1650

 

 

1. Adr: Olaus Nicolai Bergius – Aut: Haquinus T. Bergovius (Disputatio inauguralis: de magistratu politico: quam /.../ sub praesidio /.../ Joachimi Crellii, /.../ pro gradu et privilegiis magisterij consequendis, publico /.../ examini submittit ad diem < > Julij, /.../ Olaus Nicolai Bergius, /…/ Dorpati Livonorum, 1650: J. Vogelius)

UUB, [Tartu UB]

GRATULATIO

Morum Elegantia et Doctrina Ornatissimo Viro

Juveni, pro Summo Magisterij gradu erudite disputanti.

 

                        Clarus ut exstiterat at quondam per fortia facta

                        Alcides superans (mirum) crudelia monstra,

                        Et rapuit spolium saevo tumidoque Leoni.

                        Haud aliter magnos tu nunc Doctissime BERGI,

            5          Egregiosque animi didicisti ferre labores,

                        quos monstras, 'ArcÁj nodos dum solvis acutos,

                        scilicet ingenij Vigor est contentio tanta,

                        Mox Victor stadij pulchra cluis arte Magister.

Ut moris ita honoris ergo haec appo-

nere voluit

Haquinus T. Bergovius,

Med. Stud.

 

2. Adr: Olaus Nicolai Bergius – Aut: Andreas O. Yxtorphius (cf. 1)

UUB, [Tartu UB]

GRATULATIO

                        Hos Embecciades Musae tribuere triumphos,

                                    Sic doctos animos concomitatur Honor.

                        Gratulor ergo tibi: Smalandia gaudet honore,

                                    gaudet honore tuo, Patria terra novo.

            5          Cum tua sint Laudi, mi Candide Frater Olave,

                                    Nomina sacrata hinc gratulor ipse tibi.

                        Laudem nam praestat Solers Prudentia rerum,

                                    Et fluit ingenij Candida vena tui.

                        Inde Magisterij serto te dexter Apollo

            10                    Exornat: BERGI, Laetus honore vale!

Benevolentiae contestandae, nec non fraterni amoris

et sincerae amicitiae Ergo Libens lubensque

applaudit

Andreas O. Yxtorphius.

Smalandia Svecus.

 

3. Adr: Petrus Brahe – Aut: Johannes Schaeperus (Finnoniae elogia: quae, /.../ in Regia Gustaviana Adolphina Academia, quae Dorpati /.../ est /.../ oratione solenni, die 19. Octobris anno 1650. publice memoriterque  /.../ enarrabat Johannes Schaeperus, /.../. Dorpati Livonorum, 1650: J. Vogel)(cf. 26-27)

SKB, UUB, Kobenhavn KB, [Tartu UB]

DEDICATIO

SS. Reg. Maj. tis

Regnorumque Sveciae ac Gothiae Senatori Inclyto,

Jllustrissimo et Magnificentissimo Heroi

ac Domino,

DN. PETRO Brahe/

Comiti de WisingsBorg/ L. Baroni de Rydbo-

holm et Lindholm/ Regni Sveciae Archidapifero, Collegij Regij

Judicialis per Regnum Svecorum summo Praesidi, et Judici Provinciali

Westrogothiae: Magni Ducatus Finlandiae, Alandiae et Careliae

Gubernatori Generalissimo; ut et Westmanniae et Da-

lecarliae Judici supremo,

Domino suo Gratiosissimo,

Vitam, incolumitatem et Felicitatem perpetuam;

 

                        Reginae Augustae, Sancti Regnique Senator;

                                    Celse Comes; Themidos Gloria celsa Deae:

                        Sancte Gubernator qua se Finnonia mittit,

                                    Pacis juge Decus, militiaeque Decus;

            5          Pectore dum grato benefacta verenda revolvo;

                                    Maxima, Celse Heros, sunt benefacta tua.

                        Ipse mei semper Patris benefactor haberis,

                                    Auxiliatrici me relevasque manu.

                        Si mihi suppeterent auri numerosa talenta,

            10                    Non possem meritis digna referre tuis.

                        Fecero, quod possum; cum sit mihi curta supellex,

                                    Historiam Patriae doque dicoque meae.

