1648

 

1. Adr: Andreas Arvidi <Stregnensis> – Aut: Johannes Erici Stregnensis (Disputatio medica de natura et constitutione medicinae; quam, /.../ in /.../ Academia Gustaviana Adolphina, quae Dorpati /.../ est /.../ ad diem 2. Septembris anno 1648. /.../ sub praesidio /.../ Sebastiani Wirdig, /.../ publice ventilandam exhibet Andreas Arvidi Stregnensis. Dorpati Livonorum, 1648: J. Vogelius)                                 H, [Tartu UB]

GRATULATIO

Praestantissimo atque Doctissimo Juveni,

DN. ANDREAE ARVIDI STREGNENSI,

de Natura Medicinae disputanti.

 

                        Sic posthac succos, sic auxiliantia morbis,

                                    Gramina multa, manu dexteriore leges:

                        Quid faciat somnos, quid hiantia vulnera claudat,

                                    ANDREA, addisces candidiore via:

            5          Quae ferro cohibenda lues, quae cedat et herbis,

                                    Aegrotis docta dixeris arte Viris.

                        Intima Naturae, gravium rata pondera rerum,

                                    Et referes doctus quicquid Apollo refert.

                        Mitia miscebis crebro medicamina dextra,

            10                    Ad medicam veniet cum male sanus opem.

                        Sit faustum et felix: venias Podalirius aequus;

                                    Dante DEo, auxilium succus et herba feret.

Sic Amice gratulatur

M. Johannes Erici Stregnensis,

Mathemat. Super. et Physic.

Profess. Publ.

 

2. Adr: Andreas Arvidi <Stregnensis> – Aut: Andreas Erici Fridzbergius (cf. 1)

H, [Tartu UB]

GRATULATIO

ANDREAS ARVIDI STREGNENSIS,

n. negato, per 'Anagr.

ARTE ARDENS, INDE SIS GRAVIS.

 

                        ARTE Machaonia o ARDENS Stregnensis Amice,

                                    Principibus gratus plurima dona dabis.

                        Semper SIS ARDENS, Artem cognoscito coeptam,

                                    SIS INDE effulgens dexteritate GRAVIS.

Dn. Respondenti

moris et Honoris ergo

posuit

Andreas Erici Fridzbergius.

 

3. Adr: Andreas Arvidi <Stregnensis> – Aut: Laurentius Ludenius (Disputatio ethica de fortitudine, quam /.../ in Regia Acad. Gustaviana, quae Dorpati /.../ est, sub praesidio /.../ Johannis Georgii Gezelii, /.../ pro summo in philosophia gradu consequendo, publicae /.../ censurae ad diem 27. Octob. /.../ submittit Andreas Arvidi Stregnensis. Dorpati Livonorum, 1648: J. Vogelius)

UUB, SKB, H, [Tartu UB]

GRATULATIO

Praestantissimo et Humanissimo

Dn. Respondenti.

ANDREAS ARVIDI STRENGNENSIS:

Per Anag.

INARDENS VADAS TERRIS INGENS!

 

                        Et Sophiae et sanctae studio Pietatis INARDENS

                        His VADAS TERRIS INGENS! Tua Nomina crescant.

Quod animitus app.

Laurentius Ludenius, Ph. et J.U.D.

Poët. Cor. Profess. Ord.

 

4. Adr: Andreas Arvidi <Stregnensis> – Aut: Andreas Fridzbergius (cf. 3)

UUB, SKB, H, [Tartu UB]

GRATULATIO

ANDREAS ARVIDI STREGNENSIS:

Per Anag. dup.

ARDVA SIS REGNIN’ ARS? EN TENDIS;

NONN’ ARTE AD SIDERA VERGIS? SIS.[1]

 

                        STREGNENSIS, nostri Decus immortale Lycei,

                                    Salve! Honor et virtus, Gloria teque beat.

                        ARDVA SIS REGNIN’ ARS[2]? EN nunc TENDIS ad astra?

                                    Nominis et splendor fulget in orbe tui.

            5          NONN’ et Divina laetus jam AD SIDERA VERGIS

                                    ARTE? imo? felix omine, fausta precor.

                        I nunc, quo tua te mentis vocat ardua virtus,

                                    Nobile iter virtus pandet ubique tibi.

Amico suo dilectissimo ex animo sic

gratulari voluit

Andreas Fridzbergius,

W-Gothus.

 

5. Adr: Andreas Arvidi <Stregnensis> – Aut: Petrus P. Byringius (cf. 3)

UUB, SKB, H, [Tartu UB]

GRATULATIO

ANDREAS ARVIDI:

Per Anagr.

DAS ARDUA INIRE.

 

                        DAS documenta viris, Valeat quid Gloria belli;

                        Fortibus et factis, quid Virtus praestet in armis.

                        Fortis, non pavidus; non Segnis mollia tractans;

                        Sed virtute potens erit, et formidinis expers.

            5          ARDUA INIRE refers: sed praebent ARDUA Laurum.

                        Certandum est, nulli veniunt sine Marte triumphi,

                        Et palmam pretium Solus, qui currit, habebit.

                        ANDREA, Aoniae pars non postrema catervae;

                        Dum Martis scripto sic DAS documenta polito;

            10        Artis honore clues, probat Exitus acta futurus.

                        Namque brevi fiet, frondescent tempora Lauro.

Quod ipsum ex animo gratulabundus

adjecit

Petrus P. Byringius.

 

6. Adr: Andreas Arvidi <Stregnensis> – Aut: Ericus Kolmodinus (cf. 3)

UUB, SKB, H, [Tartu UB]

GRATULATIO

ANDREAS ARVIDI STREGNENSIS:

Per Anagr.

ARDUA RES! IN REGNIS DAT ENSIS.

 

                        IN REGNIS, ENSIS RES ARDUA rite videtur:

                                    DETur ut optata pace deinde frui.

                        IN REGNIS ENSEM Lex ARDUA et ipsa requirit:

                                    Tollitur hinc nocuum, perstat et innocuum.

            5          Omnia disponit Lex, Ensis, Fortior Heros:

                                    Talia sint genio complacitura tuo.

A teneris Amico haec dedit

Ericus Kolmodinus,

Sudermannus.

 

7. Adr: Magnus Samuelis Asp – Aut: Petrus Caroli Undenius (Disputatio I. de natura politicae, et subjecto ejus republica in genere. Quam /.../ in Regia Academia Gustaviana publico /.../ examini subjiciunt /.../ Joachimus Crellius, /.../ et Magnus Asp, /.../ ad d. 16. Augusti /.../. Dorpati Livonorum, 1648: J. Vogelius)

UUB (def), [Tartu UB]

GRATULATIO

Praestantissimo atque Literatissimo Respondenti

DN. MAGNO SAMUELIS ASP

OstroGotho; Amico suo syncere

dilecto.

 

                        Ubera Castalidum sugis, Doctissime Magne, et

                                    Dulci Pieridum Nectare labra rigas.

                        Vertere tu pergis sacrata volumina Phoebi;

                                    Atque sofîn flores nocte dieque legis;

            5          Ad lychnum vigilas, concinnas publica scripta:

                                    Defendis docta dexteritate theses.

                        Hinc scandis cathedram; solerti et acumine mentis,

                                    Crellio honorato Praeside, solvis opus.

                        Felix perge Rei communis noscere causas;

            10                    Et tibi per Musas fama perennis erit.

Ex animo ita gratulari debuit

ac voluit

M. Petrus Caroli Undenius,

W-Gothus, SS. Theol. Stud.

 

8. Adr: Magnus Samuelis Asp – Aut: Laurentius Ludenius (De Spiritu sancto oratio metrica: quam, /.../ in Regia Academia Gustaviana Adolphina, quae Dorpati /.../ est /.../ secundis feriis Pentecostes, anno 1648. publice /.../ memoriter enarrabat Magnus Samuelis Asp, /…/. Dorpati Livonorum, <1648>: J. Vogelius)

SKB, UUB, Växjö LB, [Tartu UB]

GRATULATIO

Humaniss. et Doctiss. Dn. Peroranti.

MAGNUS ASPE:

Per Anag.

MUSA, PANGES!

 

                        MUSA, pios PANGES Versus! Flatusque Sacrati

                                    Splendeat aeterna laude perennis Honor!

Quod app.

Laurentius Ludenius, Ph. et J.U.D.

Profess. Ord.

 

9. Adr: Magnus Samuelis Asp – Aut: Andreas Arvidi <Stregnensis> (cf. 8)[3]

SKB, UUB, Växjö LB, [Tartu UB]

GRATULATIO

MAGNUS SAMUELIS ASP/

OSTROGOTHUS:

h in t verso,

Per 'Anagr.

O, LOTVS GVSTV MAGNA EST!

REM SAPIS![4]

 

                        Quot Capita en dantur, tot sunt et Sensus iisdem:

                                    Juris ei Studium, Mi Medicina placet.

                        Artibus Eusebiae MAGNA o Mysteria, MAGNE,

                                    Eloqueris genij candidioris ope!

            5          Flamine de Sancto discurrere; MAGNA suävi

O LOTUS GUSTU EST! REM SAPIS ipse tuam.

Honoris et Amoris E. apposuit

Andreas Arvidi Stregnensis.

 

10. Adr: Jonas Bringander – Aut:  Laurentius Ludenius (De servis oratio juridica: quam, /.../ in Regia Academia Gustaviana Adolphina, quae Dorpati Livonorum est /.../ die 15. Martij anno 1648. publice /.../ memoriter enarrabat Jonas Nicolai Bringander, /.../. Dorpati Livonorum, 1648: J. Vogelius)                                    Växjö LB, [Tartu UB]

GRATULATIO

Doctiss. et Ornatiss. Dn. Peroranti.

