1646

 

1. Adr: Jonas Nicolai Bringander – Aut: Laurentius Ludenius (De Smalandia oratio, quam /.../ in Regia Academia Gustaviana Adolphina, quae Dorpati /.../ est /.../ die 11. Julij an. 1646. publice /.../ enarrabat Jonas Nicolai Bringander, /.../. Dorpati Livonorum, <1646>: J. Vogelius)                      SKB, UUB, Lund UB, [Tartu UB]

GRATULATIO

Doctiss. et Ornatiss. Dn. Peroranti.

JONAS NICOLAI BRINGANDER:

Per Anag.

IN RE DIGNA ORNABIS INCOLA!

 

                        IN RE sic DIGNA ORNABIS Patriam INCOLA! Dexter

                                    ORNES, Deo Duce, INCOLA.

In felix auspicium app.

Laurentius Ludenius, Ph. et J.U.D.

Profess. Publ.

 

2. Adr: Petrus Petri Byringius – Aut: Laurentius Ludenius (Disputatio physica, de mixtione; quam, /.../ in Regia Academia Gustaviana, quae Dorpati est /.../ sub praesidio /.../ Johannis Erici Stregnensis, /.../ publice ventilandam et discutiendam proponit Petrus Petri Byringius, /.../ ad diem < > /.../. Dorpati Livonorum, 1646: J. Vogelius)                                                                             SKB, UUB, [Tartu UB]

GRATULATIO

Doctiss. et Humaniss. Dn. Respondenti.

PETRUS  PETRI  BYRINGIUS:

Per Anag.

NUPER-BYSSI RITU PERGIT.

 

                        BYSSUS uti species est subtilissima lini,

                        Effulgens picturatae sub tegmine vestis:

                        Sic NUPER BYSSI RITU; Duce et Auspice CHRISTO,

                        PERGIT Castalias ornare BYRINGIUS Artes.

In felix auspicium app.

Laurentius Ludenius, Ph. et J.U.D.

Poët. Cor. Prof. P.

 

3. Adr: Petrus Petri Byringius – Aut: Johannes Petri Kuuth (cf. 2)

SKB, UUB, [Tartu UB]

GRATULATIO

                        Evri ni rapidos, vagosque Cauri

                        Flatus, Hippotades potens vocaret;

                        Qui vastas strepitu suo, volutant

                        Vndas, Coerulei maris frequentes,

            5          Putrescunt; refluens Thetys liquores

                        Commutat placidos in insalubres.

                        Et mollis nisi vertitur supino

                        Tellus, vomere, carduus nocivus

                        Surgit; tum lolium rubusque crescit;

            10        Dulces nec segetes refert colono.

                        Ferrum usu potiore si carebit

                        Admotae rigidi, manus, Perylli,

                        Proh rubigine rumpitur nociva.

                        Et sic Ingenium suum si homo non

            15        Exercet studiis bonis frequenter,

                        Praeclarum cito redditur supinum.

                        Conatus igitur tuos perennes,

                        Laudo, PETRE, fidelis o sodalis,

                        Pulchrum Piëridum decus Sororum,

            20        Quod rubigine non sinis perosa,

                        Allidi Ingenium tuum; sed acris,

                        Urges mentis opus: et hinc Camoenae,

                        Dulces te, Charites fovent amantque;

                        Nec te Murtia laedit, ille iniquus

            25        Nec Bacchus, nec iniquior Cupido;

                        Sed te Delius augur ille ducit,

                        Pulchrum nomen ad astra fert suprema:

                        Et te, dum patrios amas Penates

                        Vidisse: o Deus almus ut secundo

            30        Ducat flumine, tum reducat, oro.

Ita Conturbernali suo Cha-

rissimo L. mque gratulari

voluit

JOHANNES PETRI Kuuth / Suderm.

 

4. Adr: Christina – Aut: Laurentius Ludenius (Victricia arma, /.../ Gustavi Adolphi, /.../ patris herois; /.../ Christinae, filiae heroinae /.../ Svecorum, Gothorum, Vandalorumque regum; /.../ parentatione anniversaria, in Regia Academia Gustaviana Adolphina, quae Dorpati /.../ est  /.../ die 6. Novembris anno 1646. /.../ aeternitati consecrata a Laurentio Ludenio, /.../. Dorpati, 1646: J. Vogel.)[1]

SKB, UUB, Växjö LB, H, [Tartu UB]

DEDICATIO

Serenissimae et Potentissimae Principi

ac Dominae,

DN. CHRISTINAE,

Dei Gratia, Svecorum, Gothorum, Vandalo-

rumque Reginae, ac Principi Haereditariae; Magnae Principi

Finlandiae; Duci Esthoniae et Careliae; Dominae Ingriae; etc.

Victrici, Piae, Felici, Augustae, etc.

Vitam, Incolumitatem et Felicitatem p.p.

 

                        PATRIS, et aequaevae SOBOLIS, FLATUSque SACRATI

                                    Annuat aeterna PACE perennis AMOR!

                        Est DEA dicta CHARIS, Natura mitis et Annis,

                                    PACIS amans, Orbis deliciosa CHARIS.

 

CHRISTINA,

REGINA SVECIAE:

Per Anagram.

CHARIS

IN REGNA IT SVECIAE.

 

            5          Sancta CHARIS, CHRISTINA CHARIS; Regina Serena

                                    IN REGNA IT SVEONUM deveneranda CHARIS.

                        Est Pater Illustris Phoenix in Prole renatus:

                                    AdVeniat, Videat, Vincat amica CHARIS!

 

SS. Reg. Maj. Symbolum:

CHRISTUS REFUGIUM SUORUM.

 

                        Nam RE conFUGIUM REGINAE CHRISTUS: ab alto

            10                    Irradians, complens Regia Corda, VIGOR.

                        CHRISTUS, Numen, Honos, nitidissima Vita SUORUM:

                                    Arctoi Regni Lux, Sator, alma Salus!

                        Salve, Sancta CHARIS! Salve, REGINA! IEHOVA

                                    Auspice, sis regni deliciosa CHARIS.

Dominae et Reginae suae Clementissimae,

Humilime.

 

5. Adr: Jacobus Petri Columbus – Aut: Nicolaus Psilander (In laudem poeseos oratio metrica; quam, /.../ in Regia Academia Gustaviana Adolphina, /.../ die 10. Decemb. anno 1645. publice /.../ enarrabat Jacobus Petri Columbus, /.../. Dorpati Livonorum, 1646: J. Vogelius)                                                  Växjö LB, [UUB], [Tartu UB]

GRATULATIO

Praestantissimo et Literatiss.

DN. JACOBO COLUMBO,

de Laude Poëseos Docte, et Methodice

Peroranti.

 

                        Vectori Paphiae, murmur gemitusque per auras

                                    Fundenti, Nomij tibia blanda placet!

Dicam cur placeat: Phrygiam transvecta Dione,

            Orditur passim facta referre Midae.

            5          Arcadiae Numen canna stridente minatur

                                    Phoebo, qui cithara carmina docta canit.

                        Pana jubet Tmolus, citharae submittere cannas;

                                    Idque Echo, Dryades, ripa virensque jubet.

                        Judicium ast stolidum, stolidus vocat arbiter, ultro

            10                    Collaudans cannas Panos ubique Midas.

                        Hinc patulas aures, tarde gradientis Aselli,

                                    Induit, ut Foveae filia, cannae, refert.

                        Haec Cytherea docet, volucrum sed Chaoniarum

                                    Altera, dat murmur; Mira referra Deam.

            15        Simplicium ducens vectorum corda, Dione,

                                    Incipit et Deli dicere dona Dei:

                        Inclytus Amphion Thebanae conditor urbis,

                                    Phoebeja potuit saxa movere lyra.