                        Accipiat placidis animis, Clementia vestra:

                                    Et vivat Musae sancta medela meae.

Ita devote precatus,

In humilimam speratae spem promotionis

Devote et reverenter

Dat, D. D.

JOHANNES SCHAEPERUS,

Abogia Finlandus, LL. Stud.

 

4. Adr: Christina – Aut: Laurentius Ludenius (Augustissima coronationis solennitas; qua /.../ Christina, /.../ Svecorum, Gothorum, Vandalorumque juxta /.../ regina, /.../ Ubsaliae, anno 1650.  /.../ coronabatur; oratione solenni; juxta /.../ Svetici Gothicique in patria regis et gubernatoris elogia /.../ ipso coronationis die, Dorpati publice /.../ introducebatur; et /.../ posteritati /.../ proponebatur a Laurentio Ludenio, /.../. <Dorpati>, 1650: J. Vogelius)                    SKB, UUB, Kobenhavn KB, [Tartu UB]

ENCOMION

Serenissimae et Potentissimae Principi

ac Dominae,

DN. CHRISTINAE,

Dei Gratia, Svecorum, Gothorum, Vandalorumque

Reginae, et Principi Haereditariae; Magnae Principi

Finlandiae; Duci Esthoniae, Careliae, Bremae, Ver-

dae, et Pomeraniae; Principi Rugiae; Dominae

Wismariae et Ingriae, etc.

Piae, Felici, Victrici, Augustae, Inclytae, etc.

Dominae et Reginae suae Clementissimae;

Vitam, Incolumitatem, et Felicitatem perpetuam.

 

                        Qui Regna et Populos; Vrbes Pacemque Togatam

                        Ipse regit; Magnique Orbis moderatur habenas;

                        Reginae, Regnoque diem det Honore Serenum.

                        Heroina, Decus Patriae CHRISTINA, Serena

            5          Divi Progenies GUSTAVI Regis ADOLPHI,

                        Arctoo Regina Throno Solioque verenda:

                        Sceptrorum Vis sancta micat! te Patrius Orbis

                        Reginam Sanctam demissa voce salutat!

                        Ardua sic meruit Virtus, quaeque omine fausto

            10        Gloria Nominibus te concomitatur Avitis!

                        Flos vernans, Veterum et Virtus Nitidissima Regum;

                        Heroum Sangvis; Fasces Regniusque verendos

                        Majestatis Apex Morum submittit Honori.

                        Ingenium, et Rerum fato Prudentia major;

            15        Coelica mortales armat Sapientia mentes.

                        Reginae mandatur opes, orbisque tributa

                        Possessi, et quicquid venas rimata sequaceis

                        Abdita pallentis fodit solertia Bessi.

                        Augustae sors ampla Domus: Heroica Virtus

            20        Te sibi supposuit, Laudumque arrexit amore

                        Pectus, et Imperio dignas formavit ad Artes,

                        Vt felix Haeres, MAGNI Vestigia PATRIS

                        Magna mente premas; et Avorum Summa reponas

                        Lumina, quae totum factis ingentibus Orbem

            25        Condecorant, memoresque replent in secula fastos.

                        Dulce est, Reginae sanctis adsvescere jussis;

                        Ceu quondam Populos vis Augustaea volentes

                        Virtutum Imperio victrix sine coede regebat.

                        Illustris magni Custos Clementia Mundi,

            30        Quae Jovis incoluit Zonam; per tempora rerum

                        Frigoris et flammae mediam quae temperat aethram,

                        Est vivis annexus amor; meminisse sepultos

                        Incipit in Sobolem; splendescit Gratia Patrum!

                        Vive Decus Regni; Reducis Tutela Quietis,

            35        Ad cujus numeros Superi vertuntur et Imi:

                        Sit Fidei Sanctum Foedus Pacisque tributum!

Ipso Augustissimae Coronationis Die

Humilimo animo et calamo

humilime apprecabatur

Laurentius Ludenius, Ph. et U.J.D.