JONAS NICOLAI BRINGANDER:

Per Anag.

IN BONO! IN RE DIGNA, ALACRIS!

 

                        IN BONO o esto ALACRIS! CHRISTO Duce, o esto Camoenis

                                    IN RE DIGNA ALACRIS! Sic labor ille Beat.

In felix ausp. ap.

Laurentius Ludenius, Ph. et J.U.D.

Prof. Ord.

 

11. Adr: Christina – Aut: Laurentius Ludenius (In Regia Gustaviana Adolphina Academia, quae Dorpati Livonorum est ad Embeccam, Volumen I Orationum, /.../ A nobili et studiosa juventute, moderatore Laurentio Ludenio, Ph. et Poët. Cor. Professore Juris, oratoriae et poëseos, publice et solenniter habitarum. Dorpati Livonorum, 1648: J. Vogelius)

Stockholm KB

(Sv. Saml.

Före 1700

Litt. Nylat.

Tal. Univ.

F 1700

2558)

DEDICATIO

 

Serenissimae et Potentissimae Principi

ac Dominae,

DN.

CHRISTINAE,

Dei Gratia, Svecorum, Gotho-

rum, Vandalorumque Reginae, et Principi Hae-

reditariae; Magnae Principi Finlandiae;

Duci Esthoniae et Careliae; Domi-

nae Ingriae, etc.

Victrici, Piae, Felici, Augustae, etc.

Vitam, Incolumitatem et Felicitatem

p.p.

 

                        Arctoo REGINA Throno Solioque Serena

                                    CHRISTINA; Ante Jovem progenerata Decus:

                        Majestate Dei concluditur omne, quod usquam est,

                                    Qua sine nil rerum stare, vel esse potest:

            5          Hujus decurrens, REGINA, ad munia; Eidem

                                    Majestate haeres proxima, sancta C£rij.

 

CHRISTINA

REGINA SVECIAE:

Per Anagr.

CHARIS

IN REGNA SVECIAE.

 

                        Dante deo, Tu Sancta Charis: tenet Eusebie alma

                                    Primas, hinc Arete, hinc pulcrior Eutychie.

                        Sancta Charis, Charitum Regni trahis impete robur:

            10                    Mista Animo Charitos cum Jove Svada Dea.

                        Respice, Sancta Charis, ceu permulcere Senatum

                                    Coeperit Eloquio Dorptica Musa pio.

                        Vive, Charis Regni; regni Charis inclyta, cresce:

                                    IN REGNA IT SVEONum deliciosa CHARIS!

            15        Tecum habitant Charites; tecum Facundia sancti

                                    Blanda Ministra sagi, blanda Ministro Togae.

 

12. Adr: Christina – Aut: Laurentius Ludenius (De pace discursus juris publici: qui, /.../ in Regia Academia Gustaviana Adolphina, quae Dorpati /.../ est /.../ die 23. Augusti, anno 1648. publice /.../ disputationis exercitio committebatur, praeside Laurentio Ludenio, /.../ respondente Petro Petri Byringio, /.../. Dorpati Livonorum, 1648: J. Vogelius)[5]                                                   SKB, UUB, H, [Tartu UB]

DEDICATIO

Serenissimae et Potentissimae Principi ac Dominae,

DN. CHRISTINAE,

Svecorum, Gothorum, Vandalorumque Reginae,

ac Principi Haereditariae; Magnae Principi Finlandiae; Duci

Esthoniae, et Careliae; Dominae Ingriae, etc.

Victrici, Piae, Felici, Augustae, etc.

Dominae et Reginae suae Clementissimae,

Vitam, Incolumitatem et Felicitatem p.p.

 

PATRIS, et aequaevae SOBOLIS, FLATUSque SACRATI

                                    Annuat aeterna PACE perennis AMOR!

                        Est DEA dicta CHARIS, Natura mitis et Annis,

                                    PACIS amans, Orbis deliciosa CHARIS.

 

CHRISTINA,

REGINA SVECIAE:

Per Anagram.

CHARIS

IN REGNA IT SVECIAE.

 

5          Sancta CHARIS, CHRISTINA CHARIS; Regina Serena,

                                    IN REGNA IT SVEONUM deveneranda CHARIS.

            Est Pater Illustris Phoenix in Prole renatus:

                                    AdVeniat, Videat, Vincat amica CHARIS!

 

SS. Reg. Maj. Symbolum:

CHRISTUS REFUGIUM SUORUM.

 

                        Nam RE conFUGIUM REGINAE CHRISTUS; ab alto

10                    Irradians, complens Regia Corda, VIGOR.

            CHRISTUS, Numen, Honos, nitidissima Vita SUORUM:

                                    Arctoi Regni Lux, Sator, alma Salus!

                        Salve, Sancta CHARIS! Salve, REGINA: JEHOVA

Auspice, Pax dulci Sancta Quiete fluat!

15                                Tota pacato rediviva Coelo

                                    Terra conjungi; superaeque sanctum

                                    Velle nobiscum jam Animae videntur

                                                Foedus inire!

SS. Reg. Majestati

Ita humilimis votis app.

Subjectissimus et Humilimus

LAURENTIUS LUDENIUS,

D. et Profess.

 

13. Adr: Christina – Aut: Laurentius Ludenius (Immortalitas D. herois /…/ Gustavi Adolphi /…/ Svecorum, Gothorum, Vandalorumque regis; /…/ parentatione anniversaria, in Regia Academia Gustaviana Adolphina, quae Dorpati /…/ est /…/ die 6. Novembris anno 1648. aeternitati consecrata a Laurentio Ludenio, Ph. et J.U.D. poët. cor. Professore juris, oratoriae et poëseos. Dorpati, 1648: J. Vogel) [6]

SKB, UUB, Växjö LB, LAB, EAB, [Tartu UB]

DEDICATIO

Serenissimae et Potentissimae Principi

DN. CHRISTINAE,

Dei Gratia, Svecorum, Gothorum, Vandalo-

rumque Reginae, ac Principi Haereditariae; Magnae Principi

Finlandiae; Duci Esthoniae et Careliae; Dominae Ingriae; etc.

Victrici, Piae, Felici, Augustae, etc.

Vitam, Incolumitatem et Felicitatem p.p.

 

                        PATRIS, et aequaevae SOBOLIS, FLATUSque SACRATI

                                    Annuat aeterna PACE perennis AMOR!

                        Est DEA dicta CHARIS, Natura mitis et Annis,

                                    PACIS amans, Orbis deliciosa CHARIS.

 

CHRISTINA,

REGINA SVECIAE:

Per Anagr.

CHARIS

IN REGNA IT SVECIAE.

 

            5          Sancta CHARIS, CHRISTINA CHARIS; Regina Serena

                                    IN REGNA IT SVEONUM deveneranda CHARIS.

                        Est Pater Illustris Phoenix in Prole renatus:

                                    AdVeniat, Videat, Vincat amica CHARIS!

 

SS. Reg. Maj. Symbolum:

CHRISTUS REFUGIUM SUORUM.

 

                        Nam RE conFUGIUM REGINAE CHRISTUS: ab alto

            10                    Irradians, complens Regia Corda, VIGOR.

                        CHRISTUS, Numen, Honos, nitidissima Vita SUORUM:

                                    Arctoi Regni Lux, Sator, alma Salus!

                        Salve, Sancta CHARIS! Salve, REGINA! IEHOVA

                                    Auspice, sis regni deliciosa CHARIS.

Dominae et Reginae suae Clementissimae,

Humilime.

 

14. Adr: Daniel Svenonis Frymolinus – Aut: Faderus Uraelius (Aestatis deliciae: quas, /.../ in Regia Academia Gustaviana Adolphina, quae Dorpati /.../ est /.../ oratione solenni, die 9. Junij, anno 1648. publice /.../ enarrabat Daniel Sven. Frymolinus, /.../. Dorpati Livonorum, <1648>: J. Vogelius)              SKB, Växjö, LAB, [Tartu UB]

GRATULATIO

Doctiss. et Humaniss.

Dn. Peroranti.

                       

                        Jucundam Aestatis naturam, dicere clare

                                    Dum tu conaris, commoda multa feres.

                        Fama superstes erit. Ceu pergis, pergito pulcre,

                                    Commoda grata feres, grata brabea feres.

In felix omen appos.

M. Faderus Uraelius,

Smol. Svecus.

 

15. Adr: Daniel Svenonis Frymolinus – Aut: Jonas Nicolai Bringander (cf. 14)

SKB, Växjö, LAB, [Tartu UB]

GRATULATIO

                        Laetare, Eusebiae Soboles! Jovis orta cerebro

                        Exulta Pallas! Levonum vos plaudite Musae,

                        Et clangore pio laquearia tangite coeli!

                        Gloria in excelsis sit CHRISTO. Psallite CHRISTO,

            5          Et modo successus successibus addite dextre!

                        Suscipit ecce suis Musas amplexibus AESTAS,

                        Acclinatque oculis calidissima sidera nostris.

O igitur Musae, vobis haec festa parantur:

                        Pierides, vestro lux haec sacratur honori;

            10        Aestas non fuerit semper componite nidos.

                        Optima Piëridum Soboles, dilecte Sodalis,

                        Remigio rationis, opus lustrare labores.

                        Et tibi amica dabunt laetantes oscula Musae!

                        Sis felix: laeta aspiret fortuna labori.