                        Orpheus Eurydicen, Diti dum praecinit, aufert,

            20                    Tanta extat Virtus Artis Apollineae.

                        Haec vix absolvit: volucrum mox Chaoniarum

                                    Altera, colla movens decutit usque jugum.

                        Guttur, ait, querulum est; Viduo solatia desunt:

                                    Ut me detinuit, prodidit ipsa Dea.

            25        Deserit hinc Paphiam pernix, secat aethera pennis,

                                    Adque Helicona venit, discat ut Arte modos.

                        Hinc est quod viduum, videas cantare COLUMBVM:

                                    Nae, propter Daphnen tibia blanda placet.

Syncero syncere app.

Nicolaus Psilander,

Schmol-Svecus.

 

6. Adr: Jacobus Petri Columbus – Aut: Andreas Bergh (cf. 5)

Växjö LB, [UUB], [Tartu UB]

GRATULATIO

                        Avdi; mira loquor: resonant Academica Tempe;

                                    Culta Columbino carmina ab ore fluunt.

                        An non est culti Nasonis imago COLVMBVS?

                                    Est: o quam pulchre, culte COLVMBE, canis!

            5          Vera laudandam tu laudas laude Poësin,

                                    Quae facit ut famae stet sine morte decus.

                        Insta cantando; cane carmina culta, COLVMBE,

                                    Delius et meritas cinget honore comas.

                        Tandem ceu vivunt Nasoque Maroque Poëtae;

            10                    Carmine, sic vives, culte COLVMBE, tuo.

 TÁj filadelf…aj ›neka t©uta Ñl…ga

umenšwj prosšqhken

Andreas Bergh /

Wesman.

 

7. Adr: Dorothea Eckholtz – Aut: Laurentius Ludenius (Epicedion, in /.../ obitum ac abitum /.../Dorotheae Eckholtz, /.../ Henrici Staheln, per Ingriam, Narvam et Alentackiam superintendentis /.../ Regiique Consistorij Narvensis praesidis /.../ uxoris; quae /.../ die 17. Maij an. 1646. /…/ denata; cujusque exuviae, Narvae 29. die Julij, anno eodem, in templo recens /.../ extructo /.../ terrae commendabantur: scriptum ab amicis et condolentibus. Dorpati Livonorum, 1646: J. Vogel)

Linköping LB, [Tartu UB]

EPICEDIUM

Sub Persona pie Defunctae.

 

                        Primum ego vitalis postquam hausi luminis auras;

                        Patria me teneram cepit Revalia Civem.

                        Ipse ECKHOLTZiades meritis Pater optimus altis;

                        MARGARIS et Reyers Genitrix charissima nostra.

            5          Ut prognata, sacri Baptismatis amne renascor;

                        DOREOTHEA vocor; DOMINO concredita, vivo.

                        Dante Deo, cresco Natura mitis et annis,

                        Accrescit Pietas castaeque modestia vitae.

                        Doctior Aoniis Musis, Sophiaeque Magister

            10        STAHLIADES; CHRISTI sanctae Eusebiaeque Sacerdos;

                        Vidit; et ut vidit pulcrum per membra calorem

                        Traxit; et in socio conjungi optavit amore.

                        Annuit Omnipotens, et Proximitate Propinqui:

                        Ducimus una auram placidam, vitamque beatam:

            15        Et pulcra felix succrescit origine Proles.

                        Creditus HENRICUS Musae est, EBERHARDUS ut Armis;

                        Inde PHILIPPUS, adhuc tener est ARNOLDUS, et Infans

                        AXELIUS, DOMINO CHRISTO sacratus et Arti.

                        MARGARIS hinc Virgo, pia DOREOTHEAque vivunt,

            20        Aetherei donec Patris fert alma voluntas.

                        Sed pia Progenies mea, ADAMVS, et inde JOHANNES,

                        Et SOPHIA, et gemina in Partu demortua Proles;

                        Coetibus Angelicis felix sociata Propago.

                        At gravis exoritur macies, et corpora languent;

            25        Ut dia accepto sacrae solemnia Coenae:

                        Et Deus ipse jubet placido succedere Letho.

                        O Thalamis dilecte meis, venerande Marite,

                        Aeternum Salve! Salve Dilecta Propago!

 

DOREOTHEA ECHOLTS:

Per Anag.

ST! HOC A LETHO REDEO.

 

                        ST! Deflere mei tu noli funera fati,

            30        HOC A LETHO etenim REDEO, cum venerit aevi

                        Terminus; et CHRISTVS patefactis ossa sepulchris

                        Eliciet, pulcramque animam virtute reponet.

                                                                                        Quod ultimo honori ap.

Laurentius Ludenius, Ph. et J. U. D.

Poët. Cor. et in Regia Academia GUSTA-

                                                                                          VIana ADOLPHIna P.P.

 

8. Adr: Dorothea Eckholtz – Aut: Petrus Trottonius (cf. 7) Linköping LB, [Tartu UB]

EPICEDIUM

 

                        O Mors! o dirae, crudelia Numina, Parcae!

                        O Mors, collimas in cunctos spicula dira!

                        Ulli non parcis! nullo discrimine inermes

                        Obruis, et Martis Fortes prosternis Alumnos!

            5          Pauperies nec te; te opibus nec tardat onustus;

                        Nulla juvat Pietas, non flectit Amicus Amoris,

                        Non animi Candor, species nec corporis ulla;

                        Communi pariter gladio, Mors, guttura cingis!

                        Exemplum DORTHEIA oculis proponitur Eckholts:

            10        Dives Avis, Proavis; habitu et virtute coruscans,

                        Foeminei insigne exemplum gregis, et decus altum;

                        Ante diem, longam in noctem sua lumina claudit!

                        Vivere per multos dignissima Nestoris annos.

                        Non secus ac fumus, flos, ros, nix, somnia, bulla

            15        Evanescunt, et nequeunt durare per annos;

                        Sic abeunt nostri subito anni, tempus et aetas!

                        Sed miserae quid conquerimur nos tempora vitae,

                        Cum moeror, labor, atque angor sit longius aevum?

                        Plena est terra malis, suntque aequora plena malorum!

            20        Aut quid lugemus, quod sit violentia mortis?

                        Cum Mors aeternae sit candida janua vitae

                        Laetitiaeque: docet sacri ceu pagina Verbi.

                        Antistes Domini, chara viduate Marita,

                        Siste, precor, lacrymas; modulum quoque pone dolori:

            25        Non periit conjux; coeli laeta Incola vivit;

                        Et veniet tempus, tumulo quo membra resurgent,

                        Gaudia et hinc cernet coelorum, ubi vita perennat.

                        Pone modum lacrymis, nimium et sepone dolorem:

                        Cum pia sit Conjux dilecta in Prole renata.

            30        Discite vos Gnati, tristes deponere motus;

                        Immodicos fletus inhibere et discite Gnatae:

                        Sancta dato Genitrix laetans nunc vivit Olympo.

                        Tristitiae Gnati et Gnatae, praescribite finem:

                        Dante Deo, Pater est casus sortisque levamen,

            35        Sollicitusque piae officium Genitricis adaequat.

 

ANNO:

                        HIC DORTHAEA EChoLts Letho sopIta qVIesCo:

                        EXVLto at feLIX, et VIVo Deo assoCIata.[2]

                                                                                        In veram condolentiam paucula

                                                                                               haecce lugens fundebam

M. Petrus Trottonius,

Scholae Narv. Rector.

 

9. Adr: Dorothea Eckholtz – Aut: Nicolaus Psilander (cf. 7)

Linköping LB, [Tartu UB]

EPICEDIUM

 

DOROTHEA ECHOLT:

A'nagrammatizomšnh;

CLOTHO, TRAHE DEO.

