere laudem.

Lubens apposuit

M. Ericus Lerbeckius

 

6. Adr: Ericus Haquini Bobergius – Aut: Ambernus Andreae Storch (cf. 4)

Västerås StB, [Tartu UB]

GRATULATIO

Optant Parnassi conscendere culmina montis,

Nititur Aoniis invigilare choris;

Hoc quia, ERICE, facis rata per praecepta, BOBERGI,

Defendendo tuas dexteritate theses;

            5          Gratulor hoc studium sincero e mentis amore,

                                    Perge Aganippaeo fonte rogare caput.

                        Sic tibi, dum sanus vitali vesceris aura,

                                    Laurigerae Musae praemia grata dabunt.

Gratulab. apposuit

AMBERNUS ANDREAE Storch

 

7. Adr: Ericus Haquini Bobergius – Aut: Petrus Jonae Bock (cf. 4)

Västerås StB, [Tartu UB]

GRATULATIO

Invigilans studijs est dignus honore futuro,

Et docti poterit nomen habere viri.

Illud, ERICE, facis doctrina ornate, BOBERGI,

Quando tuere graves dexteritate theses.

            5          Perge bonis avibus; Christo Duce et Auspice, perge

                                    Excolere ingenium sedulitate tuum;

                        Sic poteris gratam studiorum tangere metam,

                                    Et magnum inde tibi surget in orbe decus.

Amica manu et mente apposuit

PETRUS JONAE Bock /

Carolstadius.

 

8. Adr: Petrus Jonae Bock – Aut: Ericus Haquini Bobergius (Oratio de nativitate Domini et Salvatoris nostri Jesu Christi; quam, /.../ in Regia Academia Gustaviana, quae Dorpati est /.../ 24. Decemb. anno 1640. publice /.../ enarrabat Petrus Jonae Bock, /.../ - Dorpati Livonorum, 1640: Lit. acad.)

SKB, UUB, Växjö LB, Karlstadt StB, H, [Tartu UB]

GRATULATIO

Doctrina, Pietate et Humanitate Ornatissimo

Dn. PERORANTI,

PETRUS JONAE.

Per Anagr.

NAE, JUS PETRO.

 

                        NAE, sacrum PETRO JUS traditur: ille beate

                                    Enarrat Christum pura de Virgine nasci.

Animo et Calamo ita gratulatur

ERICUS HAQVINI Bobergius, W-Gothus.

 

9. Adr: Johannes Bussmann – Aut: Laurentius Ludenius (Disputatio theologica, de peccato, quam in Regia /.../ Academia Gustaviana, publicae censurae /.../ proponebat sub praesidio /.../ Andreae Virginii, /.../ respondens Johannes Bussman, /.../ die 30. Septembris habita. – Dorpati Livonorum, 1640: Typ. acad.)

Kalmar StB, EAB, [Tartu UB]

GRATULATIO

Doctissimo et Humanissimo

            Dn. RESPONDENTI.

JOANNES BUSSMAN:

Per Anag.

I BONUS, ME SANANS.

 

                        Eva nocens, vetitum decerpsit ab arbore pomum,

                                    Et mundo quodvis intulit inde malum.

                        Verum Christus adest; peccati mole gravatos

                                    SANat, et aeterno gratia fonte fluit.

            5          I BONUS o felixque, mihi Dulcissime Jesu,

                                    ME SANANS vitae crimina tolle meae.

Quod in felix omen accin.

LAURENTIUS LUDENIUS

Ph. et J.U.D. ac Professor.

 

10. Adr: Johannes Bussmann – Aut: Abel Lyre (cf. 9) Kalmar StB, EAB, [Tartu UB]

GRATULATIO

O pudeat causam peccati dicere, Summum,

CALVINE, esse Deum: Pagina sacra negat.

                        BVSMANNIque negat bene Concertatio idipsum,

                                    Quae praesens multum commoditatis habet.

            5          Ergo animum, CALVINE, tuum, sustollere cessa,

                                    Propositum certe res negat ipsa tuum:

                        Atque elisa nihil poterunt tua tela nocere;

                                    Aeterni Verbum permanet usque DEI.

                        Hinc, BVSMANNE, tuas pulcras cantavero laudes;

            10                    Et studio sacro praemia digna feres.

L. Mque apposui

ABEL LYRE, W-Gotha,

Svecus

 

11. Adr: Johannes Bussmann – Aut: Johannes Petrus <Juncopensis> (cf. 9)

Kalmar StB, EAB, [Tartu UB]

GRATULATIO

Nunc, BUSMANNE, tibi laudemque decusque mereris,

Et facis officij munia sancta tui.

Nam fidei articulos docte modo noscere pergis,

Causas peccati discutis egregie.

            5          Gratulor, et pleno rata commoda ego apprecor ore,

                                    Dum sub VIRGINIO bella sacrata geris.

                        Perge, velut pergis, sic te dignamur honore,

                                    Et Deus auxilio stante levamen erit.

In fraterni amoris et syncerae necessitudinis

testificationem, conterraneo et fratri

suo faciebat

Johannes Petrejus Juncop.

Svecus, LL. Stud.

 

12. Adr: Andreas Petri Folchov – Aut: Ericus Petri Lerbeckius (Oratio de pace: quae, /.../ in Regia Academia Gustaviana, quae Dorpati est /.../ die 1. Julij, anno 1640. publice /.../ habebatur ab Andrea Petri Folchovio, /.../ - Dorpati Livonorum, 1640: Typ. acad.)                                                         SKB, Växjö LB, H, LAB, [Tartu UB]

GRATULATIO

Doctrina et Moribus Politissimo

Dn. PERORANTI.

 

Dum ruit in pugnas devoti sangvinis aetas,

Tormenta et lituus classica dira canunt.

Victricis Palmae, ANDREAS, succensus amore est,

Impatiens otii,[2] bella novella ciet;

5          At non Martis; Musarum sed castra revisit,

Militat inque ipsis fortiter armipotens.

                        Verba ubi pro telis volitant de ponte Cathedrae,

                                    Non agitur res vi sulphureisve globis.

                        Perge hinc, Folchovi, Musarum castra revise,

            10                    Victor et in bello praemia lauta refers.

Animo gratul. apposuit

M. ERICVS PETRI LERBECKIVS.

 

13. Adr: Andreas Petri Folchov – Aut: Carolus Valeriani (cf. 12)

SKB, Växjö LB, H, LAB, [Tartu UB]

GRATULATIO

Nulla fides mundo; PAX bello lassa laborat,

Tempora temporibus vix bona mista malis.

AUREA fluxerunt, ARGENTEA, et AENEA; torvo

FERREA Marte strepunt, horrida bella tonant.

            5          Sic Pax crudeli mactatur sangvine; durum

                                    Vivendi seclum; vivere nulla salus.

Paucula haec moris et amoris ergo

apposuit

CAROLVS VALERIANI,

Nycopia Svecus.

 

14. Adr: Johannes G. Gezelius – Aut: Andreas Virginius (Disputatio theologica, in caput primum a v. 15 usque ad finem D. evangelistae Johannis selectissimas notas exhibens in Regia Academia Dorpatensi publicae censurae subjicietur praeside Andrea Virginio, /.../ respondente Johanne G. Gezelio /…/ d. <21.> IX br /…/ - Dorpati Livonorum, 1640: Typ. acad.)                                    SKB, BRAN, [Tartu UB]

GRATULATIO

Literatiss. et Humaniss.

Dn. RESPONDENTI.

 

                        Noster Virginea Christus Puer editus alvo,

                                    Majestate DEVS, Carneque verus Homo.

                        Temperies sacra Justitiae est Bonitatis et Almae;

                                    GEZELI, credens usque Beatus eris.

ANDREAS VIRGINIUS, Nob. Pom.

Haered. in Schweßien / SS. Theol. D. et Prof. pri-

mar. nec non Proto-Synedrij Adsess.

 

15. Adr: Johannes G. Gezelius – Aut: Laurentius Ludenius (cf. 14)

SKB, BRAN, [Tartu UB]

GRATULATIO

JOHANNES GEORGII GEZELIVS;

Per Anagr.

HIS O IN ZONA EGREGIVS, ELIGE.

 

                        HIS O IN ZONA EGREGIUS, Christum ELIGE, coeptis!

                                    Et vitam in media morte videre datur.

Quod in felix omen ap.

LAURENTIUS LUDENIUS,

PH. et J.U.D. ac Professor.

 

16. Adr: Johannes G. Gezelius – Aut: Olaus G. Salenius (cf. 14)

SKB, BRAN, [Tartu UB]

GRATULATIO

                        Natales Christi pergit narrare Johannes,

                                    Illa Aquila aethereo rite sacrata Deo.