Quod animitus Dn. Sympatriotae suo appreca-

batur

Jonas Nicolai Bringander,

Smalandia Svecus,

LL. Stud.

 

16. Adr: Daniel Svenonis Frymolinus – Aut: Truillus Tingius (cf. 14)

SKB, Växjö, LAB, [Tartu UB]

GRATULATIO

                        Mi DANIEL, decus Vraniae; Gratissima nostri

                                    Cura Sodalitij, deliciumque meum:

                        Difficile, Aestatis narrare arbitria; quondam

                                    Et Res obscurae cognitionis erat:

5          At jam, Dante Deo, Christo Duce, et Auspice Flatu,

                                    Ardua res, facilis cognitionis erit.

In felix ausp. sc.

Truillus Tingius,

S. Svecus.

 

17. Adr: Ernestus Gerlachius – Aut: Tholetus Arvikander (In salutiferam passionem Domini et Salvatoris nostri Jesu Christi, oratio sacra: quam, /.../ in Regia Academia Gustaviana Adolphina, quae Dorpati /.../ est /.../ ipso die Parasceves, anno 1648. publice /.../ enarrabat Ernestus Gerlachius, /.../. Dorpati, 1648: J. Vogelius)

SKB, UUB, H, [Tartu UB]

GRATULATIO

Doctiss. et Ornatiss. Dn. Peroranti.

 

                        Tempora nunc redeunt Phoebi descripta recursu,

                                    Et media Titan regnat in arce poli.

                        Convenit hinc, luctus CHRISTI meditemur acerbos;

                                    Crimine pro mundi victima factus obit.

            5          Ceu guttis multum pretioso sangvine sudat

                                    CHRISTUS; soeva Cohors intonat ore, neca.

                        Conspuitur, diris scuticae laceratur habenis:

                                    Et rigidi tribuunt serta cruenta vepres.

                        Lancea perterebrat latus; exit Sangvis et unda:

            10                    Mucro manus transit, mucro pedesque secat.

                        Sic insons Dominus Divini Numinis iras

                                    Expiat; et fixus stipite fata subit.

                        Talia cum versas animo transacta fideli;

                                    Ingenio flores candidiore Puer.

            15        Perge, ERNESTE, hortor, studiis incumbere dictis,

                                    Talia namque tibi plurima dona ferent.

                        Omnibus inde tuis charus sine fine Propinquis,

                                    Charus eris Patri, charus erisque Deo.

Felicioris ominis ergo, ita Discipulo suo perdilecto

gratulatur

M. Tholetus Arvikander,

SS. Theol. Stud.

 

18. Adr: Ernestus Gerlachius – Aut: Nicolaus Psilander (cf. 17)

SKB, UUB, H, [Tartu UB]

GRATULATIO

ERNESTUS GERLACHIUS:

'AnagrammatizÒmenoj:

CHRISTE, SURGENS LEVA!

 

                        Mors lapsos terret, gravat et Crimen; sed ab atra

                                    Morte reSURGENS, Nos, o bone CHRISTE, LEVA!

App. app.

Nicolaus Psilander.

 

19. Adr: Johannes Georgii Gezelius – Aut: Andreas Virginius (J. A. Comenij Janua linguarum reserata aurea: in Graecum idioma, vocabulis et loquendi modis sanctis Dei amanuensibus in N. T. usitatis, fideliter translata: primum privatis exercitiis destinata, jam vero in gratiam Filell»nwn, quos Graece scribendi, loquendi ac disputandi desiderium tenet, typis publicis consecrata, opera et vigiliis /.../ Johannis Georgii Gezelii, Heb. et Graecae ling. P.P. Ejusdemque sumptibus. Dorpati Livonorum, 1648: J. Vogel.)                                                     SKB, Lund UB, LNB, EAB, [Tartu UB]

GRATULATIO

PROSFW/NHSIS

Ad

Facultatis Philosophicae p. t. DECANVM

spectabilem

Reverendum et Clarissimum Virum

Dn. M. JOHANNEM GEORGII GEZELIUM,

in Regia Academia GVSTAVIana Hebraeae et Graecae

Ling. Professorem Ordinarium; SS. Theolog. Adjun-

ctum; et Proto-Synedrij in Livonia Assessorem;

Januam Graecae Lingvae edentem.

 

                        Sacrae Scripturae codex idiomate Hebraeo

                                    Et Graeco tradit dogmata Sancta Dei.

                        Quae Veteri Testamento contermina fulgent,

                                    Hebrais fulgent scripta sacrata notis.

            5          Divinus Moses orbis cum scriberet ortum,

                                    Et lapsus primi tristia fata Patris;

                        Pro-Evangelij cum Nuncia laeta sonaret,

                                    Messiaeque sacro diceret ore dies;

                        Cumque verenda Dei proferrent sensa Prophetae;

            10                    Hebraeis multum personuere tonis.

                        Inde Novo Testamento confinia sancto

                                    Effulgent Grajis scripta notata sonis.

                        E gemino fonte hoc omnes hausere Ministri

                                    Et Verbi Vates dogmata Sacra Dei.

            15        Per te, GEZELI, loquitur Studiosa Iuventus

                                    Graeca et Hebraea: Dehinc Gloria magna tibi.

                        Olim Argiva phalanx Grajorum in moenibus ibat;

                                    Iam nostro per te Graecia in orbe sonat.

                        Felix Hebraeo et Grajo sermone triumphas:

            20                    Dulcius ex ipso fonte bibuntur aquae.

Amoris ac honoris ergo scripta

ab

ANDREA VIRGINIO, SS. Theol. D.

et P. Prim. Proto-Synedrij Assessore, nec

non pro t. Vniversitatis RECTORE.

 

20. Adr: Johannes Georgii Gezelius – Aut: Laurentius Ludenius (cf. 19)

SKB, Lund UB, LNB, EAB, [Tartu UB]

GRATULATIO

                        Gloria sic Patris, Natique, et Flaminis Almi

                        Splendeat, et Grajis clarescat in orbe loquelis!

                        Clare Vir, et Nostri Decus immortale Lycei,

                        GEZELI, Hebraeae et Graecae facundia Lingvae;

            5          Ut Pater Omnipotens, primi fundamina mundi

                        Seminibus struxit minimis, Hominemque creavit;

                        Terra erat unius labij et sermonis amici.

                        Diluvij immensis sub aquis spatiosa tremendi

                        Ut periit Tellus! Genus et mortale, remotis

            10        Hinc incepit aquis redituram extendere Gentem;

                        Terra erat unius labij et sermonis amici.

                        Verum ubi terrigenae tentarunt Astra Gigantes,

                        Et congesta manu praeruptis moenia saxis

                        In plano posuere loco, et de marmore turrim,

            15        Cujus mirata est molem Babylonica Tellus;

                        Desiit unius Labij Terra esse; loquentes

                        Deflectunt varia in varias idiomata voces,

                        Et mutata sonant diversis verba figuris!

                        Hinc Gens cum penitus sua sub juga mitteret Orbem

            20        Europae, laetaeque Asiae, Lybiaeque calentis;

                        Miscuit una ipsijs nova rerum Nomina Regnis.

                        Japeto Genitore satus, facundus Iavan

                        Graja effert animi motus interprete lingva.

                        In Natis chari vivit facundia Patris;

            25        Filius Elisa, Aeolibus; Tharsis, nova Tharso,

                        Et Dodonim Rhodiis confert discrimina vocum;

                        A Citthim Macedo discit: Post condit Athenas

                        Palladion, Grajaeque Orbis sonat aemulus urbi.

                        Hinc ubi Pellaeus Juvenis, victricibus armis

            30        Armeniae tractus adiit; transgressus et Indum

                        Urbem Bucephalam statuit: simul ardua Regna

                        Persidis, ulterius Chaldaeorumque Penates,

                        Aegyptumque suis submisit strenuus armis;

                        Ancipiti Grajum eloquium penetrantius ense

            35        Incepit totas in terras flectere cursus.

                        Intima Naturae et gravium pia pondera rerum,

                        Et quicquid dociles proponunt Pallados Artes,

                        Et quicquid dignum ingenio sapiente probatur.

                        Ancipiti Grajum eloquium penetrantius ense

            40        Tradit, et est Graji felix nitor oris amoeni.

                        Quas vel Phyllirides, vel quas Epidaurius herbas

                        Dignoscit: quicquid praesagus novit Apollo;

Quicquid et Hippocrates ponit, solersque Machaon;

                        Ancipiti Grajum eloquium penetrantius ense

            45        Tradit et est Graji felix nitor oris amoeni.

                        Quae Duodenarum Tabularum foedera, sancte

                        Sanctis funderunt Romanum Legibus Orbem.

                        Ancipiti Grajum eloquium penetrantius ense

                        Tradit, et est Graji felix nitor oris amoeni.

            50        Hinc Judaeorum spatioso ut limite fines

                        Et sacras Aedes Solymorum Graecia adivit;

                        Totus et excepit numerosa laude Senatus;

                        Rex Ptolemaeus erat magnae Philadelphus in oris

                        Aegypti, cujus sancte Regalibus ausis,

            55        Sancto habitu Grajae Lingvae formata nitescunt

                        Biblia, Divini summus Thesaurus Amoris.

                        Dives Apostolicus Coelesti Numine coetus,

                        Laetior ut laetis conspexit vultibus, altas

                        Ire super nubes DOMINUM, tractusque coruscos.

            60        Quae veneranda Novi sanctis Oracula scriptis

                        Jam Testamenti in felix opus attulit unum.

                        Ancipiti Grajum eloquium penetrantius ense

                        Tradit, et est sancte sanctus nitor oris amoeni.

                        Soepius ut Mahomet diris se immiscuit armis,

            65        Et Bithynorum crudo certamine fines

                        Vicit, et o vicit Constantinopolitanos!

                        Ejecta Hesperios transivit commoda tractus,

                        Atque per Ausonias habitatur Graeciae terras.