 

            Omne quod immensus gremio complectitur orbis,

                                    Parcarum nutu fitque, caditque dato.

                        Atropos observat nunquam revocabile; CLOTHO

                                    Praesens; et Lachesis quaeque Futura tenet.

            5          Auxilio Themidos, commiscent mollia duris;

                                    Quod faciles nectunt, id facile inde secant.

                        Revaliae mihi Triga dedit, Miti Prothyraea

                                    In lucem nasci, et cernere facta Jovis.

                        Interea naevum, qui ferret semina Mortis,

            10                    Adjunxit Lachesis, Mater amara Necis.

                        Accrevi docta Charitum comitante caterva,

                                    Sed carpsi teneras non sine sente Rosas.

                        Splendida virtutis conantem visere tecta,

                                    Ad Limen pupugit consita sylva vepre.

            15        Haec Pubes didicit: Paulo sed adultior aetas,

                                    Innumeras rerum sustulit usque vices.

                        Arrisit primum sat blanda fronte Dione;

                                    Obtulit, ornavit quem Sophia Alma, Virum.

                        Viximus unanimes, Thalamum Soboles decoravit;

            20                    Crevit suppellex, undique crevit Amor.

                        HENRICUS, retinet Genitoris Nomina, Primus

                                    Qui Materna mihi nomina prima tulit.

                        Filius hunc sequitur, me deplorans, EBERHARDUS:

                                    Gaudia censebam, non peritura mihi.

            25        Sed quid? Adhuc Dominus Bina me Prole beavit,

                                    Anxia cui subito, Stamina, Parca scidit!

                        Dein viruit Sponda; hinc extant, MARGRETHA, PHILIPPUS,

                                    DOREOTHEA, manens Matris imago Patri;

                        Et Puer ARNOLDUS; Parcae quibus omnibus usque

            30                    Hucce pepercerunt: Fata benigna trahant!

                        Nec mora: Adhuc Summo placuit superaddere Gnatum;

                                    Sed, nondum Genito, stamina Parca scidit!

                        Nascitur hinc teneris qui nunc, AXELIUS, annis,

                                    Matris opem flebit, qua Puer orbus erit.

            35        Undecimae Soboli Natales, Triga, negavit,

                                    Cernere, et in vulva fila parata fidit.

                        Nunc demum Ilithyja gravis Genitalia clausit,

                                    Sanaque pauca mihi tempora Parca dedit.

                        Denique soeva Necem Lachesis meditatur; Adauget

            40                    Mox vires Naevi; Sic vigor omnis abit.

                        Omnis abit lusus, redeunt cum labe dolores,

                                    Et sensim CLOTHO tela cruenta parat.

                        Aegre nec patior, Superorum munere Mortem

                                    Concessam; Haec secula cuncta odiosa secat.

            45        Per varios casus, per tot discrimina rerum

                                    Tendimus in Patriam, quam dedit ipse Deus!

                        Idcirco, o CLOTHO, serves tua jura; Meamque

                                    Divam Animam, Summo nunc TRAHE rite DEO!

                        Tu cujus nivei mihi somnia laeta lacerti

            50                    Immisere, Vale! Chare Marite, Vale!

                        Vos Gnati, madidaeque genas Gnatae, quibus atra

                                    Dependet vestis, sistite lachrymulas!

                        Defunctam haud revocant fletus, nigricansve cothurnus;

                                    Non mala me patitur rursus adire Deus.

            55        Tempus erit, postliminij quo jure videnda

                                    Est Soboles Matri, et Chara Marita Viro.

                                                                                Cordis Condolentiae Contest. Causa

                                                                                                             apposuit

Nicolaus Psilander.

 

10. Adr: Dorothea Eckholtz – Aut: Andreas Bergh (cf. 7)

Linköping LB, [Tartu UB]

EPICEDIUM

 

Sub Persona pie defunctae.

 

            Ipsa EKHOLTIADUM clara de Gente Propago,

                        Clari uxor STAHLENS / DOREOTHEA fui.

            Natalem mihi chara dedit Revalia lucem;

                        Sed mihi lethalem Narva togata dedit.

5          Inde novo recubant tumulo mea molliter ossa,

                        Ipsa anima in sancta sede beata manet.

            Cumque qeoà fuerim dîron, repoposcit Iöva

                        Justo Judicio, quod fuit ante suum.

            Ergo mihi quondam STAHLI dilecte Marite;

10                    Et pia Progenies, lumina sicca refer.

                                    In signum condolentiae haec

                                                                                                                  pauca adjeci

Andreas Bergh /

                                                                                                                        Wesman.

 

11. Adr: Dorothea Eckholtz – Aut: Johannes Petri Kuuth (cf. 7)

Linköping LB, [Tartu UB]

EPICEDIUM

 

                        Incipe luctisonos, mea Clio, fundere Versus,

                        Cordivorumque meum nunc nunc reserare dolorem!

                        Tu Pater inde veni, Musarum Ductor Apollo,

                        Flebilibusque modis nostris sub moenibus altis,

            5          Tange lyram digitis, lugubria carmina finge!

                        Singultusque novos vos triplice Numina nodo

                        Blandidulae Charites, pro laeto fundite cantu!

                        Anxia proque jocis suspiria ducite Musae.

                        Scinde comas Pietas! niveam Spes rumpe Coronam!

            10        Pro violis piceam, verno pro flore cupressum

            Imponens capiti: Sunt omnia plena doloris.

                        Tu pariter Probitas luge! et tu blanda Venustas

                        Luctus pande novos! iterum lugete Camoenae!

                        Castalides mecum tristi date carmina voce!

            15        Moesta repercussis blateret quoque turribus Echo.

                        Occubuit rapidae mortis transfossa pharetris

                        DORTHEA, egregij Conjunx charissima STAHLI,

                        Qui Superattendentis habet sacra munera fidi,

                        Vasta ubi terra jacet Bellacibus Ingria Moschis

            20        Proxima, quam surgens tangit Livonia tractu.

                        Proh dolor! occubuit, quae vivere Nestoris annos

                        Digna fuit, sera non dum turbante senecta.

                        Proh dolor! occubuit, Conjunx dilecta Marito

                        Quae fuit, et charis Gnatis fidissima Mater.

            25        Et Virtute valens, natura mitis, et aequae

                        Delicium vitae, cunctis optata Venustas.

                        Heu Lachesis! Lachesis! quae te dementia coepit?

                        Quid procul inclamas? quid vult sibi ferrea Clotho?

                        Telegonive Parens magica, et furialis Erynnis?

            30        Atropos unde venit? cur fila virentia frangit?

                        Cur portat positum tristis Libitina feretrum?

                        Sicne probos reprobosque simul discrimine nullo

                        Tollitis hinc Parcae, mortisque immergitis umbrae?

                        Nil Pietas Probitasque juvat! Nil splendida Virtus;

            35        Nil Doctrina sagax; hominem nil blanda Venustas;

                        Nil Fortuna juvat; nil auri pondera Midae;

                        Nec quidquid gremio vastus complectitur orbis

                        Soeva valet subitae disrumpere spicula Mortis.

                        O damnosa dies! audax qua ferre Prometheus

            40        Ausus erat coelo calidos mortalibus ignes,

                        Nescius ipse mali damni sine fine sequuti.

                        Tunc Epimetheus: Pandora et tunc pixide sumpta

                        Intulit in mundum cujusvis semina morbi!

                        Exoritur macies, sanies, mala Pestis; iniquus

            45        Hincce tumor, febris, scabies, myrmecia, phlegma,

                        Tandem post varios quassantes corpora morbos,

                        Mors inopina venit, coecis adoperta tenebris,

                        Et dulces trepidis animas mortalibus aufert.