                        Haec et rimaris mysteria, dulcis Amice

                                    GEZELI, merito gratulor inde tibi.

            5          Apprecor, aeternus Deus ut tua coepta secundet,

                                    Sic Ecclesiolae sic Patriaeque Bonus.

                        Donum exantlato virtus sudore refundit,

                                    Laus manet in terris, Gloria in arce Poli.

OLAUS G. SALENIUS, Wesmannia

Svecus, Pastor in Ringen.

 

17. Adr: Johannes Gutslavus – Aut: Jacobus Lotichius (Disputatio theologica de auctoritate et origine SS. Scripturae: quam sub praesidio /.../ Andreae Virginii, publicae disquisitioni submittit Johannes Gutslavus /.../ Habita ad diem < >Augusti /.../ - Dorpati Livonorum, 1640: Typ. acad.)                          UUB, EAB, [Tartu UB]

GRATULATIO

Ad Praestantissimum et Literatiss. Dn.

RESPONDENTEM.

 

                        Heus! Sophiae mera adorea; Christiadosque dulce robur

                                    Salutis! Ecquid nostra quit Thalia?

                        Quid quaeso valeat sterilis dare? Quippe crena spisse

                                    Stillat; nec est, quo gratulor petenti.

            5          Macte Novenfilium, bene macte sororum alacritate!

                                    Non indigent praeconio probata.

                        Nec suadent hederae mercarier optimum Lyaeum:

                                    Sua Bonum virtute quodque splendet.

JACOBUS LOTICHIUS.

 

18. Adr: Jacobus Lotichius – Aut: Adrianus Verginius (Oratio de musica: quam, /.../ in Regia Academia Gustaviana, /.../ die 4. Jan. anno 1640. /.../ enarrabat Jacobus Lotichius, /.../ - Dorpati Livonorum, 1640: Typ. acad.)

SKB, LAB, London BL, EAB, [Tartu UB]

GRATULATIO

MUSICA

Per Anagr.

AMICUS.

 

                        Mvsica res grata est, fidus quoque gratus Amicus:

                                    Musica nos mulcet, fidus Amicus amat:

                        Est homo inhumanus fidum qui spernit Amicum;

                                    Artem cantandi qui fugit, ille furit.

            5          Musica tristitiam suavi modulamine pellit,

                                    Quam quoque colloquio, dulcis Amice, fugas.

                        Sint in honore igitur sacra Musica, fidus Amicus.

                                    Musica, te veneror; Lotichiumque colo.

 

Symb.

 

                        Mea       Vnica               Spes       Iesus       Christus,        Amen

            10        Mein    Vertrawen   Steht  In       Christum   Allein.[3]

 

ADRIANVS VERGINIVS

Julino-Pomeranus, Ecclesiae Nügg.

Pastor.

 

19. Adr: Jacobus Lotichius – Aut: Martin Faxelius (cf. 18)

SKB, LAB, London BL, EAB, [Tartu UB]

GRATULATIO

                        Haud laus exigua est, sua labra rigasse liquore

                                    Aonio: dum dat Musa perenne decus.

                        Hinc o Mercurij soboles, Jacobe, mereris

                                    Laudem, te quando Musica Musa beat.

            5          I bene quo tua te Musa et tua Musica pleno

                                    Ore vocant: nam te, Musica, Musa beant.

Ita amico suo synceri dile-

cto gratulari voluit

M. Martinus Faxelius

Nerichia-Svecus.

 

20. Adr: Jacobus Lotichius – Aut: Hermann Schwemler (cf. 18)

SKB, LAB, London BL, EAB, [Tartu UB]

GRATULATIO

                        Lotichi Sais est mei canenda,

                        Quamvis invidiae malum timendum.

                        Est Cantor bonus, est bonus Poëta,

                        Ex qua re patet hoc? loquuntur illud

            5          Scripta haec, quae numeros sonant sonoros:

                        Hinc cantu superat beatiore

                        Vatem Threicium, lyra Catullum.

                        Sic virtute decus pie paratur,

                        Et mentis viget altae acumen altum.

            10        Non quid Marculus, aut Thraso bilinguis,

                        Nec quid praepediet procax venenum

                        Humani labii, nec Atrocopta?

                        Quamvis invidiae malum timendum,

                        Lotichi Sais est mei canenda.

Herman Swemler.

 

21.  Adr: Benedictus Johannis Medenius – Aut: Laurentius Ludenius (Discursus politicus de regno: qui , /.../ in Regia Academia Gustaviana, quae Dorpati est /.../ die 21. Nov. anno 1640. publice /.../ disputationis exercitio committebatur, praeside Laurentio Ludenio, /.../ respondente Benedicto Johannis Medenio, /.../ - Dorpati Livonorum, 1640: Typ. acad.)                                                 EAB, [Tartu UB]

GRATULATIO

Doctissimo et Humanissimo Dn.

RESPONDENTI.

BENEDICTUS JOHANNIS MEDENIUS;

Per Anag.

INSUNT: DOMINE JHESU, BENEDICAS.

                        Ingenio, Benedicte, INSUNT pulcerrima dona;

                        Mi DOMINE o JHESU, BENEDICAS omnibus, opto.

Ex animo ap.

LAURENTIUS LUDENIUS,

PH. et J.U.D. ac Professor.

 

22. Adr: Benedictus Johannis Medenius – Aut: Esbernus Leiman (cf. 21)

EAB, [Tartu UB]

GRATULATIO

                        Praeside dum Claro pergis moderamina rerum,

                        Progressus causas, diri interit usque docere,

                        MEDENI, dilecte pia probitate Sodalis:

                        Augusta exopto CHRISTINA, et Martia proles

            5          Nobilis, ac fama multas memoranda per oras;

                        Sceptra Atavorum hinc Arctoique potentia Regna

                        Vsque beet, populum exornet, belloque triumphet,

                        Relligio vigeat; soevi formidine Martis,

            Per mare, per terras, pro arisque focisque timendas

10        Constringat gentes, superet juvenesque senesque.

            Tuque decus Musae, BENEDICTE, Cacumina perge

            Ardua Musarum, stabili transcendere nisu;

            Patrono sic charus eris, Patriaeque, tuisque.

Quod ipsum animitus

vovet

Esbernus Leiman

Roslagia-Svecus.

 

23. Adr: Laurentius Olai Morenius – Aut: Petrus Caroli Undenius (Oratio de salvifica Dei agnitione: quam, /.../ in Regia Academia Gustaviana, quae Dorpati est /.../ 31. Martij, anno 1640. /.../ publice /.../    enarrabat Laurentius Olai Morenius, /.../ Dorpati, 1640: Lit. acad.)                                 SKB, UUB, Karlstadt StB, H, LAB, [Tartu UB]

GRATULATIO

Doctrina et moribus Ornatissimo

DN. PERORANTI.

 

                        Sunt multis cordi simulachra et inania saxa,

                                    Quae semper summa sedulitate colunt.

                        Sed tibi, MORENI, cordi sunt jura Tonantis,

                                    Quem colis ex animo, pectore et ore pio:

            5          Illum etenim doctae describis flumine lingvae,

                                    Quod Monas aeternum et sit Trias una, doces.

                        Perge, velut pergis; Summi Regnator Olympi

                                    Adjuvet auxilio grande laboris opus.

Petrus Caroli Vndenius W-Gothus

 

24. Adr: multi (N. Rubenio /.../, E. Pavlino /.../,P. Pavlino /.../, P. Pavlino /.../, M. Pavlino /.../, B. Jacobi /.../, J. Jonae /.../, P. Pavlino /.../, E. Pavlino /.../) – Aut: Josephus Paulinus (Oratio de veritate: quae, /.../ in Regia Academia Gustaviana, quae Dorpati est /.../ die 8. Februarij, anno 1640. publice /.../ habebatur a Josepho Paulino, Ulsbecki Sveco. – Dorpati Livonorum, 1640: Lit. acad.) (cf. 51-52)

SKB, Växjö LB, H, [Tartu UB]

DEDICATIO

Egregie dixit Cicero, dum talia dixit:

Quamvis non possint aequales cuique referri

Grates; ipse animus tamen has retulisse laboret.

Hoc ipsum quoties memori sub mente revolvo,

5          Nil magis exopto, meritas quam solvere grates,

                        Quod memet placide primis ornastis ab annis

                        Officio, pietate gravi, probitateque sancta.