                        Audiit Eridanus, Rubicon, celer inde Timavus,

            70        Tisernus, Tybris, Vulturnus, et Aufidus ingens.

                        Audiit hinc Araris, Rhodanus, cito Sequana, Mosa;

                        Miranturque suas quod Graecia nata per urbes.

                        Danubiusque, Lycusque, ingens atque audiit Oenus,

                        Et quascunque tenent hinc undas Teutonicae orae

            75        Mirantur, patrium quod Graecia nata per orbem.

                        Proxima sideribus tellus Erymanthidos ursae

                        Acclivi jacet insignis Livonia tractu;

                        Audiit: Eloquium clari Demosthenis una

                        Longis optavit toto Quinquatribus ausu.

            80        Audiit aeternae fulcrum Pietatis, et illud

                        Dulce jubar terrae, Divus GUSTAVus ADOLPHus,

                        Ardua progenies Regum, Celsissimus Heros;

                        Imperat, ut veri coelestes Numinis haustus

                        Accipiant populi, mentesque in nube jacentes

            85        Sancte illustrentur Divini ad luminis ignes.

                        Mox loca dat Populis, ubi CHRISTUM jugiter orent;

                        Doctae Palladium erigitur sublime Minervae,

                        Atque hic Dorpati surgunt Academica Tempe.

                        Invitatus adest Grajo GOTSCHENIUS ore,

            90        Delicium Eusebiae, decus et pia fama Lycei;

                        Et, tribuente Deo, Grajo bene tincta lepore

                        Corda creat Juvenum, monitisque et voce Magistra.

                        Inclyta Progenies GUSTAVI Regis ADOLPHI,

                        Aeterni Soboles Herois Regia; sancta

            95        Heroina; Decus Patriae CHRISTINA; Serena

                        Arctoo Regina throno, solioque verenda;

                        Clementi scripto SALOMONEM, alta Arte Magistrum,

                        MATTHIADEM invitat fama super aethera notum,

                        Ut, tribuente Deo, Grajo bene tincta lepore

            100      Corda creet Juvenum, monitisque et voce Magistra.

                        Hinc, tribuente Deo, nostraque jubente Serena

                        Regina, CHRISTINA, alto solio usque colenda,

                        Clare Vir, et nostri Decus immortale Lycei,

                        Rite vocatus ades, Grajo quo tincta lepore

            105      Corda crees Juvenum, monitisque et voce Magistra.

                        Sublimis Grajae, SALVE, Facundia Lingvae!

                        SALVE, Honor, et Grajis Decus Oratoribus ingens!

                        Te Doctore, exuta suis nitidissima vinclis[7]

                        JANUA roboribus totis tollatur: et altum

            110      Te Doctore, sonent Grajo pia pulpita plausu;

                        Usque timete Deum, qui Nato et Flamine Sancto

                        Aequaevis, aeternus agit, Monas et Trias una.

                        Te Doctore, sonent Graja pia pulpita voce;

                        Certa Fides sub Lege Homines sylvestribus antris

            115      Eliciat; sanctum Iustum sectentur et Aeqvum.

                        Te Doctore, sonent Graja pia pulpita voce;

                        Unde phthisis, vomicae, et pereat Phlegethontica pestis.

                        Te Doctore, sonent Graja pia Pulpita voce;

                        Quod bene Pythagoras, magni schola quodque Platonis,

            120      Quodque Stagirites, mens et quod celsa Thaletis

                        Dixit: et ingenio se condat Graja vetustas.

                        Te Doctore, sonent Graja pia pulpita voce;

                        Mercurij Soboles, aurae est cui simplicis ignis,

                        Et Mens egregias rerum cognoscere causas,

            125      Audiat, et Doctore Paracleto Duce Summo,

                        Proficiat, Genij et felicis acumina sumat.

                        Disperiit Macedum tellus! quondam inclyta Regna

                        Disperiere locis! periit quondam Attica terra!

                        Et quae Graja olim, jam Turcia tota vocatur,

            130      Helladis ut vix jam vestigia parva supersint!

                        Concedente Deo, Christo Duce, et Auspice Flatu,

                        Te Doctore, sonent Grajo pia Pulpita plausu.

                        In Levonumque Redux felix habitabitur oris

                        Graecia, et innocuas peraget doctissima causas.

            135      Gloria sic Patris, Natique, et Flaminis Almi,

                        Splendeat, et Grajis clarescat in orbe loquelis!

                        SALVE una felix Grajae Facundia Lingvae,

                        Et tua clementi frondescat sidere Laurus,

                        Immarcessibilique aeternae frondis honore.

Devenerando suo Dn. Collegae

Ita animitus vovebat

LAURENTIUS LUDENIUS, Ph. et J.U.D.

Poët. Cor. Professor Juris, Oratoriae

et Poëseos.

 

21. Adr: Johannes Georgii Gezelius – Aut: Ericus A. Holstenius (cf. 19)

SKB, Lund UB, LNB, EAB, [Tartu UB]

GRATULATIO

                        GEZELI, Fautor, Graecae Facundia Lingvae;

                                    Aonij Splendor, Fama, Decusque chori:

                        To nosti latices Sophiae: Variique recessus,

                                    Et Veneres Grajae, sunt bene nota tibi.

            5          Inde doces Iuvenes lingvam Demosthenis altam,

                                    Qua voluit nobis dogmata nota Deus.

                        Inde tot egregios, diuturna cote, politos,

                                    GEZELI, passim mittis in orbe libros.

                        Inde et Comenium, multum vigilante Camoena,

            10                    In Graecum transfers docte idioma, novum.

                        Commendant multi virtute et voce verendi,

                                    Versibus et celebrant haec tua scripta Viri.

                        Holstenius Graium Decus Ausius atque Guthraeus:

                                    Quos tinxit Graio Musa liquore Viros:

            15        Haec celebratque litans tua Musae, Embecca, juventus,

                                    Quae cupido doctos hausit amore sonos.

                        Perge pie posthac magis efflorere per Artes,

                                    Et nova Castalio scripta replere thymo.

                        Sic Patriae fueris laus Magna: Et splendor in orbe,

            20                    Sicut in Arctoo fulgida stella polo.

Dn. Hospiti ac Mecoenati L. mque congr.

M. ERICVS A. HOLSTENIVS.

 

22. Adr: Johannes Georgii Gezelius – Aut: Georgius G. Gezelius (cf. 19)

SKB, Lund UB, LNB, EAB, [Tartu UB]

GRATULATIO

                        Dente Theonino qui rodit singula Momus,

                                    Egregios ausus soepe latere jubet.

                        Janua Grajo habitu quae nunc vestita nitescit;

                                    Ceu Fratris fecit cura laborque gravis:

            5          Ah! metuens Momi lites! hanc nolle recusam,

                                    Percepi quondam sensibus hisce dolens.

                        At nunc exulto, Frater celeberrime; Momum

                                    Quod spernas, Clariis dans tua scripta typis.

                        Hinc dicent alij, quod Proles commoda Phoebi

            10                    Et legat Aonij pars studiosa Chori.

                        Lexicon et Graecum contexit quod labor ingens;

                                    Descriptum ut veniat, dent pia Fata, typis.

                        Sic tua florebit Laus! Praepete posthuma cursu

                                    Per mundum et niveis fama volabit equis.

Dn. Fratri ac Nutritio deproperabat

Georgius G. Gezelius.

 

23. Adr: Daniel Danielis Gruuf – Aut: Andreas A. Malmenius (Passio Domini et Salvatoris nostri Jesu Christi secundum D. evangelistam Matthaeum: quam, /.../ in Regia Academia Gustaviana Adolphina, quae Dorpati /.../ est /.../ oratione metrica, Postridie Parasceves, an. 1648. publice /.../ enarrabat Daniel Dan. Nycopensis, /.../. Dorpati, <1648>: J. Vogelius)                               SKB, Växjö LB, H, [Tartu UB]

GRATULATIO

In Honorem

Humanissimi atque Doctissimi

DN. DANIELIS NYCOPENSIS, metrice de

Salvatoris nostri Passione Perorantis.

 

                        Eusebiae soboles, Daniel Nycopensis, Amice,

                        Aonij nostri pars o nitidissima coetus:

                        Carmine dulcisono meditaris vulnera Christi

                        Dicere; dignatus quod nostra, simulque Parentum,

            5          Purpureo Amne sui commissa lavare cruoris,

                        Et liquidas aperire vias ad sydera Coeli.

                        Gratulor inde tuis conatibus: Auspice Christo,

                        Hinc sic optatis pergas insistere coeptis:

                        Et precor Omnipotens Dominus tua coepta secundet,

            10        Ut portum tangat tua docta Camoena cupitum,

                        Et nostrae Patriae felix habearis Alumnus.

Haecce Amoris ergo apposuit

ANDREAS A. MALMENIUS,

Sudermannus.

 

24. Adr: Daniel Danielis Gruuf– Aut: Benedictus O. Vegrelius (cf. 23)

SKB, Växjö LB, H, [Tartu UB]

GRATULATIO

                        Sunt duo, quae doctae commendant dona Juventae;

                                    Ardor Musarum, scriptaque digna legi.

                        Ardue Musarum, Daniel mi, cultor: utrumque

                                    Servas, et studio candidiore foves.

            5          Toto Musarum flagras studiosus amore,

                                    Aonio in studio proficis assidue.

                        Et, Duce sanctorum studiorum Flamine Sancto,

                                    Scripta adfers Metricis ingeniosa sonis.

                        Perge: Sacrata Trias foveat conamina tota,

            10                    Et currant Musae prosperiore via.

Populari et Amico fido C. C. C.

BENEDICTUS O. VEGRELIUS,

Suderman.