 

5. Adr: Johannes And. Dryander – Aut: Joachimus Crellius (Dissertationis de natura historicae et de modo recte tractandi studium historicum. Disputatio posterior exhibens requisita reliqua cognitionis et applicationis, ut 2. Modum redigendi historias ad ordinatum systema. 3. Monita politica eruenda. 4. Usum et applicationem ad casus quotidie emergentes. Quam /.../ in Regia Academia Gustaviana publicae /.../ censurae submittent /.../ Joachimus Crellius, /.../ et Johannes And. Dryander, /.../ die <8. Februarij> Augusti /.../. Dorpati Livonorum, 1650: J. Vogelius)  H, [Tartu UB]

GRATULATIO

Juveni Philohistori,

Eruditionis et Modestiae laude

conspicuo.

 

                        Sacrorum vates, Sapientes, Histores olim

                                    in Celtis Druides praeminuere viri.

                        Vates in Dryadum Lucis sacra querna parabant,

                                    Thau, Heso-Beleno-tum Thamarique, DEO.

            5          Thau in fronte suum, Thamarinque in stirpe locabant,

                                    A laeva et dextra Belus et Hesus erant.

                        Inde Magi tacite Naturae arcana librabant,

                                    Pergebantque suum cuncta docere gregem.

                        Histores intextos cantabant quercubus hymnos,

            10                    Heroumque simul fortia facta virum.

                        Ecce tibi hic Druidum, credo, sacer ordo vel ortum

                                    E Scythis, vel cognomen, Amice, dedit.

                        Ergo imitare tuis feliciter aemulus ausis,

                                    Gentis et Historiam prome, reconde tuae.

            15        Quod tibi surget opus, Patriaeque Deoque placebit,

                                    Gloria nec Druidum parva Dryander eris.

Ita cum voto applaudit

Praeses.

 

6. Adr: Johannes And. Dryander – Aut: Johannes Creilingius (cf. 5)

H, [Tartu UB]

GRATULATIO

                        Qui cupit Historiam bene nosse, et rectius uti,

                                    Servet et observet quatuor ista probe.

                        Autores volvat, Systema recolligat artis

                                    ac Monita inde petat, quae simul Acta regant.

            5          Hoc facis, Historiam quin noveris ergo Dryander,

                                    Nil dubito, coeptum provehat usus opus!

Quod vovet amico suo singulari

Johannes Kreilingius,

Gvestphalus.

 

7. Adr: Daniel Gruuf Nycopensis – Aut: Elaus N. Tollenius (Disputatio theologica anniversaria in Psalmum secundum Davidis selectissimas notas exhibens, publicae censurae subjicietur in Regia Academia Dorpatensi, praeside Andrea Virginio, /.../ respondente Daniele Gruuf Nycopensi, /.../ d. < > Febr. /.../. Dorpati Livonorum, 1650:Acad. typ.)                                           Rostock UB, H, LAB, [Tartu UB]

GRATULATIO

Praestantissimo ac Literatissimo

DN. DANIELI DANIELIS GRUUF/

de praesenti materia erudite

disputanti.

 

                        Res magna est, fateor, Doctorum scripta Virorum

                                    Felici studio perdidicisse bene:

                        Nam verum certe est: Meminisse fideliter artes

                                    Emollit mores, nec sinit esse feros.

            5          Ast inter reliquas, si certent, prima videtur,

                                    Quae narrat summi jussa verenda Dei:

                        Illa facit justos Christi virtute ministros:

Illa docet populum, qua datur ire via.

                        Hanc, DANIEL, dum prae reliquis sectaris avare,

            10                    Ingenium digna percolis arte tuum,

                        Perge, velut pergis, sacras persolvere chartas,

                                    Et Dominus studij praemia larga dabit.

Haec paucula amico affectu reliquit

Elaus N. Tollenius,

Comminister ad Aedem

B. Mariae.

 

8. Adr: Daniel Gruuf Nycopensis – Aut: Andreas A. Malmenius (cf. 7)

Rostock UB, H, LAB, [Tartu UB]

GRATULATIO

O felix Studium, Sacra Biblia discere velle!

                                    Mortali vera est inde petenda Salus.

                        Nam Christum novisse sat est, nil caetera prosunt,

                                    Cum Dominus populo dicere jus veniet.

            5          Coetera mundus amat; cum mundo et sunt peritura,

                                    Cognitio Christi sed sine fine viget.

                        Haec animo bene perpendis, Daniel Patriota,

                                    Fervidus hinc tractas Dogmata larga Dei.