                        Sed non aequivalens possum persolvere, praesens

                        Integra dum vita est, dum currunt stamina et aevi:

10        Ipse tamen quicquid potero fecisse studebo;

                        Cumque meis obstet votis angustia rerum,

                        Pignoris ipso loco chartas has rite reponam.

                        Sint animi grati pia tessera, sponsio honoris.

                        Accipitote, precor, parvi munuscula census;

15        Nec quae sint, sed quae donantur mente, notate.

                        Vivite felices; Christo Duce, vivite dextre,

                        Atque meis studiis coeptisque favete: Valete.

Debiti honoris et amoris gratia,

reverenter et amanter

D.D.D.

Josephus Paulinus,

Ulsbeckia-Svecus.

 

25. Adr: Andreas Sandhagen – Aut: Jacobus Lotichius (Disputatio theologica, in caput primum usque ad v. 15. D. evangelistae Iohannis selectissimas notas exhibens, in Regia Academia Dorpatensi publicae censurae subjicietur praeside Andrea Virginio, /.../ respondente Andrea Sandhagen, /.../ d. < > Julij, /.../ - Dorpati Livonorum, 1640: Typ. acad.)                                             BRAN, [Tartu UB]

GRATULATIO

SCAZON

Ad Praestantissimum et Literatissimum

Dn. RESPONDENTEM.

 

                        Triariorum, Lauriger, Camoenarum;

                        Spretor Vacunae, Murciaeque torpentis;

                        Invicte, SANDHAGI, Nepos Agonij.

                        Nondum labos reflectit artis augmenta?

            5          Nondum impigrum fatiscit atque macrescit

                        Conamen? o grande; Entheumque Conamen!

                        Dum faustiter fastigia alta metaris;

                        Dum Codicum seclusa Dia Diorum

                        Excudis; Et Mysteria abdita (Herois

            10        Norma ex amussatim docente VIRGINI[4])

                        Recludis: o grande Entheumque Conamen!

                        Praesto Sophi turmae! Caterva sit praesto

                        Dirum Sophistarum! Plicisque contorta

                        Vaferrimis, pangant aprica praecepta;

            15        Pangant apricum Dogma fraude mellitum;

                        Vel frendeant: Victi tamen labascentes

                        Balbutient, quod naevulus nec in toto

                        Hoc corpore ullus sit videre SANDHAGI.

                        Sic pulcra laudis caepta rite sectare,

            20        SACRIS SACRATUM PECTUS! Astra calcabis.

Q.  Ominor

JACOBVS LOTICHIVS.

 

26. Adr: Johannes Magni Silerus – Aut: Laurentius Ludenius (Disputatio physica de motu corporis naturalis in genere: quam, /.../ in Regia Academia Gustaviana, quae Dorpati est /.../ disputationis exercitatio; 25. die April. anno 1640. /.../ praeside Laurentio Ludenio, /.../ publice proponebat author et respondens Johannes Magni Silerus, /.../ - Dorpati Livonorum, 1640: Typ. acad.)                   SKB, H, [Tartu UB]

GRATULATIO

Praestantiss. et Humaniss. Dn.

RESPONDENTI.

JOHANNES MAGNI SILERUS;

Per Anagr.

EN SOL IN MAGNIS VEHARIS.

 

                        EN SOL IN MAGNIS rebus per secla[5] VEHARIS;

                                    Tuque pio Motu crescere, totus ames.

Ex animo g.

LAURENTIUS LUDENIUS,

PH. et J.U.D.

 

27. Adr: Ambernus Andreae Storch – Aut: Ericus Haquini Bobergius (Oratio funebris, in /.../  obitum /.../ Nicolai Ionae, /…/ Johannis Ionae, /…/ Danielis Ionae Rödingiorum, Fratrum;  /.../ Jonae Nicolai Oriensulani, Wermelandensium, Wasboensium atque Walhaerensium superintendentis /…/ ecclesiae Christi, quae Mariaestadij, nec non in Vlerffwa colligitur, pastoris /.../ filiorum /.../ 13. die Aprilis, anno 1639. in lacu Wäner, /.../ vitam cum morte commutantium; /.../ conscripta; et in Regia Academia Gustaviana, quae Dorpati est /…/ 19. Decemb. anno 1639. publice /.../ recitata ab Amberno Andreae Storch, Mariaestadio, W-Gothia S. – Dorpati, 1640: Lit. acad.)                                                            SKB, UUB, Karlstadt StB, Tartu UB

GRATULATIO

 

Doctissimo et Humanissimo

Dn. PERORANTI.

 

                        Heus, AMBERNE, sacrae decus immortale Camoenae,

                                    Poeonij et nostri portio pulcra chori,

                        Anxia cur moesto repetis suspiria Corde; et

                                    Triste sonat qvicquid triste sonare potest?

            5          Ah! stas in Cathedra, magna praesente caterva,

                                    Atque refers qverulis fata inopina modis!

                        Qva Mariaestadium nunc Vrbs pulcerrima surgit,

                                    Ah! Superintendens funera trina gemit!

                        NICLAI, IANI, DANIELIS funera! chara

            10                    O prolis deflet funera facta suae!

                        Quos Iuvenes Pietas, Bonitas ornavit et Aequum,

                                    In Wäner (miserum) succubuere lacu!

                        Flet Pater et Mater, Fratres et sangvine juncti!

                                    Flet pietas, probitas; flet veneranda Themis!

            15        Sic hominum multis interlita vita periclis,[6]

                                    Et propero casu quae valuere ruunt!

                        Sed Mors vitae hujus, vitae est coelestis origo;

                                    Mortuus hinc seclo,[7] vivit in axe poli.

                        Sic fuit aeterni Patris veneranda voluntas,

            20                    Esse occulta potest, justa sed usque manet.

                        Ergo vos flentes, tristem deponite luctum,

                                    Fratrum Triga tenet Fulgida tecta poli.

Qvod Condolentiae Causa apposuit

                        ERICVS HAQVINI BOBERGIVS

W-Gothus, Nob. et Gen. Dn. And. Er. N.

Gub. Reg. Rig. Stipendiarius.

 

 

28. Adr: Ambernus Andreae Storch – Aut: Laurentius Ludenius (Disputatio de usu divitiarum: quae, /.../ in Regia Academia Gustaviana, quae Dorpati est /.../ die <19.> Septembris, /.../ anno 1640. publice /.../ disputationis exercitio committebatur, praeside Laurentio Ludenio, /.../ respondente Amberno Andreae Storch, /.../ - Dorpati Livonorum, 1640: Typ. acad.)                                        Västerås StB, [Tartu UB]

GRATULATIO

Doctissimo et Humanissimo

Dn. RESPONDENTI.

AMBERNUS ANDREAESTORCH:

Per Anag.

REM TENDAS; ANCHORA REBVS.

 

                        Ne nimiis mentem congesta pecunia curis

                        Strangulet; usque tamen bene clausum ditior arca

                        Possedisse Iovem et census patrimonia possit;

                        Macte, AMBERNE, animis; REM Christo Praeside, TENDAS.

            5          Ne sit Possessor congesto pauper in auro.

                        Quos ex foecundis fructus quis colligit agris,

                        Illis utatur recte; non ANCHORA REBVS

                        A Christo aut poterit donari copia major.

Quod grat. apponebat

LAURENTIUS LUDENIUS,

PH. et J.U.D. ac Professor.

 

29. Adr: Ambernus Andreae Storch – Aut: Ericus Haquini Bobergius (cf. 28)

Västerås StB, [Tartu UB]

GRATULATIO

                        Est vitium foedum, nimium corradere nummos,

                                    Et veluti summos magnificare Deos;

                        Non minus est vitium, nimium profundere nummos,

                                    Et veluti Genios postposuisse malos;

            5          In medio est virtus vitio distincta ab utroque,

                                    Quae referenda refert, quaeque tenenda tenet;

                        Hanc, AMBERNE, velut colis excole: Dives erisque

                                    Et tua fama petet sydera celsa poli.

Festinante Calamo et grato animo adscripsit

Ericus Haquini Bobergius, W-Gothus.

 

30. Adr: Ambrenus Andreae Storch – Aut: Petrus Jonae Bock (cf. 28)

Västerås StB, [Tartu UB]

GRATULATIO

                        Perdoctas quicunque theses defenderit arte,

                                    Ille sibi laudem conciliare potest.

                        Hoc, AMBERNE, facis docta praesente Corona,

                                    Hinc tibi quis laudem, dulcis Amice, neget?

            5          Perge tuis coeptis insistere pectore firmo;

                                    Virtutis laudem et praemia certa feres.