                        O fragilem Vitam! o volucrem pernicibus alis!

            50        Quam subito o hominis currentia stamina rumpunt

                        Parcae! quam subito nos fata propinqua fatigant.

                        Sed nos Christicolae, Virtus quibus Enthea cordi est,

                        Nos rapidae haud terrent Parcae, nec spicula Mortis,

                        Nec Stygiis quae sunt umbris concredita Monstra:

            55        Scimus enim vere quod vivificata resurgent

                        Corpora de tumulis, mundi cum clauditur aetas,

                        Et tuba per densas sonitum dat stridula nubes.

                        O STAHLI, Eusebiae et Christi Divine Sacerdos,

                        O pia Progenies Vita exoptata Parentum!

            60        Vincite vos lachrymas; pressum sub corde dolorem

                        Vincite; cordifluum superando vincite luctum!

                        Nam Mors haec, non Mors; venturae est Janua vitae,

                        Et posita ad nostrum Pastorem Semita Christum.

                        Non periisse potest, DORTHEA: o vivit Olympo!

            65        Cum Christo vivit! Superumque beata frequentat

                        Atria: et in dulci permulcet sidera cantu.

Vltimi Honoris et Condolentiae

contestandae ergo lugens

adiecit

Johannes Petri Kuuth /

Sudermannus.

 

12. Adr: Dorothea Eckholtz – Aut: Andreas Andreae Tremulander (cf. 7)

Linköping LB, [Tartu UB]

EPICEDIUM

 

            Dvm ver purpureis depingit floribus arvum,

                        Frondibus et sylvas, tempora laeta, ciet.

            Omnia tum laeto fundunt nova gaudia plausu,

                        Multis in terris jubila mille sonant.

5          Res sed nulla valet firmo consistere talo,

                        Heu permutatur quidquid hic orbis habet.

O dolor! o lacrymae! miscentur tristia laetis,

                        Florem vernantem tristia fata necant.

            Tempore, monstrat idem, DORTHEA beata, recenti,

10                    Praeclare docti Nomine et Arte Viri

            HENRICI STAHELENS quondam dulcissima Conjux,

                        Curva quae mortis falce perempta jacet!

            Eheu, quam subito nutantes claudit ocellos,

                        Quae longo Pylij tempore digna fuit.

15        Ah! merito luges, HENRICE Verende, Minervam!

                        Dimidium cordis noscis abesse tui.

            Ecce Dei cultrix! omni virtute coruscans!

                        Chara fuit superis Angelicisque choris.

            Comis erat cunctis, semper benefecit egenis,

20                    Vraniae soboli praemia opima tulit.

            Hincce, PATER, nimios expellito corde dolores:

                        Nam bene scis justo sic placuisse Deo.

            O Salve, exultans Anima! aetheris incola; Salve!

                        Salve deliciis coelica turba novis.

25        Laudibus aeternis extollis in aethere Jesum,

                        Et Sanctae Triadi cantica grata canis.

            Te beat Omnipotens, ut in axe nitente corona

                        Multis praecedas, luminis instar: Ave.

Condolens app.

Andreas Andreae Tremulander,

West-Gothia Svecus.

 

13. Adr: Dorothea Eckholtz – Aut: Johannes Henrici Aridlander (cf. 7)

Linköping LB, [Tartu UB]

EPICEDIUM

 

            D icite nunc, Musae, funebria carmina mecum

            O mnes, nunc moestos Elegeia solve capillos;

R elligiosa etenim DORTHEA benignaque Mater

O ccidit; occubuitque, annis dignissima seris.

5          T u Superintendens, Mecoenas maxime noster,

H eu tristis res est! magna est tibi causa doloris!

E heu! sola fuit rebus solamen in arctis;

A gnovit Christum; sacri mysteria Verbi

E xtulit ore pio; Legem meditando Jehovae;

10        C armina grata Deo recitavit nocte dieque.

C ongaudet pia mens jam Christo Coelitibusque:

H inc laete Ambrosia, fruitur quoque Nectare dulci.

O pie Mecoenas conceptos pone dolores;

L aeta dies tandem positis cum fulserit horis,

15        T empus erit, veteres ut nos meditemur Aristas.

Condolentiae E. apposuit

Johannes Henrici Aridlander,

Nöteb. Carel.

 

14. Adr: Dorothea Eckholtz – Aut: Mauritius Lemnerus (cf. 7)

Linköping LB, [Tartu UB]

EPICEDIUM

                       

            Fraudibus et rixis urbes, camposque refertos

                        Coedibus, alma domus, linquere moesta parat:

            Sed tibi pulchra domus quondam confertur et alma,

                        Vilia non te, sed praemia magna manent.

                                                                                                                        Paucula haec lugens adjicere

                                                                                                               voluit

Mauritius Lemnerus,

                                                                                                                  Naumb. Misn.

 

15. Adr: Dorothea Eckholtz – Aut: Benedictus O. Vegrelius (cf. 7)

Linköping LB, [Tartu UB]

EPICEDIUM

 

            O STAHLENA Domus, lacrymas quid fundis obortas?

                        Haud poterit Mater disperiisse tua.

            In vivis Regnum rutili sperabat Olympi;

                        Mortuaque hinc adiit Regna beata poli.

Condolens app.

Benedictus O. Vegrelius,

Suderman.

 

16. Adr: Dorothea Eckholtz – Aut: Daniel Danielis Nycopensis (cf. 7)

Linköping LB, [Tartu UB]

EPICEDIUM

 

Beate Defuncta loquitur.

 

            O perfausta dies, claudo qua fata suprema, et

                        Libera nunc tandem caelica tecta peto;

            Namque ego sat longe Morbi cruciamine pressa

                        Aegra fui: lecto decubuique meo.

5          Ast nunc educta omnino de clade malorum

                        Pro lacrymis habeo gaudia vera Poli;

            In quo festivo promo nunc JUBILA plausu

                        TRISAGIONque Deo Voce sonante cano.

            Ergo tuas lacrymas, mi blande Marite, relinque,

10                    Et cessa tristes edere voce sonos.

            Et mea tu Soboles, Gnati Gnataeque, subinde

                        Lachrymulis vestris ponite quaeso modum.

            Chare Marite, Vale; Simul et mea chara Propago,

                        Dux vitae his vitam reddet et Exuviis.

15        Terra VALE, discedo lubens hinc rapta per auras:

                        Coelum ter SALVE, triste Solumque VALE.

Syncerioris Condolentiae contestandae gratia,

haecce pauca lubens approper.

Daniel Danielis Nycopensis,

Sudermannia-Svecus.

 

17. Adr: Dorothea Eckholtz – Aut: Ambernus Haquini Printzius (cf. 7)

Linköping LB, [Tartu UB]

EPICEDIUM

 

            Omnia mutantur spatiosi corpora Olympi;

            Fulgentes Stellae; scandens super aethera Titan,

                        Atque subit varias transitione vices

                                    Luna bicornis.

5          Gentes Neptuni tumidis in fluctibus alti

            Qui degunt pelagi, ceu pennigerumque caterva,

                        Cantica quae tenui gutture grata canit,

                                    Fraude necatur.

            Bestiolae in densis quae pollent robore sylvis,

10        Nunc ferro, telis, laqueis nunc illaqueantur: 

                        Vernans en flectit sole cadente caput

                                    Herba caduca.

            Montes, convalles, nullo fulcimine nixa

            Alma parens tellus; mutant perduntque vigorem,

15                    Et nequeunt jam, jam sustinuisse situm

                                    Mole premente.

            Sic mortalis Homo mortis perstringitur ense,

            Durior exurit dum langvida corpora morbus.