 

25. Adr: Gustav Adolph – Aut: Laurentius Ludenius (Immortalitas D. herois, /…/ Gustavi Adolphi /…/, Svecorum, Gothorum, Vandalorumque regis; /…/ parentatione anniversaria, in Regia Academia Gustaviana Adolphina, quae Dorpati /…/ est /…/ die 6. Novembris anno 1648. /…/ aeternitati consecrata a Laurentio Ludenio, Ph. et J.U.D. poët. cor., professore juris, oratoriae et poëseos. Dorpati, 1648: J. Vogel)[8]

SKB, UUB, Växjö LB, LAB, EAB, [Tartu UB]

DEDICATIO

REX

GUSTAVUS

ADOLPHUS.

Per Anagramma;

REX

AUGUSTUS

HAS DVPLO.

SS. Reg. Maj. tis Symbolum:

CUM DEO ET VICTRICIBUS ARMIS.

 

Gratia, Christe, tua est; Patriae Civemque Patremque

Quod gero, res Sancti curo quod Imperij.

Gratia, Christe, tua est; quod Res Victricibus Armis

HAS REX AVGVSTVS conduplicando DVPLO.

            5          Christo Dante, mea Phoenix in prole renatus

                                    Vivo: Deo Vivat Regia Progenies!

 

26. Adr: Eowaldus von Hastfern et Emerentia Veronica von Mengden – Aut: Laurentius Ludenius (Solenni nuptiarum festivitati /.../ Eowaldi von Hastfern, haereditarij in Kostfer, etc. A SS. Reg. Maj.te  turmae equestrium nobilium in Westro-Gothia constituti signiferi; /.../ die 7. Februarij, anno 1648. Revaliae conjugium contrahentis cum /.../ Emerentia Veronica von Mengden /.../ Engelbrechtii von Mengden, haereditarij in Altenwage, Sara et Lawa; et consiliarij militaris per Livoniam; et Regij Supremi Judicij, quod Dorpati est, vicepraesidis /.../ filia, sponsa: quaevis fausta /.../ precatur Laurentius Ludenius, Ph. et J.U.D. poët. cor. in Regia Academia Gustaviana Adolphina professor juris, oratoriae et poëseos. Dorpati, 1648: J. Vogel)                                                                        Linköping LB, [Tartu UB]

EPITHALAMIUM

                        Inclyta Nobilitas, cui pulcra exordia sanctis

                        Pandit mansuris aeternum laudibus: illa

                        Vere Virgineis Virtutibus aurea Nympha,

                        Aevi flore virens EMERENTIA VERONICA, altis

            5          Nobilis A MENGDEN prognata Parentibus; almo

                        Dante DEO, charis optantibus atque Propinquis,

                        Jungitur egregiis Thalamis, pactisque Hymenaeis.

                        Et Genus, et Proavos, et fortia Stemmata jactat,

                        Et juncto propior Sangvine Juppiter audit.

            10        Terra antiqua, potens Livonia fortibus armis,

                        Altrix bellorum bellatorumque Virorum;

                        Horrida quam quoties Riphaeis Terra pruinis,

                        Insuper Euxino propior Gens Taurica Ponto,

                        Compulit ad bellum, atque in praelia soeva coëgit;

            15        O toties MENGDENiades, Mavortius Heros,

                        Agglomerare manum, atque una concurrere telis

                        Est visus: Spoliis donec laudatus opimis

                        Gauderet Victor raptas avertere praedas.

                        Praetereo, atque aliis hinc commemoranda relinquo

            20        Fataque, fortunasque Viri, pugnasque JOHANNIS      (Anno 1452.)

                        A MENGDEN; numerat quem Virtus, Teutonici inter

                        Ordinis Illustres multo Mavorte Magistros:

                        Queis ego non Decios celebres, fortesque Metellos

                        Praetulerim; non, qui Poenum domuere ferocem,

            25        Scipiadas; Gallisque genus fatale, Camillos.

                        Si Genus excutias; Equites ab origine longa

                        Egregios per Avos gravium numerantur Avorum

                        Nobilitatis Apex, Decus immortale Bonorum,

                        Martis et Artis Honos, Pater ENGELBRECHTIUS, Heros

            30        O MENGDENiadum nitidissima pompa Virorum!

                        Dives Consiliis, et Honoribus arduus amplis,

                        Regius ille audit jam Commissarius, atque

                        In medium belli de sumptis consulit armis.

                        Ad latices Embecciades ubi Nobile Dorptum,[9]

            35        Regia Judicium fovet indulgentia sanctum;

                        Cui Vice-delectus-Praeses, velut Aeacus alter

                        Divinis fundat mansurum legibus Orbem.

                        Adversos felix Hosti defigere nervos,

                        Felix vectus equis, felix Equitumque Magister

            40        Ipse Paternus Avus; gravium Fiducia rerum,

                        Fromholt von Mengden/ sancti candoris imago.

                        Insignis meritis fuit ENGELBRECHTIUS ille

                        Von Mengden/ Proavus; totos vibrata per Hostes

                        Hastarum quatiens properanti spicula motu.

            45        Ut propius ventum est, admotaque dextera dextrae,

                        Ipse Abavus, claris ERNESTUS honoribus amplus,

                        Ense suo factus calcavit Victor acervos.

                        Inde Patri Genus Heroi Materna beatum

                        Addit Nobilitas Tisenhusana: deinde

            50        Borchia, Lohda, Uxkelia, Tisenhusia, felix

                        Munchusana viret, post Volkersamia floret,

                        Et multis titulis Butleria clara triumphat.

                        Verum totorum quaenam meminisse Camoena

                        Majorum valeat, disponens Stemmata Patris?

            55        Dives Avis! series Materni stemmatis ampla

                        Nobilitatis Honos Genitrix; Pietate coruscans

                        MARGARIS A TAUBEN; ceu Gemmea Gemmula fulgens

                        Templorum cultrix; clara quod stirpe creata

                        Sancta Columbinis animus documenta reponit

            60        Moribus; et gravium signat Concordia rerum.

                        Hinc Maternus Avus, CONRADUS TAUBIUS; armis

                        Insignis, numerans diffusi compita Feudi;

                        Terrestris lectus Judex, Rhadamantus ut alter

                        Dexteriora dedit meritis terrestria jura

            65        Qua Dorpatensis mittit Districtus habenas.

                        Maternus claris Proavus Virtutibus altum

                        Exaequans Nomen, JOHANNES TAUBIUS; ille

                        Martius assiduo felix certamine Miles,

                        Venerunt quoties audacis praelia pugnae.

            70        Ipse Abavus meritis REINHOLDUS TAUBIUS ingens,

                        Pollutos quoties multo Bellona penates

                        Sangvine perfudit, renovataque miscuit arma.

                        Maternae una Aviae Decus immortale reponit

                        Gentis Nobilitas; ut Farensbachia, clara

            75        Tisenhausia de Rauden/ de Tirsen; et inde

                        Olsenia, et Schwartzhofia Gens, Rosia atque propago:

                        Et quae cunctorum valeat meminisse Camoena

                        Majorum, clarae disponens Stemmata Matris.

                        Sic Patre, Matre, et Avis antiqua stirpe creatis,

            80        Et bene de Patria meritis; ut lucis in auras

                        Nobilis A Mengdens EMERENTIA VERONICA, illa

                        Gloria Virginei Coetus prognata: subinde

                        Ardua Virtutum rediere in semina causae.

                        Et Flatu Sancto, et liquido de Fonte renata,

            85        Abluit agnatum Baptismatis amne reatum.

                        Paulatim ut teneris coepit consistere membris;

                        Dulce sacrae primo Pietatis nectar ab aevo

                        Imbibit: accepit coelestes Numinis haustus,

                        Solliciti quando praedulci tincta Parentes

            90        Corda lepore creant, et voce, et moribus aureis.

                        Vere Virgineis Virtutibus aurea Nympha,

                        Aevi flore virens, natura mitis: et aequae

                        Ore Deae vinxere choros, et Juppiter aeqvus.

                        Vidit casta Venus, cui vincla[10] Jugalia curae,

            95        Atque ait; hanc vinclo[11] pergam sociare jugali.

                        Audiit; et casti flammas accepit amoris

                        Aevi vere virens, EOWALDUS Nobilis ille

                        ABS HASTFERN; clari a Proavis vetus Ordinis Haeres.

                        Ad Boream acclivi surgit Livonia tractu,

            100      Quam quoties, rata Hamaxobij sine sede vagantes,

                        Basternaeque, Getaeque, Sagittiferique Geloni,

                        Invasere gravis vesana per agmina Gentis;

O toties mediis in multis millibus ipsi

                        Ductores multo volitarunt Marte decori!

            105      Ipse etiam clypeis, et bellatoribus ipse

                        Exercetur Equis, crepitantia concutit arma.

                        Ipsa ubi magnanimis contermina Svecia Gothis

                        Jam quando Sonipes depressis pugnat habenis;

                        Ipse inter coedes et magnum Signifer agmen

            110      Fertur Equo, variisque instigat vocibus Alas.

                        Mars et Phoebus amant; et turba Novena Sororum

                        Diligit; atque oculis ridet facieque Venustas.

                        Audiit ut castae Veneris nitidissima dicta;

                        Illa, velut fomes: refoventque in fomite flammas

            115      Ingenua attracti per pectora tota caloris.

                        Sancta Virago, pios non aversata Hymenaeos,

                        Virgineam socio componit foedere mentem.

                        Annuit Omnipotens; dilecti optantque Parentes,

                        Jungi connubio stabili, propriamque dicari.

            120      Dignus Apostolica praefulgens mente Sacerdos,

                        Conjugium, thalamique fidem, lectumque jugalem

                        Per connubia pulcra, sacram stipulantur ad Aram.