Debiti fraterni amoris et honoris ergo

faciebat

PETRUS JONAE Bock / Carolstadius.

 

31. Adr: Ambernus Andreae Storch – Aut: Johannes Jonae Allengreen (cf. 28)

Västerås StB, [Tartu UB]

GRATULATIO

                        Ingens est vitium congestis undique saccis

                        Invigilare, sacris veluti quoque parcere rebus.

                        Munera at ampla pio largiri et corde benigno

                        Laus est, et virtus Divino pectore digna:

            5          Hanc quia sectaris, Christo Duce et Auspice Christo,

                        AMBERNE, o Theseo mihi semper foedere juncte,

                        Hinc tibi laus terris, dabitur quoque gloria coelis.

Fraterni affectus testif. f.

Johannes Jonae Allengreen.

 

32. Adr: Ambernus Andreae Storch – Aut: Johannes Petri Kuuth (cf. 28)

Västerås StB, [Tartu UB]

GRATULATIO

                        Clara tegi virtus nequit, AMBERNE, ardua nunquam

                                    Est virtus meritis exspolianda suis:

                        Hinc Sophiae pergis conscendere jugera celsa,

                                    Aonides Musas nocte dieque colis.

            5          Gratulor inde tuis merito de pectore coeptis,

                                    Pectore laetanti gaudia mille fero.

                        Dextre animum illustra juvenili flore per artes,

                                    Hinc capies studiis digna brabea tuis.

Ita gratulabatur animitus

JOHANNES PETRI Kuuth /

Sud. Svec.

 

33. Adr: Petrus Trottonius – Aut: Nicolaus Psilander (Oratio in felix novi anni auspicium; quae, /.../ in Regia Academia Gustaviana, quae Dorpati est /.../ die 2. Januar. anno 1640. publice /.../ habebatur a Petro Trottonio, /.../ - Dorpati Livonorum, 1640: Typ. acad.)                                                         SKB, Växjö LB, [Tartu UB]

GRATULATIO

Literatissimo et Humaniss. DN. PERORANTI:

PETRUS TROTTONIUS SMOLANDIA-SVECUS,

Per Anagrammatismum.

TU RETRO LAUDEM CANIS; UT POSSINT SUOS.

 

                        Partes qui Astrigeri Janus Junonius axis

                                    Perspicit Eoas, Hesperiasque simul:

                        Nunc revocat sic prolem Hyperioniam rutilantem

                                    Cursumque Aethontis flammipedis cohibet.

            5          Hinc RETRO LAUDEM, TROTTONI, rite CANIS TU:

                                    CHRISTO sint grates: Fausta futura sient!

                        Vive in Cumaeos annos: Faxit studia Almus

                                    UT POSSINT fines tangere fine SUOS.

NICOLAUS PSILANDER, Sud. Svec.

 

34. Adr: Petrus Trottonius – Aut: Laurentius Ludenius (Disputatio physica de principiis internis corporum naturalium; quam, /.../ in Regia Academia Gustaviana, quae Dorpati est /.../ 3. Octobris, anno 1640. /.../ exercitij gratia publice praeside Laurentio Ludenio, /.../ submittebat, respondens Petrus Trottonius, /.../ - Dorpati Livonorum, 1640: Typ. acad.)                                                 SKB, [Tartu UB]

GRATULATIO

Doctissimo et Humanissimo

DN. RESPONDENTI

PETRUS TROTTONIUS,

Per Anag.

TUTUS TERRIS PONTO.

 

PONTOnes mutant merces: sis TVTVS amicis

Tu PONTO TERRIS mercibus ingenij.

In felix omen ap.

LAURENTIUS LUDENIUS,

PH. et J.U.D. ac Professor.

 

35. Adr: Petrus Trottonius – Aut: Benedictus Cassiander (cf. 34)           SKB, [Tartu UB]

GRATULATIO

Sic, pie PETRE, Theses de internis scribere pergis

Principijs: tentas quod bene, id artis opus.

Aggredere artis opus, sis felix atque beatus,

Sic summum usque decus, quod venit inde, feres.

Benedictus Cassiander,

Smol-Svecus.

 

36. Adr: Petrus Trottonius – Aut: Petrus L. Schonbergius (cf. 34)          SKB, [Tartu UB]

GRATULATIO

PETRUS TROTONIUS,

Per Anagram.

TUTUS EST PRONIOR.

 

                                               Semper timet, caret qui

                                               Tutore; navis ut quae

                                               Fertur mari in profundo.

                                               Hic non timet procellas

                          5            Nautam qui habet peritum;

                                               Sed fortiter resistit,

                                               EST PRONIORque: TUTUS

                                               Et pronior repellit

                                               Undas datas marinas.

                           10          Sis PRONIOR, TROTONI,

                                               In rem sacram; usque TUTUS

                                               Nam nauta adEST fidelis:

                                               Hostes pij instituti

                                               Pelle hinc, procul repelle:

                           15          Ti magna laus resurget.

PETRUS L. SCHONBERGIUS, Ost. Goth. Svecus.

 

37. Adr: Johannes Nicolai Trätz – Aut: Johannes Erici <Stregnensis> (Disputatio de oeconomica in genere: quam, /.../ in Regia Academia Gustaviana, quae Dorpati est /.../ publicae et placidae ventilationi ad diem 23. Junij /.../ submittebat /.../ Ericus Andreae Sala-Montanus, respondente Johanne Nicolai Trätz, /.../ - Dorpati Livonorum, 1640: Lit. acad.)                                                                                  SKB, UUB, H,[Tartu UB]

GRATULATIO

Doctrina et morum elegantia conspi-

cuo Juveni

DN. JOHANNI NICOLAI Trätz /

Arosia Vesmanno, de utilissima et jucundis-

sima disciplina, Oeconomica, publice disputanti,

Amico suo syncere dilecto.

 

                        Omnia nunc rident; florent laetantur in hortis;

                        Et frondent sylvae, vires et prata resumunt:

                        Inde tumescit humus, ridens et gramina confert,

                        In totis campis, laetantur et omnia rident.

            5          Pinniger aequoreis piscis qui vivit in undis,

                        Inter aquas ludit, faecundus flumina tranat,

                        Atque sui fructum praebet praedantibus hamis.

                        Hinc volucris lignis nidos suspendit in altis,

                        Cantu nascentem lucemque diemque salutat;

            10        Concentum suavem resonis e frondibus edit.

                        Denique jam pecudes, jam muta animalia laetos

                        Educunt foetus blandi sub luminis auras,

                        Sic complent terram, sic singula bruta resultant.

                        Hinc bonus Oeconomus memori sub pectore condit,

            15        Qua ratione domum curet, qua mente beetque:

                        Providet ut domui, bene sit per tempora dura.

                        Quas res rite Theses demonstrant ordine justo

                        Praesentes, studiis quae prosunt Oeconomorum.

                        Chare, theses magna, tu Trätz cum laude tuere,

            20        Atque tibi prosit praxi bene consuluisse.

                        Pergas ingeniis Musarum immittere amorem,

                        Hocque animo magnos tandem instaurabis honores;

                        Quod superum Rex ipse velit succedere Christus.

 

Votum Sapphicum.

 

                        Sic tuo grator celebri labori;

            25        Sic tibi grator quoque quod laboras;

                        Semper ac artes, Sophiae et recessus

                                                            Vis penetrare.

                        Prosperet Christus moderator orbis

                        Hoc tuum coeptum, studiumque semper,

            30        Donec ad coeli revocaris aulam,

                                                            Usque Beatus.

Quod animitus grat.

M. JOHANNES ERICI,

Stregnensis Svecus.

 

38. Adr: Petrus Turdinus – Aut: Andreas Virginius (Sacris ministerii honoribus; qui /.../ Petro Turdino, jam pastori Cathedralis Ecclesiae Revaliensi /.../ ibidemque Regii Consistorii adsessori /.../ solenniter conferebantur, cum 2. die Octobris, anno 1640. ecclesia Christi, quae ibidem colligitur, /.../ commendaretur: quaevis fausta et optata precantur Musae Embecciades. – Dorpati Livonorum, 1640: Typ. acad.)

SKB, [Tartu UB]

GRATULATIO

                        Ergo Magisterij qui clarus honore refulges,

                                    Inde Ministerij clarus amore clues,

                        Clare vir; ingenuus Sophiaeque politior usus

                                    Te clarum fecit jure Magisterij.

            5          Annuat omnipotens; Divini oracula verbi

                                    Te clarum facient jure Ministerij.

                        Adjiciet curam Eusebiae nova vita recentem,

                                    Diceris verbi jam tuba plena Dei.