                        Haud Croeso haud Iro parcere quippe sciunt

20                                Tristia Fata.

            O dolor! O lacrymae! decessit casta Magistri

            HENRICI Stahlens / quondam dulcissima, Conjunx!

                        Occubuit cito quae vivere digna fuit

                                    Nestoris annos.

25        Floruit haec Mater virtutibus aucta beatis;

            Ipsa sibi peperit decus immortale: Verendo

                        Vixit et ipsa suo chara Marita Viro

                                    Tempore toto.

            Salve Anima! exultans, caelestis gaudia vitae

30        Intras. O felix, felix super aethera pergis!

                        Jam Domino Christo jubila laeta canis;

                                    Vsque triumphas.

Ultimi honoris Ergo app.

Ambernus Haquini Printzius,

Westgothia Svecus.

 

18. Adr: Andreas Flojerus – Aut: Daniel Flojerus (Disputatio theologica in caput decimum septimum, a v. 1. usque ad finem, D. evangelistae Iohannis selectissimas notas exhibens, in Regia Academia Dorpatensi publicae censurae subjicietur, praeside Andrea Virginio, /.../ respondente Andrea Flojero, die < > Octob. anni 1646. Dorpati Livonorum, 1646: J. Vogelius)                            Växjö LB, BRAN, [Tartu UB]

GRATULATIO

                        Dante Deo, satagit, rimari sensa Minervae,

                        Doctus FLOJERUS, nostri pars pulcra Lycei

                        Pulchrum opus, ac Sanctum; defendere perge sacrata:

                        Perge pius: posthac et volve Volumina Sacra.

            5          Sic CHRISTI Sparges praeclarum nomen in orbe.

Fratri suo germano ita gratulari

voluit

Daniel Flojerus,

Smol. Svec.

 

19. Adr: Gustav Adolph – Aut: Laurentius Ludenius (Victricia arma, /.../ Gustavi Adolphi, /.../ patris herois; /.../ Christinae, filiae heroinae /.../ Svecorum, Gothorum, Vandalorumque regum; /.../ parentatione anniversaria, in Regia Academia Gustaviana Adolphina, quae Dorpati /.../ est  /.../ die 6. Novembris anno 1646. /.../ aeternitati consecrata a Laurentio Ludenio, /.../. Dorpati, 1646: J. Vogel.)[3]

SKB, UUB, Växjö LB, H, [Tartu UB]

DEDICATIO

REX

GUSTAVUS

ADOLPHUS.

Per Anagramma;

REX

AUGUSTUS

HAS DVPLO.

SS. Reg. Maj. tis Symbolum:

CUM DEO ET VICTRICIBUS ARMIS.

 

Gratia, Christe, tua est; Patriae Civemque Patremque

Quod gero, Res Sancti curo quod Imperij.

Gratia, Christe, tua est; quod Res Victricibus Armis

HAS REX AVGVSTVS conduplicando DVPLO.

            5          Christo Dante, mea Phoenix in Prole renatus

                                    Vivo: Deo Vivat Regia Progenies!

 

20. Adr: Ericus Harkmann – Aut: Magnus A. Höök (Disputatio theologica in caput decimum sextum a v. 1. usque ad finem, D. evangelistae Iohannis selectissimas notas exhibens, in Regia Academia Dorpatensi publicae censurae subjicietur, praeside Andrea Virginio, /.../ respondente Erico Harkman, /.../ die < > August. anni. 1646. Dorpati Livonorum, 1646: J. Vogelius)                        Växjö LB, BRAN, [Tartu UB]

GRATULATIO

                        Eusebiae tractas quod sacra negocia, ERICE,

                                    Inde tuus surgit non moriturus Honor.

                        Gratulor: Auspiciis tantis benedicat Iësus,

                                    Dulcia sic Patriae commoda ferre potes.

Honoris et Amoris ergo app.

Magnus A. Höök /

SS. Theol. Stud.

 

21. Adr: Ericus Harkmann – Aut: Israel L. Drysander (cf. 20)

Växjö LB, BRAN, [Tartu UB]

GRATULATIO

                        Gratulor ex animo tibi sympatriota, subinde

                        Quod video studio te ardenti incumbere Sacris,

                        Scripta Prophetarum et plenis addiscere votis.

                        Sunt, bene qui curant Diametrum mente profunda,

            5          Et Stellas numerant quotquot supra axe moventur:

                        At tibi sit curae, Christum cognoscere, nostrae

                        Justitiae fontem. Labor is parit ominor omen!

Ita Amico congr.

Israël L. Drysander,

Westmannus.

 

22. Adr: Ericus A. Holstenius – Aut: Laurentius Ludenius (Disputatio physica de metallis; quam, in Regia Academia Gustaviana Adolphina, quae Dorpati /.../ est  /.../ praeside /.../ Johanne Erici Stregnensi, /.../ discursus colloquio submittebat Ericus A. Holstenius, /.../ ad diem < > /.../. Dorpati Livonorum, 1646: J. Vogelius)

SKB, UUB, Lund UB, [Tartu UB]

GRATULATIO

Doctissimo et Humaniss. Dn. Respondenti.

ERICUS ANDREAE HOLSTENIUS:

Per Anagr.

DANTE IHESU, LENI SORS CURAE.

 

                        DANTE meo IHESU, LENI SORS candida CURAE:

                                    IHESU DANTE, viret SORS mea, CURA mea.

In felix auspicium p.

LAURENTIUS LUDENIUS, Ph. et J.U.D.

Poët. Cor. Prof. P.

 

23. Adr: Ericus A. Holstenius – Aut: Andreas Bergh (cf. 22)

SKB, UUB, Lund UB, [Tartu UB]

GRATULATIO

ERICUS HOLSTENIUS:

Per Anag.

CHRISTE, SOL VIVENS.

                       

                        Fulgens aes, aurum, ferrumque ac cuncta metalla,

                                    Orbis terrarum quae sinuosus habet;

                        Squalent neglecta; ast multo bene tacta labore,

                                    Splendida purpurei Solis adinstar erunt.

            5          Sic quoque neglectae squalens jacet indolis ardor:

                                    Assiduo ast usu, solis adinstar erit.

                        HOLSTENIUS docta penna scrutando metalla

                                    Ingenium splendens reddit ubique suum.

                        Hinc precor, hinc opto, VIVENS SOL, CHRISTE Redemptor,

            10                    Illius ut studiis semper adesse velis.

                        Et ceu purpureos radios Sol spargit in orbem,

                                    Sic spargat clarum nomen in orbe suum.

ANDREAS Bergh / Wesman.

 

24. Adr: Jonas Johannis <Scarensis> – Aut: Ericus Holstenius (Disputatio de politicae natura in genere; quam /.../ in Regia Academia Gustaviana, quae Dorpati est /.../ ad diem < > /.../ sub directione /.../ Johannis Erici Stregnensis, /.../ examinandam proponit Jonas Johannis Scarensis, /.../. Dorpati Livonorum, 1646: J. Vogelius)

UUB, Karlstad StB, [Tartu UB]

GRATULATIO

Doctrinae morumque laudibus Praestan-

tissimo Juveni,

Dn. Jonae Johannis Scarensi, de Politices

constitutione erudite disputanti

SÚgcarma.

 

                        In bello clarum sequitur pia adorea laudis,

                        Et Pietate gravis cinguntur tempora myrto:

                        Non secus in Clariis qui sudant rite palaestris,

                        Abstrusa et satagunt rimari sensa Minervae,

            5          Ornantur laude, et crinita cacumina sertis.

                        Egregiam posuisti operam, Doctissime Jona,

                        Pallados in castris; testes, tua scripta manebunt

                        Quae bene defendis, contorta sophismata solvens.