                        Macte pio studio sacrati codicis! Ecce

            10                    Nulla tuum poterit fama tacere decus.

Dn. Sympatriotae Amico svaviss.

haecce gratulab. appos.

Andreas A. Malmenius,

Sudermannia-Svecus.

 

9. Adr: Daniel Gruuf Nycopensis – Aut: Georgius Wittingius (cf. 7)

Rostock UB, H, LAB, [Tartu UB]

GRATULATIO

DANIEL DANIELIS GRUUF,

Per Anagr.

IN ILLA SURGE FIDE! UNDA!

 

                        Sancta Fides, Thesibus quam tu proponis: IN ILLA

                                    SVRGE FIDE Felix VNDA salutis erit.

Lineas hasce in honorem perdilecti

Amici amica crena duxit

Georgius Wittingius,

Goldinga-Curlandus.

 

10. Adr: Daniel Gruuf Nycopensis – Aut: Sebastianus Wirdig (In salutiferam nativitatem Domini et Salvatoris nostri Jesu Christi, oratio metrica: quam /.../ in Regia Academia Gustaviana Adolphina, quae Dorpati est /.../ die 22. Decembris anno, /.../ <Chronogr.: 1649> publice et memoriter /.../ enarrabat, Daniel Gruuf Nycopensis, /.../. Dorpati Livonorum, 1650: J. Vogelius)                        SKB, UUB, H, [Tartu UB]

GRATULATIO

Literatissimo Dn. Peroranti.

 

                        Volve, revolve, pio cunabula carmine, Christi,

                                    Volve ea, volve pio corde, revolve, tuo.

                        Non est, mi DANIEL, potior, non pulcrior orbe

                                    Cognitio, CHRISTI cognitione Tui.

Sebastianus Wirdig/

Med. D. et Prof. P.

 

11. Adr: Daniel Gruuf Nycopensis – Aut: Andreas Windberg (cf. 10)

SKB, UUB, H, [Tartu UB]

GRATULATIO

                        Quisquis amat JESVM, JESVM quoque laudibus effert;

                                    JESV nil ipso dulcius esse potest!

                        Sit JESVS tecum: Placidi scrutetur amorem

                                    Cordis; te sancto Flamine rite regat.

            5          Coepisti ut dextre, sic pergas, Candide Frater;

                                    Dilige tu JESVM, sis pietatis amans;

                        Sic hinc aeternae quaeres praeconia famae,

                                    Inque solo poteris noscere regna poli.

In syncerae amicitiae tesseram vili Stylo

ac filo contexuit

Andreas Windbergius,

Telga-Sudermannus.

 

12. Adr: Daniel Gruuf Nycopensis – Aut: Johannes Schaeper (cf. 10)

SKB, UUB, H, [Tartu UB]

GRATULATIO

                        Sancta est res Pietas; et sanctos reddit amantes

                                    JESUM, qui natus verus HOMO atque DEUS.

                        Et sursum semper se tollunt corda Piorum,

                                    Thesaurum ut sumant dexteriore Fide,

            5          Quem simulac capiunt, Mundi illis gloria sordet,

                                    Nec curant damnum, nec mala fata timent.

                        Sanctos hos sentis motus, mi candide Amice,

                                    Hinc Carmen laetum, dulce melosque canis.

                        Nam natum Christum, nobis tua Musa recenset;

            10                    Et recitat Populus jubila vera DEO.

                        Euge! Deus coeptis Coelo benedicat ab alto;

                                    In laudes vergant Numinis acta tua!

Syncerioris animi declarandi ergo, paucula

haec adjicere voluit

Johannes Schäper /

Abogia-Finlandus.

 

13. Adr: Johannes Megalinus – Aut: Joachimus Crellius (Dissertationis de natura historicae et de modo recte tractandi studium historicum disputatio prior exhibens 1. Naturam historicae. 2. Praesupposita geographica, chronologica, politica. 3. Requisitum l. scil. authores, qui et quomodo legendi sunt. Quam /.../ in Regia Academia Gustaviana publicae censurae submittent /.../ Joachimus Crellius, /.../ et Johannes Megalinus, /.../ die < > Augusti /.../. Dorpati Livonorum, 1650: J. Vogelius)

H, SKB, [Tartu UB]

GRATULATIO

Juveni Modesto,

Ab Eruditionis et Historiarum studio

commendabili.