                        Per populos sparges coelestis Numinis haustus,

            10                    Expones Christi cognitionis opes.

                        Te Duce, virtuti veniant sua praemia: vitae,

                                    Te Duce, deficiant facta notanda malae.

                        Efficias genus humanum, servesque beatum:

                                    Buccina sic verbi deliciosa Dei.

Ita veteri suo amico gratula-

ri voluit

ANDREAS VIRGINIUS D.

et Prof. P.

 

39. Adr: Petrus Turdinus – Aut: Laurentius Ludenius (cf. 38)     SKB, [Tartu UB]

GRATULATIO

                        Clare Vir, Eusebiae et Christi, TVRDINE, Sacerdos,

                        Delicium Sophiae, Decus immortale Bonorum:

                        Cecropiae eximio pollens Latiaeque Minervae

                        Hactenus ingenio, Physicam Sophiamque professus;

            5          Socratis et Senecae divini et more Catonis

                        Vsque fatigasti docto sermone quod aequum est.

                        Aspiret felix sancto fortuna labori,

                        Hinc tibi conspicuos velabit candida crines

                        Infula, et Antistes DOMINI per secula vives.

            10        Sanctum Evangelium sanctique Oracula Verbi

            Dixeris, et veri Divinos Numinis haustus

                        Sparseris in populos, animosque in nube jacentes

                        Traxeris ad lucem, monitisque erexeris aures

                        Ad jubar aethereum, divini et luminis ignem.

 

M. PETRUS TURDINUS:

Per Anagr.

TU RUMPENS TRUDIS.

 

15        Ominor: optati sit felix Nominis omen;

                        TV RVMPENS rerum  fallacia vincula TRVDIS,

                        Et procul hinc, procul inde feros avertere ritus

                        Incipis; Auspicio Christi, quo deditus Aris

                        Sit cultus, cuncti et pravos desvescere mores

            20        In melius versi studeant et vivere recte.

                        Sic! Bene sic vivet renovatis moribus aetas;

                        Sufficies meliorem animam, Christo Auspice, Genti;

                        Ille etiam mundo cum venerit ultimus aevi

                        Terminus, a Christo vox mota feretur ad aures;

            25        Euge, Bone o Serve! in minimis mihi, Serve, fidelis;

                        Ingredere o Domini coelestia gaudia: quondam

                        Prensa Fide, intuitu coram propiore tenebis.

Quod in felix auspicium v.

LAURENTIUS LUDENIUS, PH.

et J.U.D. ac in Regia Academia Dorpaten-

si Professor Juris, Orat. et Poës.

 

40. Adr: Petrus Turdinus – Aut: Salomon Matthiae (cf. 38)                    SKB, [Tartu UB]

GRATULATIO

                        Pervetus est verbum: qui fel non gustat amarum

                                    Hic etiam suavi nectare jure caret.

                        Usque huc Sisyphios non detrectare labores

                                    Visus es, hinc fructus accipis egregios.

            5          Paucos ante annos Dorptae Thymbraeus Apollo

                                    Nectebat capiti Laurea serta tuo;

                        Ecce salutifero nunc te vult pascere VERBO

                                    Sancto quas peperit sangvine CHRISTUS oves.

                        Gratulor: ad nutum cesserunt omnia: Mystae

            10                    Fac bene succedant singula, CHRISTE, novo.

Gratulabund. apponebat

M. SALOMON MATTHIAE

Ebr. Ling. P.P. et ad D. Joh. Pastor.

 

41. Adr: Petrus Turdinus – Aut: Michael Olai Bostadius (cf. 38)            SKB, [Tartu UB]

GRATULATIO

                        Inclyta festivos exede, Revalia, plausus,

                        Quam Deus Astripotens clemens Pastore beavit,

                        Qui non conscendit damnosae fulcra Cathedrae;

                        Verum in Lege Dei meditatur nocte dieque,

            5          Auspice quam Christo bene docta voce profatur,

                        Vt sibi commissum Christi compascat Ovile,

                        Et ducat secum ad peramoena palatia coeli;

                        Hoc precor ut facias, TVRDINE o Clare Magister,

                        Donec in hoc mundo, vitali vesceris aura;

            10        Sic tibi concilias pulcrum per secula nomen,

                        Et, cum cuncta cito, lapsu concussa peribunt,

                        Ecce tibi Christus dicet: Tu Serve fidelis,

                        Ingrediare mei coelestia gaudia Patris,

                        Justitiae ut captes nunquam violabile sertum.

Haec conterraneo suo syncero

et fratris loco dilecto vov.

Michaël Olai Bostadius

ad D. Mar. Pastor.

 

42. Adr: Petrus Turdinus – Aut: Martinus Faxelius (cf. 38)                     SKB, [Tartu UB]

GRATULATIO

                        Dicito Io Paean, et Io bis dicito Paean!

                                    Christiados quisquis Fausta salutis amas.

                        Typhis et Automedon vobis, Duce et Auspice Christo,

                                    Dius et edoctus dexteritate datur.

            5          Dulce Decus Sophiae, Decus Eusebiaeque verendum;

                                    Gratulor hinc tantis carmine muneribus.

                        Congrua Cunctipotens humeris det robora, sacrum

                                    Impositum ut valeant ferre potenter onus.

                        Ut prodesse Pijs Divina docendo, Magister,

            10                    Possis verba, tuo quae seris ore gregi.

                        Ito bonis avibus, faustis hinc ito quadrigis,

                                    I bene, quo bene Te sidera fausta vocant.

                        Pax, Pietas, Virtus, Plebs, Sors, Ecclesia, cuncta

                                    <Ito> Te pleno suaviter ore vocant.

Amico suo certissimo animitus

precatur

M. MARTINVS N. FAXELIVS

Nerikia Svecus.

 

43. Adr: Petrus Turdinus – Aut: Jacobus Lotichius  (cf. 38)                    SKB, [Tartu UB]

GRATULATIO

                        Phasellus ut per aequor aestuat praeceps;

                        Vel Syrtibus Charybdibusque Sirenum

                        Latrantibus libatur anxie pernix,

                        Ubi erudito est destituta Nauclero.

            5          Haut absimilliter Phasellus insignis

                        Ecclesiae sacrae, cavis procellarum

                        Furoribus jactatur, Orba si quando

                        Est Praesule atque Praeside, eruditorum

                        Collegij Virorum alacriter docto.

            10        Hinc Arbiter Legum perite sacrarum;

                        Scientiarum multiformium Gnare;

O Mystagogum Ocelle; Et o meum Pectus;

                        TVRDINE, Candor utriusque Candoris

                        Nostri; Hinc Tibi, Tuisque candide grator,

            15        De Numinis tanto favore collato

                        Altissimi. Sic perge, sic Fretum sulca

                        Puppi triumphali! Parata sunt Transtra;

                        Flat Eurus auspex: Et regenda sunt pansa

                        Utrinque Carbasorum in aethere agmenta:

            20        Conscende, tranquillumque ovanter attinge

                        Portum, alma adorea decenter Ornatus.

Ipse quod opto

JACOBVS LOTICHIVS.

 

44. Adr: Petrus Turdinus – Aut: Ericus Haquini Bobergius (cf. 38)         SKB, [Tartu UB]

GRATULATIO

                        Turdine, Aoniae doctrinae macte Magister,

                                    Cultor et Eusebiae perstudiose sacrae;

                        Numina sacra colis, coelestia jussa capessis,

                                    Per vitaeque foves tempora cuncta tuae;

            5          Integer es vitae, maculis non oblitus ullis;

                                    Non nisi justa facis, non nisi vera refers.

                        Ergo tibi fas est, mysteria pandere sacra,

                                    Porrigere et verae relligionis opes;

                        Credita praeterea tibi nunc Ecclesia pulcra,

            10                    Quam pasces verbo candidiore DEI.

                        Gratulor hanc Spartam synceri e pectoris arca,

                                    Et precor exornes sedulitate pia,

                        Et DEUS astripotens producat tempora vitae,

                                    Resque tuae cursu prosperiore fluant;

            15        Praesentisque DEUS, disrupto stamine vitae,

                                    Te vocet ad rutili regna beata poli;

                        In queis gratifico cantabis jubila cantu,

                                    Trisagion dices voce canente DEO.

Lubens adscripsit

ERICVS HAQVINI BOBERGIVS,

W. Gothus.

 

45. Adr: Petrus Turdinus – Aut: Petrus L. Schonbergius (cf. 38)            SKB, [Tartu UB]

GRATULATIO

Mag. Petrus Turdinus:

Per Anagram:

Per Studium Surgant.