                        Ominor hinc laetus; Christo Duce et Auspice Christo,

            10        Tempus adest in quo tua cinget tempora laurus.

eÙno…ajc£rin prosšqhken

Ericus Holstenius,

Westman.

 

25. Adr: Andreas Johannis Limacius – Aut: Laurentius Ludenius (De diabolo oratio: quam, /.../ in Regia Academia Gustaviana Adolphina, quae Dorpati /.../ est  /.../ ipso die Michaëlis Archangeli <29.9> anno 1646. publice /.../ enarrabat Andreas Johan. Limacius, /.../. Dorpati Livonorum, <1646>: J. Vogelius)

SKB, UUB, Växjö LB, H, [Tartu UB]

GRATULATIO

Doctiss. et Ornatiss. Dn. Peroranti.

ANDREAS JOHANNIS LIMACIUS;

Per Anag.

DEUS ANCHORA LASSI ANIMI: NI!

 

                        Invidia volucer sic passim defluit hostis!

                        NI DEUS ANCHORA LASSI ANIMI tutissima nostri,

                        Humanas poterit mentes abducere Recto!

                        Sed DEUS ANCHORA LASSI ANIMI tutissima nostri,

            5          Hinc tantae Pesti invicta virtute resistam.

Quod app.

Laurentius Ludenius, Ph. et J.U.D.

Profess. Ord.

 

26. Adr: Andreas Johannis Limacius – Aut: Abrahamus Georgii Thavonius (cf. 25)

SKB, UUB, Växjö LB, H, [Tartu UB]

GRATULATIO

ANDREAS LIMACIUS.

'Anagr£m.

MILES ARDUA CANIS.

 

                        Usque subi! usque sies meliore levamine MILES

                                    Fortis et assiduus: macte labore sies.

                        ARDUA facta CANIS MILES pulcerrimus usque:

                                    Usque Deum laudes: hinc Satanamque fuges.

 

Item.

 

            5          Vox ut personuit tua docta per atria clare,

                        Admirata fuit plebs nostri Academica Coetus

                        Quando duces Stygios depingis et horrida Monstra;

                        In quorum numero primum se Cerberus offert

                        Tergemino capite et lingvis tribus: Inde seqvuntur

            10        Gorgones, Harpyjaeque truces: mox soeva Megaera,

                        Tisiphone, Alecto reprobis infecta venenis.

                        Describis coecis pallentiaque antra cavernis.

                        Ingenium laudo, nec non tibi gratulor inde.

                        Tartarei radiem quod taxas sic Phlegethontis

            15        Qua satagit justum prorsus traxisse sub Orcum.

                        Talia quo vero Monstra exsuperemus: ad almum

                        Nos revocas Christum, qui vicit Doemonis ausus.

                        Euge pium certamen inis! contendere perge,

                        Parnassi salvus sic summa cacumina scandes.

Humaniss. et Literatissimo Dn. Sympa-

triotae amice sc.

ABRAHAMUS GEORGII THAVONIUS.

 

27. Adr: Andreas Johannis Limacius – Aut: Benedictus O. Vegrelius (cf. 25)

SKB, UUB, Växjö LB, H, [Tartu UB]

GRATULATIO

                        Qvonam, LIMACI, tibi fundam pectore carmen?

                                    Artes Sacratas, dum sine fine colis;

                        Monstras egregie fraudes Satanae esse Malignas,

                                    Qui Sanctis astu tristia corda parat.

            5          Carcere sed clausus, sed pressa compede vinctus,

                                    Ne nos Lethaeae gurgite mergat aquae.

                        Ardua res, fateor; res est foecunda laborum;

                                    Tu tamen hanc profers auxiliante Deo.

                        Perge piis coeptis; Technas narraque Colubri,

            10                    Perge; doce technas Daemonis effugere.

                        Perge, sacris Studiis consumere dulcius aevum.

                                    Perge, et constanti Numina corde time.

Ita Amico fido gratulari voluit

Benedictus O. Vegrelius,

Suderm.

 

28. Adr: Jacobus Petri Malbeckius – Aut: Laurentius Ludenius (In salutiferam resurrectionem Domini et Salvatoris nostri Jesu Christi, oratio: quam, /.../ in Regia Academia Gustaviana Adolphina, quae Dorpati /.../ est /.../ primis Feriis Paschatos an. 1646. publice /.../ enarrabat Jacobus Petri Malbeckius, /.../. Dorpati Livonorum, <1646>: J. Vogelius)                                       SKB, UUB, Växjö LB, [Tartu UB]

GRATULATIO

Doctiss. et Ornatiss. Dn. Peroranti.

JACOBUS PETRI MALBECCIUS:

Per Anag.

SIC PULCRE IBO! BEAT AMICUS.

 

                        SIC PULCRE IBO! BEAT me Christus AMICUS: Avernum

                                    Vincit is, et pedibus Tartara nigra premit.

In felix auspicium app.

Laurentius Ludenius, Ph. et J.U.D.

Profess. Publ.

 

29. Adr: Jacobus Petri Malbeckius – Aut: Andreas Flojerus (cf. 28)

SKB, UUB, Växjö LB, [Tartu UB]

GRATULATIO

                        Scrutantur multi Stellata Palatia Coeli!

                        Discere nec possunt penetrantis acumine mentis,

                        Quomodo splendentes sparsaeque per aethera gemmae

                        Perpetuis radient flammis, rapidoque rotentur

            5          Motu! Quod nitidus Phoebus se attollit ab undis,

                        Atque iterum Hesperias festinus tendit ad Oras!

                        Noctivagae Lunae scrutantur cornua multi,

                        Quomodo nascantur, decrescant, atque recrescant!

                        Ast tu, MALBECCI, nostri pars pulcra Lycei,

            10        Ardua scrutaris volvisque Volumina Sacra,

                        Dum bene demonstras, ima tellure reposti

                        Quod surgant iterum, redeant ac lucis in auras;

                        Ceu redit in vitam, domita vi mortis et Orci,

                        CHRISTUS, quando dies se tertia protulit orbe.

            15        Ne cesses, opto, mysteria volvere sancta,

                        Charus eris Patriae, dilectus eris quoque Amicis.

Sympatriotae meo dilecto ita

gratulari volui

Andreas Flojerus,

Smolandia Svecus.

 

30. Adr: Jacobus Petri Malbeckius – Aut: Andreas A. Malmenius (cf. 28)

SKB, UUB, Växjö LB, [Tartu UB]

GRATULATIO

                        Si Carmen possem felici scribere vena

                        Ipse, JACOBE, tibi faustissima cuncta voverem,

                        Dum docta pergis tractare volumina mente,

                        Vnde honor, et nomen, rerum et rata copia crescit.

            5          Ad lychnum vigilas; Divini Oracula Verbi

                        Tractas; et DOMINI meditaris vulnera Christi.

                        Perge piis animis: Studiis incumbere perge,

                        Et capies sancti felicia praemia coepti.

Lubens app.

Andreas A. Malmenius,

Sudermannus.

 

31. Adr: Jacobus Petri Malbeckius – Aut: Petrus Torstani Loohm (cf. 28)

SKB, UUB, Växjö LB, [Tartu UB]

GRATULATIO

                                               Dulcius est quid,

                                               Quam bene posse

                                               De venerando

                                               Principe JESU

                                 5            Sic meditari?

                                               Ut facit ille

                                               Frater amicus

                                               Nomine Malbeck.

                                               Perge: supremum

                                 10          Dilige JESUM.

Haec amicae Fraternitatis E. app.

Petrus Torstani Loohm /

Smalandus.