                        Et supera aspectans coeli convexa precatur;

                        Annuat ipse Pater; Verbum Patris annuat; una

            125      Annuat Omnipotens amborum Spiritus; Usque

                        Ut Thalamo aspiret felix fortuna jugali,

                        Et Nati Natorum, et Avi numerentur Avorum.

                        Mox domus interior geniali splendida pompa

                        Instruitur, mediisque parant convivia tectis.

            130      Postquam prima quies epulis; per vota vovendo

                        Crateras magnos statuunt, et vina coronant.

                        Votum est; Afferto auxilium DEUS! Omnia firmans

                        Conservato Domum! Laetos servato Parentes!

                        Optatos Animi conjungant semper amores;

            135      Sint Nati Natorum, et qui nascentur ab illis.

                        Tota Valetudo constet liberrima morbis:

                        Sint gravidae Pecudes, sit pomis utilis arbor,

                        Sit bene pingvis humus, sit fertilis ubere campus,

                        Et renovatus ager plenis canescat arestis.

            140      O quoties! et quae Sponsus Sponsae ipse locutus!

                        Partem aliquam, Venti, Divum referatis ad aures.

 

EMERENTIA VERONICA von Mengden:

Per Anag.

VENI, VENI, CORONA,

MENTEM REGENDA!

 

                        Fulgida Virginei Coetus, mihi lecta, CORONA;

                                                VENI, VENI, CORONA,

                                                MENTEM VENI REGENDA.

            145      Depropera Probitate, Fide, Pietate, CORONAM;

                                    Nobilior Generis, Sponsa, CORONA mei:

                                                Haerens CORONA sensibus!

                                                Totis CORONA mentibus!

                        Dixerat! et contra sic Sponso Sponsa locuta est:

           

EOVVALDUS von HASTFERN:

Per Anag.

FLOS, OH VADE, NUTU VERNAS!

 

            150      FLOS, O VADE, pio VERNAS, nitidissime, NUTU!

                                                Nostrae CORONAE FLOSCULE,

                                                Necte meo capiti CORONAM.

                        Dixerat: et Sponsae est ita Sponsus dicta secutus;

           

EOVVALDUS von HASTFERN:

Per Anag.

FLOS TUUS DEVEHAR; ANNUO.

           

                        FLOS TUUS aeternis ut DEVEHAR, ANNUO, votis:

            155      Sit ver purpureum; laetos praecordia circum

                        Fundat Amor FLOres; placidique, tepentibus umbris

                        Verborum, Zephyri foveant per corda calorem,

                        Cordis amoriferumque bibant violaria fontem.

 

EMERENTIA VERONICA

von MENGDENS:

Per Anag.

REGE: ADVENI!

MENTEM VENI CORONANS.

 

                        Dante DEO, CHRISTO DUCE, et Auspice FLAMINE SANCTO,

            160                              REGE! ADVENI! CORONA,

                                                MENTEM VENI CORONANS.

                        Depropera probitate, Fide, Pietate, CORONAM;

                        Sic est Conjugium vitae praenobile fulcrum;

                        Sic sumus inter nos, Auresque Manusque Pedesque,

            165      Mutua sic duros emollit cura labores

                        Et vitae gemina dulcedine gaudia crescunt.

                        Dixerat: Hinc Proceres, et proximitate Propinqui

                        Votivas plenis partes assensibus implent.

                        Unum et idem votum est: VERNAntem FLOribus ornet

            170      Alta CORONA comam: Generosis FLOribus illis,

                        Quos neque frigoribus Boreas, nec Sirius urit

                        Aestibus; Aeterno sed Amoris Honore rubentes

                        Fons Pietatis alit, Candoris et educat aura

                        Sit Torus VERNANS Paradisus; Herbas

            175      Amne uti, Prolem foveat; perenni

                        Vere pubescat; placidique Amoris

                                                            Floribus halet.

 

27. Adr: Thomas Kühn – Aut: Joachimus Crellius (Disputatio physica de temperamentis, quam /.../ in Regia Academia Gustaviana Livonorum publico /.../ examini submittunt /…/ Joachimus Crellius, /.../ et Thomas Kühn, /.../ ad diem <21.> Octobris /.../. Dorpati Livonorum, 1648: J. Vogelius)                 H, [Tartu UB]

GRATULATIO

Praestantissimo et Politissimo

Dn. Repondenti

De Temperamentis Disputaturo.

 

                        Mixturam Natura parat: Mixtura reponit

                                    Naturam; justa temperieque fovet.

                        Frigida nam calidis contemperat; humida siccis,

                                    Et quae juncta sibi semina semen habet.

            5          Hinc tibi Temperies humorum nascitur, illam

                                    morum temperies sponte sequatur homo!

                        Namque ita Temperiem mores, dixere, sequuntur:

                                    Tu modo quod vitij est corrige, mitte, fuge.

                        KÜHNI doces, facis; et quae disseris, asseris ausus

            10                    doctrina ac vita, pectore et ore probas.

                        Perge, tuis studiis favet aether, et ausa secundat,

                                    En voveo et moneo, perge placere bonis!

Ita gratulatur

Praeses.

 

28. Adr: Thomas Kühn – Aut: Johannes Creilingius (cf. 27)                   H, [Tartu UB]

GRATULATIO

                        Pro Vero bellum, KÜHNI, quod suscipis urge:

                                    AUDACTER  pugna, ut Nomen in omen eat!

Amico suo apposuit

Johannes Creilingius.

 

29. Adr: Thomas Kühn – Aut: Matthaeus Willebrand (cf. 27)    H, [Tartu UB]

GRATULATIO

                        Pondera dum rerum libras, caussasque latentes

                                    Scrutaris, Küni candide, pondus habes.

                        Quaerere Naturae mores, caecosque recessus,

                                    Optima Naturae semina laudis alit.

f.

Matthaeus Willebrand.

 

30. Adr: Bernhardus Svenonis Lohman – Aut: Gustavus Olai (De magistratu politico oratio: quam, /.../ in Regia Academia Gustaviana Adolphina, quae Dorpati /.../ est /.../ die 15. Aprilis, publice /.../ enarrabat Bernhardus Svenonis Lohman, /.../. Dorpat Livonorum, 1648: J. Vogelius)               SKB, UUB, Växjö LB, H, [Tartu UB]

GRATULATIO

Ornatissimo Dn. Peroranti.

 

                        Pvlcras qui novit Divinae Pallados artes,

                                    Huncce fovet Pallas blandior ipsa suum.

                        Hujus, Discipule, es dicti memor, Optime LOHMAN,

                                    Praesenti ut scripto dexteriore probas.

            5          Alta Magistratus depingis munia; pingis

                                    Qua celsa niteat strenuitate decor.

                        Macte nova Virtute veni! sic perge beatus;

                                    Sic tibi, sicque tuis commoda multa feres.

Felicioris ominis E. Discipulo suo per-

dilecto scripsit

M. Gustavus Olai,

Wermel.

 

31. Adr: Petrus Torstani Loohm – Aut: Sveno Andreae (De vita aeterna oratio: quam, /.../ in Regia Academia Gustaviana Adolphina, quae Dorpati /.../ est /.../ die 8. Februarij, anno 1648. publice /.../ enarrabat Petrus Torstani Loohm, /.../. Dorpati Livonorum, <1648>: J. Vogelius)                      SKB, UUB, Växjö LB, H, [Tartu UB]

GRATULATIO

Doctissimo et Ornatissimo

Dn. Peroranti.

 

                        Credimus hinc vitam post hanc superesse futuram;

                                    Eque hac, qua tegitur, quisque resurget humo.

                        Ecce venit Dominus, dixit justissimus Henoch,

                                    Ecce Deus sancta cum legione venit!

            5          Et fert judicium nullis mutabile seclis,[12]

                                    Et bene dat justis esse, malisque male.

                        Christus, venturum se in Majestate verendum,

                                    Praedicat, Angelico concomitante choro;

                        Judicet ut vivos pariter, pariterque sepultos,

            10                    In quocunque loco vel regione sient.

                        Felix, qui vitam post hanc superesse futuram

                                    Disseris, et scripto dexteriore doces.

Gratul. app.

Sveno Andreae,

Smol. Svecus.

 

32. Adr: Petrus Torstani Loohm – Aut: Daniel Flojerus (cf. 31)

SKB, UUB, Växjö LB, H, [Tartu UB]

GRATULATIO

                        Discurrunt multi, rationis lumine ducti,

                                    Quae facies Summi constituenda boni.

                        Ad cumulos alius decurrit pendulus auri,

                                    Hisce dari melius non putat ille bonum.

            5          Alter honorum avidus; mox alteri amica voluptas,

                                    Quae nos titillat; sed bovis instar amat.

                        Quam longe distent haec cuncta a tramite veri,

                                    Tu LOHMI, docte sympatriota doces.

                        Tu clare monstras coeli quam florida Tempe,

            10                    Ac ibi quam felix sit sine fine quies.

                        Hocce Bonum vere Summum sine lite putandum est,

                                    Quo tanquam ad metam tendere debet homo.

                        Gratulor ergo tibi: conatus laudo, proboque;

                                    Hocce Bonum simul et ti, precor atque mihi.

Gratulabundus app.

Daniel Flojerus,

Smol. Sve.

 

33. Adr: Ambernus Haquini Printzius – Aut: Petrus Caroli Undenius (De justitia disputatio: quam, /.../ in Regia Academia Gustaviana Adolphina, quae Dorpati /.../ est /.../ die < > anno 1648. /.../ disputationis examini sub praesidio /.../ Laurentii Ludenii, /.../ submittebat Ambernus Haquini Printzius, /.../ A. et resp. Dorpati Livonorum, 1648: J. Vogelius)                                                                              SKB, [Tartu UB]

GRATULATIO

 

Pietate, Doctrina et Humanitate Ornatissimo Iuveni

DN. AMBERNO HAQUINI PRINTZ/

Amico et Sympatriotae svavissimo, Docte et Methodice

de Justitia Theses adornanti.