 

                        Per Studium Martis Surgant Mavortia corda:

                        Per Studium Musae, ad culmen tu Surgis honorum;

                        Dum sancte sancti sancta statuta Dei

                                                                        Impiger urges.

In felix omen et gratitudinis

monumentum reliquit

PETRUS L. SCHONBERGIUS,

Ost-Gothia Svecus.

 

46. Adr: Petrus Turdinus – Aut: Petrus Jonae Bock (cf. 38)                   SKB, [Tartu UB]

GRATULATIO

                        Non ignota fero: Divino est munere dignus,

                                    Muneris est fructu dignus et ipse sacri,

                        Quem pia Divini constanter cura timoris

                                    Tangit, et egregie nocte dieque beat,

            5          Qui scrutans praecepta Dei, se oblectat in illis,

                                    Et nihil haec extra, quod meditetur, habet.

                        Hoc, Turdine, facis Sophiae preclare Magister,

                                    Eusebiaeque sacrae faxque decusque sacrum:

                        Hinc tibi collato censeris munere dignus,

            10                    Muneris es fructu dignus et ipse tui.

                        Te Deus o servet, praesens tibi semper, et umbra

                                    Te velut inclusum protegat ipse sua.

                        Curet te Dominus, te damno servet ab omni,

                                    Et custos vitae sit Deus ipse tuae.

            15        Perge tuo multis sancto prodesse labore,

                                    Sic tua post obitum fama superstes erit.

Debiti honoris ergo apposuit

PETRUS JONAE Bock /

Carolstadius.

 

47. Adr: Petrus  Turdinus – Aut: Johannes Jonae Allengreen (cf. 38)

SKB, [Tartu UB]

GRATULATIO

                        En, Turdine, sacrae Latonae candida proles,

                        Dulce sit o munus sancti venerabile Verbi,

                        Cui te sancta Trias praefecit sydere laeto,

                        Quodque tibi grator devotae mentis amore,

            5          Supplice sollicitans coelestia Numina voto,

                        Vt numeres felix grandaevi Nestoris annos,

                        Adque Dei nutum vitae modereris habenas.

                        Muneris in terris patienter pondera portes,

                        In coelisque canes festivo jubila plausu.

Candido animo scripsit

JOHANNES JONAE Ållengreen /

W-Gothia Svecus.

 

48. Adr: Petrus Turdinus – Aut: Johannes Petri Kuuth (cf. 38)   SKB, [Tartu UB]

GRATULATIO

                        Clio Rivaliae dominatur moenibus urbis,

                        Calliopeque pium fundit de pectore carmen.

                        Petrus, honos sanctae teneris pietatis ab annis

                        Doctrinaeque fuit, quae vitam moribus ornant;

            5          Artibus ingenium, linguam sermone politam

                        Possidet, ac Sophiae cinxit sua tempora myrto;

                        Nunc et Apostolicum recipit venerabile munus

                        Dum Templo Cathedrae divini fontis ad aras

                        Inservire cupit: Divina Vocatio fluxit

            10        Auspicio summi qui nunc regit omnia Patris:

                        Hinc Domino laetas cantamus carmine grates,

                        Jubila cordifluo diffundimus optima plausu;

                        Aspiret coeptis Christus sine fine precamur,

                        Sintque diu sano vires in corpore sanae.

Hoc animitus optat

JOHANNES PETRI Kuuth /

Sud-Svecus.

 

49. Adr: Petrus Turdinus – Aut: Olaus Olai Presbolius (cf. 38)   SKB, [Tartu UB]

GRATULATIO

                        Turdine, Eusebiae dignissime Mysta Cathedrae,

                                    Et laetis Sophiae floscule pulcer agris,

                        Officium sanctum, ad quod te Deus ipse vocavit,

                                    Grator, pergrator pectore et ore, tibi;

            5          Quod superest; opto vivas per secula felix,

                                    Sanctam Ecclesiolam promoveasque Dei.

Alacri animo adscripsit

Olaus Olai Presbolius,

Wermelandia Svecus.

 

50. Adr: Petrus Turdinus – Aut: Olaus Michaelis (cf. 38)                       SKB, [Tartu UB]

GRATULATIO

                        Qvi studio sacri dispergunt semina Verbi,

                        Erudiuntque Dei populum; Duce et auspice Christo,

                        Fulgebunt instar stellae fulgentis in astris.

                        Hoc, Turdine, facis, Clare et Reverende Magister:

            5          Hinc instar stellae tandem fulgebis in astris.

                        Hoc precor, hoc voveo, constanti cordis amore

                        Donec Parca meae disrumpat stamina vitae.

Gratulaturus adscripsit

Olaus Michaëlis,

W-Gothus.

 

51. Adr: Josephus Paulinus Ulsbeckius– Aut: Laurentius Ludenius  (Oratio de veritate: quae, /.../ in Regia Academia Gustaviana, quae Dorpati est /.../ die 8. Februarij, anno 1640. publice /.../ habebatur a Josepho Paulino, Ulsbecki Sveco. – Dorpati Livonorum, 1640: Lit. acad.) (cf. 24)    SKB, Växjö LB, H, [Tartu UB]

GRATULATIO

Doctiss. et Humaniss. Dn.

PERORANTI.

JOSEPHUS PAULINUS:

Per anag.

HIS AUSU PLENO PIUS.

 

                        HIS AVSV PLENO PIVS es conatibus: AVSV

                                    Esto PIVS: Patriae sic eris usque PIVS.

Quod animitus ap.

LAURENTIUS LUDENIUS,

J.U.D. et Professor.

 

52. Adr: Josephus Paulinus Ulsbeckius – Aut: Johannes Anberg (cf. 51)

SKB, Växjö LB, H, [Tartu UB]

GRATULATIO

                        Veriloqvus quanquam premitur quandoque: subinde

                                    Virtutis sacrae ope hinc attamen erigitur.

                        Docte JOSEPHE; animis virtutem hanc esse colendam,

                                    Pulcre commendas: huicque studere mones.

            5          Est opus hoc gratum Christo, qui est Sanctus amator

                                    Et virtutum author. Fausta tibi omnia erunt.

Ita suo amico anim. gratul.

JOHANNES ANBERG /

Smalandia-Svecus.

 

53. Adr: Petrus Caroli Undenius – Aut: Laurentius Olai Morenius (Oratio in felix novi anni M.DC.XL auspicium; quam /.../ in Regia Academia Gustaviana, quae Dorpati est /.../ 4. die Januar. anno 1640. publice /.../ enarrabat Petrus Caroli Undenius, /.../ - Dorpati, 1640: Lit. acad.)                                     SKB, UUB, Växjö LB, Tartu UB

GRATULATIO

Moribus et Doctrina Ornatissimo

DN. PERORANTI.

 

                        Quis, mi Petre, sacrae decus immortale Cohortis,

                                    Pectore non voveat prospera cuncta tibi?

                        Auspicium Felix Anni Novi adusque precaris

                                    Cunctis, quos mundi machina vasta capit.

            5          Sit faustum et felix votum, sint omnia fausta

                                    Eveniantque tibi commoda larga, precor:

                        Et tua tranquillum veniant ad littora pontum

                                    Carbasa, tu videas prosperitate Tuos.

Quod animitus precatur

Laurentius Olai Morenius,

Wermelandia Svecus.

 

54. Adr: Petrus Johannis Ungius – Aut: Laurentius Ludenius (In auspicatissimos natales Regiae Academiae Aboensis, /.../ a /.../ Christina, Svecorum, Gothorum, Vandalorumque regina /.../ fundata, et 15. Julij anno 1640. /.../ inauguratae, oratio solennis de academiarum antiquitate et necessitate, quam in /.../ consessu Aboae /.../ 4. die Aug. publice decantabat Petrus Johannis Ungius, /.../ - Dorpati Livonorum, 1640: Lit. acad.) (cf. 63)                               SKB, UUB, Växjö LB, [Tartu UB]

GRATULATIO

PETRUS JOHANNIS UNGIUS:

Per Anag.

O PARTUS IN HIS INGENUUS!

 

                        Tvque Novenarum Cultor, pie PETRE, Sororum

                        Dum Musis recitas Academica credita Tempe:

                        PARTVS IN HIS genij INGENVVS, visque Entheae mentis

O fulget! cursus sit felix, opto, laborum.

Quod ipsum devota mente apprecabatur

LAURENTIUS LUDENIUS, Ph. et J.V.D.

Po. C. et in Regia Academia Dorpatensi

Professor Juris, Oratoriae et Poëseos.