 

32. Adr: Jacobus Petri Malbeckius – Aut: Andreas M. Rydelius (cf. 28)

SKB, UUB, Växjö LB, [Tartu UB]

GRATULATIO

                        Eusebiae Studium dum tractas mente subinde,

                                                Docte JACOBE,

                        Hinc Patriae atque Tuis commoda multa feres.

                        Gratulor usque tibi, grator Genitoribus una

            5                                  Pectore toto;

                        Ardua res studiis invigilare piis.

Amicitiae contestandae

E. appos.

Andreas M. Rydelius.

 

33. Adr: Gabriel Benedicti Oxenstierna – Aut: Laurentius Ludenius (SS. Reg. Maj. regnorumque Sveciae ac Gothiae senatori /.../ Gabrieli Benedicti Oxenstierna, /.../ Regni Sveciae archithesaurario et judici provinciali Wermelandiae, etc. /.../ a SS. Reg. Maj. generali gubernatori per Livoniam /.../ electo et constituto; ac die 4. Februarij, anno 1646. /.../ Dorpatum ingredienti; /.../ in Regia Academia Gustaviana Adolphina, quae Dorpati /.../ est /.../ ex voto /.../ rectoris, totiusque senatus academici, /.../ app. animus et calamus Laurentij Ludenij, /.../. Dorpati, 1646:J. Vogel)

UUB, [Tartu UB (def)]

PROSPHONETIKON

 

                        Aeternus Pater, et Soboles, Consorsque Duorum

                        Spiritus, in Trino Deus unum Numine Numen;

                        Cuncta cui, quondam quae praeteriere, vel adsunt,

                        Quaeque etiam extabunt, soli sunt prompta patentque:

            5          Et dat dispositis consurgere Legibus Orbem,

                        Atque sacro imperio praescriptos reddere cursus:

                        Hunc laetum Musisque diem, Levonumque saluti

                        Esse velit: gratusque Virum fragor aethera pulset.

            Ardua Progenies Heroum, ille inclytus Heros,

10        Illustri Illustris GABRIEL de Gente, Potentum

            OXENSTIRNORUM Decus immortale Baronum.

            Regni Delicium; cui rerum maxima Virtus,

            Divinos inter Regni Proceresque Patresque

            Supremis proferre dedit de rebus habenda

15        In dubiis Responsa, pias et reddere voces;

            Inde; Ostentat ubi celsas Stokholmia turres,

            Dives opum, velut in pelago molimine magno

            Constructa; Arctoo multum exornata potenti

            Imperio; Sveonum nitidissima gloria Gentis;

20        Dexter adest. Genus Aligerum, Gens incola coeli.

            Angelici stipant cunei, comitantur euntem.

            Illustris sancte meritis Illustribus Heros

            Ille, GUBERNATOR GENERALIS, Praeside CHRISTO,

            Audiet, et sancti terras ditione fovebit

25        Qua Boream acclivi sequitur Livonia tractu,

            Et sese immensis terris Esthonia tollit,

            Sanctaque Dorpta sui Mundi Microcosmus habetur.

            Exoptata novis oritur fortuna triumphis,

            Vox canit, ingentes visunt Capitolia pompas,

30        Tranquillosque animos Clemens Praesentia plausu

            Imbuit, et votis felix allabitur aevum.

            Terrestre o Numen, Divus GUSTAVUS ADOLPHUS,

            Diis genitus, sanctis invictus viribus Heros,

            Dulce jubar Sveonum, Gothorum Phosphorus orbis,

35        Quem sibi Consiliis Socium conjunxit, et alti

            Esse Senatorem Regni, Christo Auspice, jussit;

            Salve Heros! Regni Salve Divine Senator,

            Illustris Salve sanctis Regalibus actis!

            Soepius, Augustus Rex, Illustrissimus Heros

40        Cum procul a Patria per bella recederet acta;

            Heroës sancte Illustres Illustribus ausis

            Salvete, in quos se cura inclinata reflexit

            Dilectae Patriae, et nitidissima commoda Regni!

            Soepius, Augustus Rex, Illustrissimus Heros,

45        Cum procul armisonas acies, fortesque phalanges

            Duceret, alternans DOMINI vi praelia; donec

            Arctous veluti Simpson GUSTAVUS ADOLPHUS

            Clauderet in longum victricia lumina somnum;

            Heroës Salvete Viri; Salvete, Beati

50        Usque Senatores Regni: Regalibus Actis

            Salvete Illustres! Posuistis moenia Musis,

            Per sanctos usus aggressi tollere portas

            Ut gressum inferret seclorum Gloria CHRISTUS.

            Regia Progenies GUSTAVI Regis ADOLPHI,

55        Heroina, Decus Patriae, CHRISTINA, Serena

            Arctoo Regina Throno, Solioque verenda,

            Inclyta Divino sensu tenet Acta reposta;[4]

            Sanctaque Dexteritas animis vigilantibus haeret.

            Regalis donec nascenti flore Juventus

60        Adderet Augustos animos crescentibus annis,

            In totam Regni quorum deducta Salutem

            Cura fuit; Salvete! Genus sublime Deorum

            Salvete! et vitae sint immortalia secla!

            Et tu, sublimis meritis illustribus Heros,

65        Celse Gubernator Levonum, Salve; Auspice CHRISTO,

            Orbem sub placidos Legum dimitte recessus.

            Salve; et, Dante Deo, Divinos Numinis haustus

            Enthea Relligio Populorum in pectora spargat.

            Salve; et Dorpati vireant Academica Tempe,

70        Dedita Virtuti, et castis habitacula Musis.

            Salve; et compostis[5] pacatum moribus aevum

            Exsurgat: Surgat nostro Gens aurea Mundo,

            Et sancti felix Reverentia floreat Aequi,

            Salve; et multa ferat leni medicamina dextra

75        Phoebus, et utatur relevantis viribus herbae.

            Salve; et Cecropiae madidi Latiaeque Minervae

            Artibus accrescant; vitaeque prioris in acta

            Irrumpat sanctusque Pudor, Verumque, Bonumque.

            Salve; et ruris amor totos florescat in annos,

80        Sitque frequens herbis tellus, et frugibus aestas.

            Salve; et Nobilitas tota illustretur; et Urbes

            Totae illustrentur, Regioni ditia mittant

            Munera, quae transmittit Arabs, quae decolor Indus,

            Quaeque Novo quaeruntur opes dudum Orbe reperto.

85        Salve; et venturo laetentur tempora seclo,

            Et Rex introeat CHRISTUS rata Gloria Terrae.

            Nos laetanti omnes testamur gaudia vultu.

            Optamus celsi florem longissimus aevi

            Terminus instauret, laetissima floreat aetas,

90        Stet fortuna Domus Illustris Stirpe Potentum

            OXENSTIRNORUM: Sancta Pietate vocante,

            Erecto coelum vultu petat Enthea Virtus,

            Atque per immensas surgant encomia terras.

            In Regia Academia GUSTAVIana ADOLPHIna,

quae Dorpati Livonorum est ad Embeccam,

Ex Voto Magnifici Dn. Rectoris,

totiusque Senatus Academici,

Ita humiliter app. animus et calamus

Laurentij Ludenij, Ph. et J.U.D.

Poët. Cor. Professoris Juris, Oratoriae,

et Poëseos.

 

34. Adr: Erasmus Pegaw - Aut: Laurentius Ludenius (In /.../ obitum /.../ pueruli Erasmi Pegaw, /…/ reverendi /.../ Erasmi Pegaw, ecclesiae Esthonicae, quae Christo Dorpati ad D. Johannis aedem colligitur, pastoris /…/ filioli, die 9. Mart. anno 1646. nati, ejusdemque 29. Maji, pie in Christo denati, et die 2. /.../ Junij ibidem  /…/ illati, scriptum a condolentibus. Dorpati Livonorum, 1646: J. Vogel.)     UUB, [Tartu UB]

EPICEDIUM

 

ERASMUS PEGAVV:

Per Anag.