 

O AMBERNE, sacrae decus immortale Camoenae,

                                    Paeonij et nostri portio pulcra chori:

                        Rem dignam Musis praestas, dum fortia bella

                                    Pro Virtute sacra Marte favente geris.

            5          Dum tuus, ut coepit, splendescere pergit Apollo,

                                    Ah! patriis agris fertilis annus erit.

                        Ulterius gnavum studiis intende laborem,

                                    Et tibi per Musas fama perennis erit.

Moris et Honoris ergo gratulabundus

app.

M. PETRUS CAROLI UNDENIUS,

W-Gothus, SS. Theol. Stud.

 

34. Adr: Ambernus Haquini Printzius – Aut: Laurentius Emzelius (cf. 33)

SKB, [Tartu UB]

GRATULATIO

                        Exulat in multis male, Justitiae decus, actis;

                                    Et bene parturiens, jura parare nequit.

                        Hoc pius attendit Thesium harum tutor et Author,

                                    Soepe videns rumpi vincula Justitiae!

            5          Hinc motus, studio rimatur scripta fideli,

                                    Et probat ingenij candida signa pij.

                        Nam de Justitiae Stella bene pondere gratas,

                                    Ordine concinno protulit ipse Theses.

                        Gratulor inde tibi, Respondens arte polite;

            10                    Gratulor, ingenium sic viguisse tuum.

                        Nunc igitur fausto, PRINTZI, conscendito saltu;

                                    Nec finito incoepti sensa retro ire tui.

                        Sic te fama, decus, sic praemia certa manebunt,

                                    Sic tibi Castalides certa brabea ferent.

Praestantissimo Dn. Respondenti, Thesium harum Authori,

Amico et Sympatr. sincere dilecto, ita

applaudeb.

M. LAURENTIUS EMZELIUS,

West-Gothus.

 

35. Adr: Benedictus P. Rothovius – Aut: Sveno Bernhardi Eckenbladh (Passio Domini et Salvatoris nostri Jesu Christi secundum D. evangelistam Matthaeum: quam, /.../ in Regia Academia Gustaviana Adolphina, quae Dorpati /.../ est /.../ oratione solenni, die Parasceves, an. 1648. publice /.../ memoriter enarrabat Benedictus P. Rothovius, /.../. Dorpati Livonorum, <1648>: J. Vogelius)

SKB, Växjö LB, [Tartu UB]

GRATULATIO

Doctiss. et Humaniss. Dn. Peroranti.

 

                        Perge, velut pergis dare doctae munera mentis;

                                    Et cum laude tibi munera grata paras.

                        Egregios ausus laudo! His insistere perge,

                                    Perge ita, doctus eris; perge ita major eris.

            5          Faxit id Omnipotens! Adsit tibi Numine dextro,

                                    Atque det ingenio vela secunda tuo.

Amoris et honor. Ergo haec pauc.

app.

Sveno Bernhardi Eikenbladh /

Smolandia Svecus.

 

36. Adr: Benedictus P. Rothovius – Aut: Johannes Andreae (cf. 35)

SKB, Växjö LB, [Tartu UB]

GRATULATIO

                        Diffundat quamvis sese rationis acumen,

                        Despiciat montes, ac invia tesqua pererret;

                        Attamen haud capiet, quo Christus ductus amore,

                        Dum nos damnatos peccato et morte redemit.

            5          Morte sua Dominus vitio nos purgat ab omni,

                        Restituens nobis peccato perdita dona.

                        Haecce pie tu pertractas, mi docte ROTHOVI,

                        Ergo tibi laus atque decus sine fine vigebunt.

Sincerioris affectus contestandi E.

scripsit

Johannes Andreae,

Smolandus.

 

37. Adr: Benedictus P. Rothovius – Aut: Jonas Gothonis Ryander (cf. 35)

SKB, Växjö LB, [Tartu UB]

GRATULATIO

                        Felix, qui Domini meditaris vulnera Christi:

                                    Nam sangvis Christi crimina nostra lavat.

Amico Animo apponebat

Jonas Gothonis Ryander,

Smal. Svecus.

 

38. Adr: Benedictus P. Rothovius – Aut: Simon Haquini Slettherus (cf. 35)

SKB, Växjö LB, [Tartu UB]

GRATULATIO

                        Sic regitur DEUS humana sub mole, simulque

                        Induit humanos artus, fert nostra pericla,[13]

                        Pro nobis etiam morti se subjicit ultro,

                        Abluit et generis labem mortalibus aegris!

            5          Rothovi, i felix, dum tanta oracula dicis.

Sympatriotae et Amico suo ita gratulari

voluit

Simon Haquini Slettherus,

Smolandus.

 

39. Adr: Jonas Gothonis Ryander – Aut: Benedictus Petri Rothovius (In gloriosissimam ascensionem Domini et Salvatoris nostri Jesu Christi oratio: quam, /.../ in Regia Academia Gustaviana Adolphina, quae Dorpati /.../ est  /.../ ipso die ascensionis Jesu Chr. an. 1648. publice /.../ memoriter enarrabat Jonas Gothonis Ryander, /.../. Dorpati Livonorum, <1648>: J. Vogelius)

SKB, Växjö LB, H, [Tartu UB]                                                                            

GRATULATIO

Humaniss. et Literatiss.

Dn. Peroranti.

 

                        In Coelum ascendit cum plausu Christus Jësus,

                        Obstructique viam nobis patefecit olympi;

                        Ut docto tradis scripto, Charissime JONA.

                        Perge placere Deo, cui te per Vota sacrasti;

            5          Et capiet felix multos Ecclesia fructus,

                        Atque tibi surgent optatae laudis honores.

Amoris et Honoris Ergo ita vovebat

animus et calamus

Benedicti Petri Rothovij,

Smalandia Sveci.

 

40. Adr: Jonas Gothonis Ryander – Aut: Simon Haquini Slettherus (cf. 39)

SKB, Växjö LB, H, [Tartu UB]

GRATULATIO

                        Dulcis Amice, tibi ferimus praeconia laudum:

                                    Mente pia volvis mystica scripta Dei.

                        Enarras, veluti Christus cito ab hoste triumphum

                                    Inferno referens scandat ad astra poli.

            5          Perge, velut pergis: mysteria pandere perge:

                                    Et venient vitae tempora laeta tuae.

Honoris et Amicitiae contestandae

E. scripsit

Simon Haquini Slettherus,

Smol. Svecus.

 

41. Adr: Simon Haquini Slettherus – Aut: Laurentius E. Emzelius (De Spiritu sancto oratio: quam, /.../ in Regia Academia Gustaviana Adolphina, quae Dorpati /.../ est /.../ ipso die Pentecostes, anno 1648. publice /.../ enarrabat Simon Haq. Slettherus, /.../. Dorpati Livonorum, <1648>: J. Vogelius)                      SKB, Växjö LB, H, [Tartu UB]

GRATULATIO

Humaniss. et Doctiss. Dn. Peroranti.

 

                        Crebrius exsurgunt multi, qui tempore nostro

                                    Turpius ah vivunt, dum Curios simulant!

                        Sunt qui desertas rellictis urbibus intrant

                                    Sylvas, ut vitiis vita carere queat;

            5          Sed tamen immundum satiant pro Numine ventrem,

                                    Curaque nec capit hos Numinis ulla viros.

                        Ast tu, Docte SIMON, nostri pars grata Lycei,

                                    Gratia Pieridum, deliciumque meum;

                        Instituis melius; quod nobis utile, dicis:

            10                    Dicis, ab aethera Spiritus arce venit.

                        Hoc docet e liquidis oratio fontibus hausta,

                                    Flaminis aeterni quae sacra facta refert.

                        Macte animis SIMON, cantant praeconia Musae,

                                    Laudat et ipsa sonos Patria terra tuos.

            15        Pallas amat, quondam studiis conferre brabeja,

                                    Et tibi Musarum Praeses Apollo favet.

Haec in verum Amicitiae Symbolum

posuit

M. Laurentius E. Emzelius,

West-Gothia Svecus.

 

42. Adr: Simon Haquini Slettherus – Aut: Faderus Uraelius (cf. 41)

SKB, Växjö LB, H, [Tartu UB]

GRATULATIO

                        Gratulor inde tibi, svavissime Amice; sacratis

                        Quod video Studio te ardenti incumbere scriptis;

                        Scripta Prophetarum et plenis addiscere Votis.

                        Sit tibi, sit Curae, Sanctum cognoscere nostrae

            5          Justitiae fulmen; Labor is parit ominor omen.

Sic grat. voluit

M. Faderus Uraelius,

Smol. Svecus.

 

43. Adr: Simon Haquini Slettherus – Aut: Benedictus Petri Rothovius (cf. 41)

SKB, Växjö LB, H, [Tartu UB]

GRATULATIO

                        Spiritus ille datus nobis est Sanctus ab alto,

                        Ut bene perpendis tu, mi SLETTHERE Sodalis.

                        Perge tuis coeptis; det vela secunda Jehova,

                        Praemia quo tandem referas condigna labore:

            5          Olim splendebis laeto sic auctus honore.

Honoris et amoris ergo haecce paucula

addidit

Benedictus Petri Rothovius,

Smalandia Svecus.

 

44. Adr: Simon Haquini Slettherus – Aut: Petrus Erici Aulinus (cf. 41)

SKB, Växjö LB, H, [Tartu UB]

GRATULATIO

                        Gratulor ex animo tibi Sympatriota subinde,

                                    Quod Studiis optas invigilare Sacris.