 

55. Adr: Petrus Johannis Ungius – Aut: Samuel Hartman (cf. 54)

SKB, UUB, Växjö LB, [Tartu UB]

GRATULATIO

Praestantissimo et Literatissimo Iuveni Viro

Dn. PETRO JOH. UNGIO, Calm. Sve-

co, S.S. Theol. Studioso, Amico optimo, in nova Fin-

nonum Academia publice docteque  declamanti.

 

Vox, ut personuit docta per atria,

PETRI, quem stabilem multa peritia

Rerum multijugis condecorat modis:

Vibrans obticuit Fulmen Apollinis,

            5          Admirata stupet plebs Academica,

                        Qua vi tam celeri turba Cyclopica

                        Nativo solio, pergat in exules,

                        Cogaturque cito plectere poplites.

                        UNGI, quid faciam concelebrande? vi

            10        Docta singula qui persequeris? Chely

                        Phoebeja volupe est ingenium: tibi

                        Commendare decus Calliope cupit.

                        Sis vir; macte animis: JOVA LEVAMINE

                        Prompto promptus erit: Flamine tu clue

            15        Adjutore DEO! macte, clues, ages

                        Felix, assiduus: macte, clues, ages.

Hoc ex animo optat

Samuel Hartman.

 

56. Adr: Adrianus Verginius – Aut: Jacobus Lotichius (Disputatio Johanniticarum de praecipuis religionis Christianae articulis secunda de lege Dei quae /.../ in Regia Academi Dorpatensi publicae ventilationi subjicietur praeside Andrea Virginio, /.../ autore et respondente Adriano Verginio, /.../ d. < > Novemb. /.../ - Dorpati Livonorum, 1640: Lit. acad.)                                                                      EAB, [Tartu UB]

GRATULATIO

Rev. Pietate, Doctrina et Humanitate con-

spicuo Dn. RESPONDENTI.

 

                                               Sinaea proh hiulca

                                               Monumenta ad antra pellit,

                                               Ac Orci ad ima Mosen

                                               Vecors furor relegat

                                 5            Cyclopicae cohortis.

                                               Hic frendet atque fatur,

                                               Lex dira, dura, prava,

                                               Minax, profana, soeva,

                                               Legisdatore atroce

                                 10          Sancita; bibi et atrae

                                               Non subjicit Tonantis:

                                               Vah exulent ab arvis

                                               Horrenda jura nostris!

                                               Stomachatur alter usque

                                 15          Sic gannit atque fatur,

                                               Lex dira, prava, soeva,

                                               Ceu nostra membra duris

                                               Ferruminat catastis;

                                               Nunc urget ac retorquet

                                 20          Hinc inde nos misellos,

                                               Stygiasque pene ad undas

                                               Deturbat ac reflectit:

                                               Vah exulent ab arvis

                                               Horrenda jura nostris!

                                 25          Epicure, quid lacessis

                                               Vesana corde tela,

                                               Oris scabraque voce

                                               Edicta Dia spernis?

                                               Quid Haeresis proterve

                                 30          Manachaea, jura contra

                                               Tam Numinis verenda

                                               Baubas? Precor, venite,

                                               Patiamini doceri!

                                               Mecastor erudire

                                 35          Vos efferasque mentes

                                               Authentica haecce scripta

                                               Quam plurimum potessunt.

                                               Tu Mystagoge perge,

                                               O perge Mystagoge,

                                 40          Jus Entheum vereri,

                                               Jus Entheum tueri.

                                               Victrice ter quaterque

                                               Diademate atque Lauro

                                               Divinitus Beati,

                                 45          Volupe est quibus Tabellas

                                               Meditarier sacrarum

                                               Noctu dieque Legum.

Ex animo ap.

JACOBVS LOTICHIVS.

 

57. Adr: Ulricus Volbergen – Aut: Laurentius Ludenius (Borussiae historia: quam, /.../ in Regia Academia Gustaviana, quae Dorpati est /.../ oratione solenni, die 1. Augusti, anno 1640. publice /.../ enarrabat Ulricus Volbergen, /.../ - Dorpati Livonorum, 1640: Typ. acad.)                                                               SKB, UUB, LAB, [Tartu UB]

GRATULATIO

Doctissimo et Humanissimo

DN. PERORANTI.

ULRICVS VOLBERGEN:

Per Anag.

URGE LVBENS; I LVCRO.

 

Qvod monstrat Justum grave Papinianus et Aequum,

VRGE, Vlrice, LVBENS: Chronicorum Scripta, subinde

VRGE, Vlrice, LVBENS: I LVCRO dexter Amicis.

Quod animitus vov.

LAURENTIUS LUDENIUS,

J.U.D. et Professor.

 

58. Adr: Ulricus Volbergen – Aut: Martinus Nicolai Faxelius (cf. 57)

SKB, UUB, LAB, [Tartu UB]

GRATULATIO

Sit sua laus aliis, alios sua rumigeret vox;

Rumigerent doctos, carmina docta, viros.

RES PROBAT ARTIFICEM, Tua res dum disseris arte

Te probat, insimul et comprobat Artificem.

            5          Perge perorando docte; sic laude probabunt,

                                    Artificem doctum, Carmina docta, virum.

Quod animitus apposuit

M. Martinus Nicolai Faxelius,

Nerikia Svecus.

 

59. Adr: Ulricus Volbergen – Aut: Jacobus Lotichius (cf. 57)

SKB, UUB, LAB, [Tartu UB]

GRATULATIO

                                               VOLBERGIana Thetis,

                                               Quid, auguror, requiret.

                                               Vehitur ratis Phasellis;

                                               Et flatibus secundis.

                                 5            Euri faventiores,

                                               Zephyrique  molliores,

                                               Non abnuunt Carinae.

                                               Quid, auguror, requiret?

                                               Hydaspis haut lapillos,

                                 10          Scythicasque gemmulillas.

                                               Sed, auguror, requiret,

                                               Quod nec Tagi liquores

                                               Mercarier potessunt,

                                               Tamen Tagi liquores

                                 15          Mercarier potessit.

Jacobus Lotichius.

 

60. Adr: Seguardus Olai Wallander – Aut: Ambernus Andreae Storch (Oratio de homine; quam, /.../ in Regia Academia Gustaviana, quae Dorpati est /.../ 28. Mart. anno 1640. publice /.../ enarrabat Seguardus Olai Wallander, /.../ - Dorpati Livonorum, 1640: Lit. acad.)                             SKB, UUB, Växjö LB, LAB, [Tartu UB]

GRATULATIO

Pietate, Doctrina et Humanitate Ornatissimo

Juveni

DN. SEGVARDO OLAI WAL-

LANDRO, amico et Sympatriotae suavissimo.

DE HOMINE, docte et Methodice

PERORANTI.

 

                        Dimidium o nostri cordis, Pietatis amator

                        SEGVARDE, Aonij pulcherrima Gloria coetus:

                        Haec tibi cura manet, renovatis dicere verbis,

                        Quid sit Homo, quae sint causae, quamque illa venusta

            5          Fabrica membrorum: quam nobilis atque verenda

                        Ingenij sit vis, vigor, ardor et enthea virtus:

                        Cuncta haec enarras doctae modulamine lingvae.

                        Instes, nec cesses, Hominem describere docte;

                        Sic tibi consurget cum Homine ipso gloria magna,

            10        Et tibi Castalides referent sperata brabeja.

Animo gratul. apposuit

Ambernus Andreae Storch

Mariaestadius.

 

61. Adr: Seguardus Olai Wallander – Aut: Petrus Caroli Undenius (cf. 60)

SKB, UUB, Växjö LB, LAB, [Tartu UB]

GRATULATIO

                        Latonae proles, stabili, WALLANDER, amore

                                    Juncte mihi; ostendis sic specimen genij;

                        Astriferi narras dum quam faber amphitheatri

                                    Naturam ipsi Homini pro bonitate dedit;

            5          Scilicet ut possit solus cognoscere verum,

                                    Colloquio et puro sensa referre animi.

                        Caetera mente carent: Hinc condita cuncta subegit,

                                    Infima pars mundi quae spaciosa tenet.

                        Perge, velut pergis, causas pervolvere rerum,

10                                        Et tibi provenient commoda multa rei.

Ita amico et Contubernali suo synceri

amando, gratulari debuit ac voluit

Petrus Caroli Vndenius,

W-Gothus.