 

                        Est Magnus Coeli Terraeque haec machina Mundus,

                                    Est parvus quasi sub schemate mundus homo.

                        Sed Magnus parvum capit, ut capit omnia, Mundus,

                                    Namque suo abscondit cuncta fovetque sinu.

            5          Et parvus Magnum capit, en mirabile! mundum,

                                    Cum loca, personas, tempora resque notat.

                        Sic Magnus parvum capit orbis, et hic capit illum,

                                    Qui capit hic capitur, qui capiturque capit.

                        Idque per Historiam, quo gratior illa futura est,

            10                    Dum Mundum docta subjicit arte tibi.

                        Ut capias Magnum parva sub imagine Mundum,

                                    Historiam parvus percipe, Magnus eris.

                        Huc Megaline, tui quo nominis omen adaeques,

                                    Summus in Historias te pius ardor agit.

            15        Et labor hic Laudem, promittit Musa coronam,

                                    Patria mercedem suggeret, aether opem!

Ita cum voto applaudit

Praeses.

 

14. Adr: Johannes Megalinus – Aut: Johannes Kreilingius (cf. 13)

H, SKB, [Tartu UB]

GRATULATIO

                        Dum Varios casus, rerumque Exempla ministrat

                                    Historice, Ingenium, judiciumque polit.

                        Historicum quisquis lustraverit ergo Theatrum,

                                    ille sibi, et studiis consulet ille suis.

            5          Hoc MEGALINE, facis dum nocte dieque volutas

                                    libros, sic pergas, et MEGALINUS eris.

Honoris et amoris ergo amico suo

haud vulgari adposuit

Johannes Kreilingius,

Gvestphalus.

 

15. Adr: Caspar Henricus Pegau - Aut: Laurentius Ludenius (Carmina lugubria in /.../ obitum, /.../ Caspari Henrici Pegau, /.../ Caspari Pegau regij per Livoniam et Ingriam supremi parlamenti assessoris, /.../ filioli /.../ anno 1650. die 24. Augusti nati, 16. vero Septembris /.../ denati, et 19. ejusdem in templo Johannaeo Dorpatensi /.../ humati; scripta ab amicis et condolentibus. Dorpati Livonorum, 1650: J. Vogel)

UUB, [Tartu UB]

EPICEDIUM

                        PEGAVIO Puer ille satus de Sangvine, CASPAR -

                                    HEINRICUS; teneri Floris adinstar erat!

                        Ut natus, sacro mox Infans amne renatus;

                                    Floreque sese Flos induit ille novo.

 

CASPAR HEINRICH PEGAVV:

Per Anag.

PUER, HINC AGE PIA; CHARUS.

 

            5          Soepe Pater, Materque; Aviaeque, Atavique locuti;

                                    Tu, PUER, HINC AGE, quae sunt PIA; CHARUS eris.

                        Dixere: At nimium brevis est hic Flosculus aevi;

                                    Natus, langvescit Flosculus, et moritur!

                        Eximius CASPAR PEGAVV Pater inde gemiscit,

            10                    CECILIAE Lemmens Matris ubique dolor!

                        Hinc Aviae! Christina dolet Paulina! doletque

                                    Margaris hic Mejers! Fletibus ora rigant!

                        Heinricus Lemmens Avus hinc Maternus, obortas

                                    In lacrymas senior cogitur ire pias!

            15        Sed Patrius Casparus Avus, super axe, Nepotem

                                    Sic postliminij jure videre cupit.

                        Sic Flos non brevis est, non fluxus Flosculus ille,

                                    Qui Paradisiacis consitus halat agris.

Cond. scribebat

Laurentius Ludenius, Ph. et U. J. D.

Prof. Pub.

 

16. Adr: Caspar Henricus Pegau - Aut: Erasmus Pegau (cf. 15)            UUB, [Tartu UB]

EPICEDIUM

Ad Dn. Fratrem obitum Filioli sui

Lugentem.

 

                        Quod Dominus dono dedit, illud sustulit Idem,

                                    Ipsi redde lubens, ipsius ante fuit.