                        Biblia scrutaris; Sacrosancta Oracula discis.

                                    Et tradis doctis Dogmata sancta sonis.

            5          Sic, SLETTHERE, piis studiis incumbe; sequentur

                                    Quae sperata tibi, quaeque beata tibi.

In Syncerae Amicitiae arrham, Amico infucato

sic gratulari voluit

Petrus Erici Aulinus,

Smol. Svecus.

 

45. Adr: Andreas A. Tremulander – Aut: Daniel Danielis Nycopensis (De resurrectione mortuorum oratio: quam, /.../ in Regia Academia Gustaviana Adolphina, quae Dorpati /.../ est /.../ Postridie Paschatos, anno 1648. publice /.../ enarrabat Andreas A. Tremulander, /.../. Dorpati Livonorum, <1648>: J. Vogelius)

SKB, Växjö LB, EAB, [Tartu UB]

GRATULATIO

Prosfènhma

ad

Morum ac vitae integritate Doctrinaque Conspicuum

Juvenem

DN. ANDREAM A. TREMULANDRUM

W-Gothum, docte et methodice de Resurrectio-

ne Mortuorum Perorantem.

 

                        Piëridum, ANDREA TREMVLANDER, strenue cultor,

                        Delicium Patriae, nostri pars pulchra Lycei;

                        Dum sacro in scripto declamas pectore firmo,

                        Atque refers nostra haec quod vivificata resurgent

            5          Corpora de tumulis, justus cum venerit Vltor,

                        Et tuba per densas sonitum dabit ardua nubes.

                        Gratulor, applaudoque animo laetanteque vultu

                        Quod sic scrutaris volvisque volumina sacra.

                        Vt bene caepisti, pergas insistere coeptis;

            10        Quo tandem possis studiorum tangere metam,

                        Atque tuis pulchris conatibus ire per altum.

 

'EteÒsticon.

                        Ergo  tVIs  pVLChrIs  faVstVsqVe  InsIstIto  CoeptIs,

                                    HInCCe  opto  faVstVs  praeMIa  pVLChra  feras.[14]

Amoris et honoris Contest. C. Conscriptum

a

DANIELE DANIELIS NYCOPENSI,

Sveco, SS. Theol. Studioso.

 

46. Adr: Josephus Paulinus Ulsbeckius - Aut: Laurentius Ludenius (Ultimo honori /.../ Josephi Paulini Ulsbeckii, Smolandi, in Regia Academia Gustaviana Adolphina, quae Dorpati /.../ est, philosophiae et LL. studiosi, /.../ qui, /.../ die 13. Julij, anno 1641 nescio a quibus /.../ percutitur /.../ mox emoritur: cujus exuviae die 10. Maji, anno 1648. sepulchro, quod ibidem est in aede D. Mariae quondam sacra /.../ sunt illatae: /.../ consecrabant Musae Embecciades. Dorpati Livonorum, 1648: J. Vogelius)

UUB (def), [Tartu UB (def)]

EPICEDIUM

JOSEPHUS PAULINUS ULSBECKIUS:

Per Anag.

OPUS ULSBECKI, IN JHESU PLAUSUS!

 

                        Sic homo, quem Numen Divino semine fingens

                        Fecit in effigiem moderantis cuncta Jehovae;

                        In dubios casus, et prona pericula mortis

                        Disjicitur! fatique alto sic vertitur ictu!

            5          JOSEPHUS PAULINUS huic ULSBECKIUS orbi

                        Gratus erat: Pietate gravis, Probitate venustus;

                        Omne OPUS ULSBECKI, IN JHESU per tempora PLAUSUS!

                        Eunomiae et sanctae Sophiae succensus amore

                        JOSEPHUS PAULINUS huic ULSBECKIUS orbi

            10        Gratus erat: Doctum ingenio Tritonia Pallas

                        Dixerat; insignem Themis efformaverat arte;

                        Ut cadit ille insons inopinae verbere pugnae,

                        Et dextro infixum stridet sub lumine vulnus!

                        Deficiunt toto rupti discrimine nervi!

            15        Exundans sangvis sese jaculatus in altum

                        Emicat, et longe terebrata prosilit aura;

                        Dones seque animamque suam tibi, CHRISTE Redemptor,

                        Commendat; linquitque suos jam spiritus artus!

                        Ille pie emoritur; cujus, Duce Flamine Sancto,

            20        Omne OPUS ULSBECKI, IN JHESU per tempora PLAUSUS!

                        Verum jamdudum coecis est saucia curis

                        Pallas! et ingentem premit alto corde dolorem!

                        Est PAULINA Domus curis ingentibus aegra,

                        Coeruleis moesta est vittis atraque cupresso!

            25        Sed tu, CHRISTE, potens Populos reparare sepulchris,

                        Et reduces redivivae Animas infundere carni,

                        Tunc OPUS ULSBECKI, IN JHESU per jubila PLAUSUS;

                        Trisagionque DEO plaudenti concinere ore!

Inter. lac. p.

Laurentius Ludenius, Ph. et J. U. D.

Poët. Cor. Professor Juris, Oratoriae

et Poëseos.

 

47. Adr: Josephus Paulinus Ulsbeckius - Aut: Joachimus Crellius (cf. 46)

UUB (def), [Tartu UB (def)]

EPICEDIUM

                        Soevit iners Bacchus; turbae furor arma ministrat:

                                    Dum Paullinus ad haec prospicit, ense cadit.

                        Qui pius ense cadit; (quod Fata tulere ferendum),

                                    Improbus impunis coedis at author abit.

            5          Ast abeas, lateas: Te vindicis irae sequetur

                                    Jovae, Paullinum qui super astra beat!

M. Joach. Crellius,

P. P.

 

48. Adr: Josephus Paulinus Ulsbeckius - Aut: Petrus Caroli Undenius (cf. 46)

UUB (def), [Tartu UB (def)]

EPICEDIUM

Defunctus.

 

                        E cineris massa, falsaeque antyllidos herba,

                                    Formari flammis splendida vitra solent:

                        Sic cinis ater eram, cineres nunc solvor in atros,

                                    Sed nitidum extremo corpus habebo die.

                        Condolentiae ergo paucula haecce app.

M. Petrus Caroli Undenius,

W. Gothus, SS. Theol. Stud.

 

49. Adr: Josephus Paulinus Ulsbeckius - Aut: Gamaliel Bergius (cf. 46)

UUB (def), [Tartu UB (def)]

EPICEDIUM

                        Omnigenos mortis quisnam vitaverit ictus?

                        Hos rapiunt Tigres! hos et maris aequora poscunt!

                        His vitamque adimit gladio crudelior hostis.

                        Exemplum nobis ita praebet triste, Iosephus!

            5          Qui potuit vitam multas extendere in annos,

                        Aonij in campo dum miles strenuus ivit:

                        Virtutem coluit, studiis nec frena remisit.

                        Ast nunc vulneribus prostratum cernimus illum!

                        Hic jacet ad tumulum miserandum et flebile corpus!

            10        Verum Anima in coelis CHRISTO sociata triumphat,

                        Atque Deo nostro dulcissima Iubila psallit.

Moestissimus scripsit

Gamaliel Bergius,

Pastor Laisensium.

 

50. Adr: Petrus Johannis Wichovius – Aut: Ericus Holstenius (In octo libros Physic. Aristot. perˆ tÁj fusikÁj ¢kro£sewj, sive de naturali auscultatione disputatio trigesima, continens nobiliores notas et quaestiones cap. 6. 7. 9 lib. 4. a text. 50. usque ad text. 87. Quam in Regia Academia Dorpatensi /.../ proponit et publicae disputationi subjicit Johannes Erici Stregnensis, /.../ respondente Petro Johan. Wichocio, /.../ die < > Octob. 1648. /.../. Dorpati Livonorum, 1648: J. Vogelius)  UUB, H, [Tartu UB]

GRATULATIO

Literatissimo et Humaniss. Dn. Respondenti

De Vacuo docte disputanti;

 

                        Multa super Vacuum Veteres scriptis cumularunt;

                                    Et tamen hoc Vacuum semper inane manet.

                        Sed Vacuum non tale dari cum, PETRE, subinfers,

                                    Ingenium Vacuum non finis esse tuum.

            5          Sic Vacuum scriptis doctorum perge replere:

                                    Et nequeat nomen laude Vacare tuum.

Ita L.Mque appl.

M. Ericus Holstenius.



[1] S : anagramma duplex non recte constructum.

[2] Ars pro ARS edd

[3] Editio sine anagrammate in: Matti Sainio ‘Andreas Arvidi als Student in Tartu.’ – In: Acta Universitatis Stockholmiensis. Studia Baltica Stockholmiensia 11 1993. Die schwedische Ostseeprovinzen Estland und Livland im 16.-18. Jahrhundert. Stockholm, 1993, p. 279.

[4] Anagramma non recte constructum

[5] Cf. 1636.14; 164.21; 1644.4; 1645.13; 1646.4; 1647.17; 1648.13; 1649.16 et 1641.11; 1642.19-20.

[6] Idem 1636.14; 1643.21; 1644.4; 1645.13; 1646.4; 1647.17; 1649.16; cum variatione 1648.12; cf. 1641.11; 1642.19-20.

[7] vinclis pro vinculis edd metri causa

[8] Idem 1636.25, 1643.46-47, 1644.15, 1645.47, 1646.19, 1647.37, 1649.22.

[9] Dorptum pro Dorpatum edd metri causa

[10] vincla pro vincula edd metri causa

[11] vinclo pro vinculo edd metri causa

[12] seclis pro seculis edd metri causa

[13] pericla pro pericula edd metri causa

[14] Eteostichon annum 1648 exhibens