 

 

62. Adr: Moecenatibus, Patronis et Promotoribus suis – Aut: Jacobus Lotichius (Oratio de musica: quam, /.../ in Regia Academia Gustaviana, /.../ die 4. Jan. anno 1640. /.../ enarrabat Jacobus Lotichius, /.../ - Dorpati Livonorum, 1640: Typ. acad.) (cf. 18-20)                                             SKB, London BL, LAB, EAB, [Tartu UB]

DEDICATIO

Dnn. Mecoenatibus, Patronis et Promotoribus

suis observanter colendis;

Salutem et Incolumitatem.

 

O Mecoenates, Patriae nitidissima fulcra,

       Gaudia Musarum, Deliciaeque meae.

Musica Dia sapit, coelum terramque gubernat;

            Nata juvare hominem; nata sonare Deum.

5          Haec potis est raptum curis reparare vigorem:

                                    Haec Satanam, haec morbum, haec plura pericla[8] fugat.

                        Haec quoque facta pios Heroas ad ardua cogit;

                                    Haec movet harmonicis aspera corda modis.

                        Hanc juvenesque senesque colunt, puerique tenella

10                    Labra cient: Hanc et candida turba colit.

                        Musica magna sapit; crepat altum; Dia gubernat,

                        Vultque potestati cuncta subesse suae.

            Hinc mea Svada rogat; Quid sit? Pia Musica quid sit?

                        Materiemque sibi repperit illa suam.

15        O Mecoenates, est Musica Vestra voluptas

                        Musaque vos Musis, quaeso, favete meis.

Quod ipsum ad Aram Gratitudinis devote vovebat

Jacobus Lotichius.

 

63. Adr: Regia Academia Aboensis – Aut: Laurentius Ludenius (In auspicatissimos natales Regiae Academiae Aboensis, /.../  a /.../ Christina, Svecorum, Gothorum, Vandalorumque regina /.../ fundatae, et 15. Julij anno 1640. /.../ inauguratae, oratio solennis de academiarum antiquitate et necessitate, quam in /.../ consessu Aboae /.../ 4. die Aug. publice decantabat Petrus Johannis Ungius, /.../ - Dorpati Livonorum, 1640: Lit. acad.)                                          SKB, UUB, Växjö LB, [Tartu UB]

GRATULATIO

IN

AUSPICATISSIMOS NATALES

REGIAE ACADEMIAE ABOENSIS.

 

                        Terrarum Coelique Sator, Monas et Trias una,

                        Principium, Rector, Dux, Semita, Terminus idem

                        Sera humanorum per secula tota laborum,

                        Afferat auxilium: DEus auxiliaris amice

5          Illustri assistat operi, suaque omnia firmet.

                        Ardua Progenies Regum, Celsissima Princeps,

                        Illustris Soboles GVSTAVI-Regis-ADOLPHI,

                        CHRISTINA, Heroina; sacra Virtute Serena

                        Regina; aeternae fulcrum Pietatis, et illud

10        Sanctum Delicium humanae per secula Gentis,

            Proxima sideribus tellus Erymanthidos ursae

            Qua jacet Arctois assurgens Svecia signis;

            Regum illa Illustris Soboles et Sancta Propago,

            Regia sancti Animi Divinae et commoda mentis

15        Tota DEo quae rite refert et jugiter optat

            Illustrari orbem, sanctisque evincere rebus

            Quae meminisse juvet, mirentur et usque nepotes;

            Ardua qua tellus ostentat Finnica longe

            Praecipitem fossam et circundata moenia muris

20        Se quibus o multum felix ABOGIA jactat;

            Fecit ut Aoniis praeclara Habitacula Musis

            Regifica et pompa surgant Academica Tempe

Seclorum in seclum[9] Musis decora alta futuris.

Ipse Gubernator Terrae Celsissimus Heros,

25        Dives opum, Clarus Genus alto a Sangvine, PETRVS

                        BRAHE / Comes, Proavis ingens, clarumque paternae

                        Nomen habens Virtutis, et ipse acerrimus armis;

                        Palladium donis opulentum et Numine Christi

                        Aedificat; saxo veneramur structa beati

30        Templa Lycei, altam divinae et Pallados Aulam.

                        Culmen honorificum, venerandus Episcopus, alti

                        Palma Sacerdotis,[10] divinus Praesul ISACVS

                        ROTTHOVIVS, Domini Antistes, prius Archisacerdos:

                        Dat sperare domos, molirique aggere tecta,

35        Atque locare manu, et Musis dare Civibus urbem,

                        Praesidio Christi, Reginaque Auspice, BRAHE et

                        Auxilio Comitis, tantarum commoda rerum

                        Instituit, sanctorum operum atque exordia junxit.

                        Vt mage Regificis surgant Academica Tempe

40        Delicijs, pergant Musisque effingere Templa:

                        Iura, Magistratumque legant, sanctumque Senatum;

                        Magnificus meritis ProCancellarius audit

                        ROTTHOVIVS, celebri fama super aethera notus.

                        Eusebiae Doctor, Christi Pietate Sacerdos,

45        Cognitus AESCHILLVS PETRAEVS divite laude,

                        Magnifici primus venerandas muneris alti

                        Delicias gustat, felix Academicus Hercles.

                        Sanctis Auspiciis, Iuvenumque Senumque labores

                        Et placidis regit imperiis: Bonitate fovetque

50        Doctam Mercurij Sobolem Gentemque Togatam.

                        Doctrina insignis SVENO VIGAELIVS alta:

                        Insignis sancta TERSERVS et Arte IOHANNES:

                        Infula queis nitidos advelat candida crines,

                        Sanctum Evangelium sanctique Oracula Verbi

55        Proponunt, dotesque sacras cum pectore jungunt.

                        Eunomiae celebris DALAKARLVS laude IOHANNES

                        Irreprehensa docet dare mox Responsa petenti, et

                        Reddere Iura foro, et componere Legibus orbem.

                        Socratis, et Senecarum, et summi more Catonis

60        Est MICHAEL celebris WEXJONIVS: Insuper alte

                        Historiae et prisci memorat certamina secli.[11]

                        Lingvarum excellens MARTINVS STODIVS arte,

                        Cecropiae Hebraeaeque sonat gravis aemulus urbi,

                        Et facit eloquio ut crescant oracula Christi.

65        Miratur clarus SIMON KEXLERVS Olympum,

                        Designat toto labentia sidera coelo,

                        Solertisque viget Sapiens Tractator Arithmi.

                        Inde latet quodcunque, GEORGIVS Author ALANVS

                        Insignis tradit: narrat primordia Mundi

70        Et rerum causas, et quod Natura doceret.

                        Clarus NICLAVS NYCOPENSIS, mente sagaci

                        Iudicium ut fiat felixque Inventio, tradit;

                        Et veluti Vates, Heliconis gloria, crescat.

                        Vt sint eloquio vivacia verba, IOHANNES

75        TERSERVS, doctos miratur Rhetoras, addit

                        Aequemus Pyliae Neleja verba senectae.

                        Sanctae Reginae meritas persolvere grates

                        Non opis est nostrae: Numen coeleste reponat.

                        Celse Comes, Duce te, rata sit tutela Lycei:

80        Laetentur, Duce te, ProCancellarie, Musae:

                        Magnifice et Rector, Duce te, hinc Academia crescat.

                        Eusebiae, Eunomiae, Panaceae et Pallados almae

                        Vivite Doctores, Proceresque Patresque Lycei,

                        Rideat et vultu illustris fortuna sereno.

85        Inclyta Mercurij Soboles, Studiosa Iuventus,

                        Quae caput Aonias optas efferre per Artes,

                        Laetas ingemines grates, et mente reponas

                        Magnificum auxilium et nascentis commoda Musae.

                        Vive memor, Genus Ingenium quod adaugeat altum,

90        Et Mens sublimi supra Genus exeat Arte.

                        Coelica dispositis aspiret Gratia Musis;

                        Sint sancta celebres et ovantes voce Camoenae.

 



[1] Gratulationes in exemplari H

[2] otI edd

[3] Cf. B. Ragotzky, ‘Sinnsprüche aus Stammbüchern von 1550-1650’. Vierteljahrschrift für Wappen-, Siegel- und Familienkunde. 27. Jahrgang, Berlin 1899, S.418-419 Nr. 50, 51 und 73; F.-C. Freiherr von Stechow, Lexikon der Stammbuchsprüche. Stechow’s Stammbuchsprüche-Schlüssel (S.S.S.S). Neustadt/Aisch:Degener&Co, 1996, 162.

[4]VIRGINI ed

[5] secla edd metri causa

[6] periclis edd metri causa

[7] seclo edd metri causa

[8] pericla edd metri causa

[9] Seclorum in seclum edd metri causa

[10] Sacerdotij edd calamo correctum in Sacerdotis S

[11] secli edd metri causa