Sub Persona pie Defuncti.

SUPERA AUGEMUS.

 

                        Postquam prima dies vitalem tradidit auram

                        Et vidi exorti pulcerrima lumina Solis;

                        In me tota pij transfertur cura Parentis,

                        Ut SUPERum AVGEri possit praenobile Regnum.

            5          Hinc natus, sancti Baptismatis amne renascor,

                        Accipioque Infans Vndamque Auramque salubrem:

                        Praeteritas maculas, primi delicta Parentis

                        Christus in amne lavat, me sacra beantque Lavacra.

                        Jam blande SVPERAm tener Infans AVGEo vitam.

            10        Et risu incipio dilectos nosse Parentes;

                        Vt me, Christe, jubes mortali excedere seclo;

                        Meque vocas SVPERi delecta ad gaudia coeli.

                        Jam SVPERA AVGEMVS, supremum intramus Olympum:

                        Summa dies mortis, vitae Natalis et ille             

15        Transitus e vivis, vitae est caelestis origo.

                        Aeternum mihi dilecti Salvete Parentes,

                        Nos SVPERA AVGEMVS, supremum intramus Olympum.

In pium solamen sc.

Laurentius Ludenius, Ph. et J. U. D.

Poët. Cor. Prof. P.

 

35. Adr: Erasmus Pegaw - Aut: Andreas A. Malmenius (cf. 34)            UUB, [Tartu UB]

EPICEDIUM

 

                        Proposita a Domino lex est mortalibus una,

                                    Perpetuo in cunctos quae sua jura tenet,

                        Nascaris, denascaris per tempora rerum,

                                    Mutat ut alternas florida planta vices.

            5          Parvulus hoc Infans nobis demonstrat ERASMUS,

                                    Delicium Matris, Deliciumque Patris,

                        Ante aliquot Menses vitales natus in auras,

                                    Nos sperabamus tempora longa fore.

                        Ut vero sensit fallacia gaudia Mundi,

            10                    In primo vitae limine clausit iter.

                        Pulcram animam Christus vocat ad se, qui dedit illam,

                                    Illam intrat summi tecta beata poli.

                        Sistite dilecti lachrymas Materque Paterque,

                                    Filiolus Christo consociatus ovat.

Lugens cecinit

Andreas A. Malmenius.

 

36. Adr: Erasmus Pegaw - Aut: Caspar Pegaw (cf. 34)                        UUB, [Tartu UB]

EPICEDIUM

 

                        Siccine nos linquis, mi dilectissime Frater,

                                    Et nos extrema voce valere jubes?

                        Tertia vix pallens complevit cornua Luna,

                                    Coepisti ut vitae limen inire tuae.

            5          Nunc recubas Lethi telis transfossus acutis,

                                    (Proh dolor) ut tetris vermibus esca sies.

                        O dolor! O lachrymae! res o gravis! O grave vulnus!

                                    Laetitia est omnis funere pulsa tuo.

                        Verum jam cum jus sit inevitabile fati,

            10                    Omnibus est somni mors subeunda soror:

                        Marmorea placide, Frater, requiesce sub urna,

                                    Donec reddiderit Buccina sera sonos.

Haec inter lachrymas fratri suo

charissimo fudit

Casparus Pegaw.

 

37. Adr: Petrus Caroli Undenius – Aut: Johannes Erici Stregnensis (Disputatio theologica in caput decimum quartum a v. 1. usque ad finem, D. evangelistae Iohannis selectissimas notas exhibens, in Regia Academia Dorpatensi publicae censurae subjicietur, praeside Andrea Virginio, /.../ respondente /.../ Petro Caroli Undenio, /.../ die 29. Maji anni 1646. Dorpati Livonorum, 1646: J. Vogelius)

Växjö LB, BRAN, [Tartu UB]

GRATULATIO

Claritate, Doctrina, et moribus Praestantissimo

atque Ornatissimo Viro-Juveni,

Dn. M. PETRO UNDENIO,

Respondenti.

 

                        His Evangelium occultum quondam fuit oris,

                        Dum simulachra Deum falsos reddentia vultus

                        Errorum sparsit multorum devius error.

                        Verum Evangelium; Christo duce, et Auspice Sancta

            5          Regina; hinc pulcras vires acquirit eundo,

                        Quando Academiacas felici Numine nostras

                        Jam Cathedras scandit summi Sapientia Coeli,

                        Et Doctrina Dei Levonum bene dicit in oris,

                        Quanta sit aeterni in nos indulgentia Patris,

            10        Quantus amor Christi, quamque aureus Halitus ille

                        Corda Renatorum percurrens Numine Sancto.

                        Eusebiae o Sanctae, et Sophiae Celebrande Magister,

                        Felix qui Summae Triados praeconia dicis,

                        Nosque vocas rutilos immensi ad luminis ignes.

Ita gratulari voluit

M. Johannes Erici Stregn.

Astronom. et Phys. Prof. P.

 

38. Adr: Petrus Caroli Undenius – Aut: Sigvardus Walling (cf. 37)

Växjö LB, BRAN, [Tartu UB]

GRATULATIO

                        Mavortis miles maculata sangvine arena,

                                    Qui cupide certat praemia grata capit.

                        Musarum miles Clariis luctatur in arvis,

                                    Dum cupide certat munera larga capit.

            5          Et Sophiae decus, UNDENI tu Clare Magister,

                                    Ingenue certans praemia Sacra feres.

                        Perge, stude, bene disce, doce; sic tempora cinget

                                    Immarcessibili fronde (quod opto) Deus.

Non tam moris, quam amoris ergo app.

Sigvardus Walling.

 

39. Adr: Petrus Caroli Undenius – Aut: Tholetus Tholeti Arvicander (cf. 37)

Växjö LB, BRAN, [Tartu UB]

GRATULATIO

                        Diversos diversa juvant, quod spreverit alter,

                                    Alter amat: tristis sunt rata verba sonis.

                        Ensiferi quidas Mavortis castra sequuntur,

                                    Hostilique ferunt vulnera facta manu.

            5          Caerulei quidam Neptuni regna pererrant,

                                    Ut teneant multas divitis orbis opes.

                        Squamigeros quidam pisces venarier hamo

                                    Gaudent, quos udos soepius unda ferit.

                        Invalidas quidam tentant captare volucres,

            10                    Insidiasque feris nocte dieque struunt.

                        Vana sed haec vulgi delectamenta feruntur,

                                    Nec sunt ingenuo pectore digna pati.

                        De meliore luto pia cui praecordia Titan

                                    Finxit, in Aoniis impiger ardet agris.

            15        Hinc etiam, UNDENI, Clariarum Fama Sororum,

                                    Musarum cupida munera mente legis.

                        Tu non astutis contorta sophismata nodis

                                    Sectaris; Iovae tu sacra verba colis:

                        Quae nos omniscij docuit Sapientia Christi,

            20                    Filius ille hominis, Filius ille Dei.

                        Desuda sacris haurire e frontibus undas,

                                    Et bene caelesti sede beatus eris.

Ita Sympatriotae et Amico suo singulari

gratulari voluit

Tholetus Th. Arvikander,

Wermelandus.



[1] Idem 1636.14; 1643.21; 1644.4; 1645.13; 1647.17; 1648.13; 1649.16; cum variatione 1648.12; cf. 1641.11; 1642.19-20.

[2] Distichon annum 1646 exhibens

[3] Idem 1636.25; 1643.46-47; 1644.15; 1645.47; 1647.37; 1648.25; 1649.22.

[4] Reposta pro reposita U metri causa

[5] compostis pro compositis metri causa.