                        Filius haud periit: Sacra servantur in urna

                                    Ejus, quo vireant, gramen ut, ossicula.

            5          Molliter haec busto dum custodita quiescunt,

                                    Infando fruitur Spiritus ipse bono.

                        Donec in adventu Christi cum corpore junctus

                                    Spiritus hic Idem laeta trophaea ferat.

Sump£scwn œgr.

Erasmus Pegau, Pastor

et Proto-Synedrij Livonici

Adsessor.

 

17. Adr: Caspar Henricus Pegau - Aut: Ericus Holstenius  (cf. 15)        UUB, [Tartu UB]

EPICEDIUM

 

                        Mors nescit legem; rapit hic cum paupere Regem;

                                    Illa necat juvenes, mactat et illa Senes!

                        Nec parcit tenero materni lactis Alumno,

                                    Qui nocua nullum traxit ad arma manu.

            5          Exemplum fati nobis CASPARUS abunde

                                    HENRICVS praebet, blanda propago Patris.

                        Blandula planta piae Genitricis, spicula Mortis

                                    Praematura videt; praedaque facta necis.

                        Mortis ad antra ruit, sub primo flore perempta;

            20                    Quae multos Soles vivere digna fuit.

                        Sic res sunt hominum! Nil firmum, nil stabile estque!

                                    O homo dum vivis sit memor ergo tui.

To‹j goneàsi taàta sump£scwn

prostšqhke

M. Ericus Holstenius

 

18. Adr: Caspar Henricus Pegau - Aut: Petrus Horn (cf. 15)                 UUB, [Tartu UB]

EPICEDIUM

                        Sic in conjugio gravium discrimina rerum

                                    Dantur! Sunt fletu gaudia mixta gravi.

                        CASPAR adest HEINRICH; laetantur corda Parentum:

                                    Caspar abest HEINRICH; luget uterque Parens!

            5          Verum tempus erit, quando, Christo auspice, CASPAR

                                    HEINRICH, vivus erit; tunc nova gaudia erunt.

Condolentiae ergo apposuit

Petrus Horn /

Dabera Pom.

 

19. Adr: Caspar Henricus Pegau - Aut: Johannes Bröms (cf. 15)          UUB, [Tartu UB]

EPICEDIUM

                        Omnia sunt hominum tenui pendentia filo:

                                    Haec hominisque est sors, mors sua quemque manet.

                        Hinc merito foelix, est terque quaterque beatus,

                                    Cui datur hoc duro carcere abire probe.

Condolentiae E. adjecit

Johannes Bröms /

Jenecopia  Smoland.

LL. Stud.

 

20. Adr: Caspar Henricus Pegau - Aut: Daniel Gruuf Nycopensis (cf. 15)

UUB, [Tartu UB]

EPICEDIUM

Prosopoëia Defuncti.

 

                        Ut rosa, dum vitreis Phoebus se tollit ab undis,

                        Undique purpureis crescit amicta comis;

                        Verum ubi devexo cum Sol declinat Olympo,

                                    Purpureum flectit falce resecta caput:

            5          Sic ego qui coepi primum florescere, Mortis

                                    Crudeli nimium, falce, resectus eram.

                        Sat cito, quod bene sat; mutavi in gaudia curas;

                                    Corpus humo tegitur, Mens tenet astra Poli.

                        Traxi, CHRISTE, meae curtissima stamina vitae;

            10                    Ut vidi variis cuncta repleta malis;

                        Obstupui, retroque tuli vestigia prima,

                                    Restituens CHRISTO, quae data dona, meo.

                        Hinc nolite, mei, mea fata dolere, Parentes:

                                    Non lacrymas poscit mortis imago meae.

            15        Mittite moerorem; parvo qui Tempore vixi

                                    Pauca etiam vidi, Paucaque sustinui.

                        Discite quam nostrae fallax sit portio vitae,

                                    Nam, qui mane viret, vespere langvet homo.

 

Distichon, Annum obitus literis numeralibus

apponens.

 

                        CASPAR ego HInrICVs PEGAV reqVIesCo sVb Vrna haC,

            20                    RIte qVoaD ChrIstI IVDICIs hora VenIt.[1]

Hisce Dn. Parentes, Filij, ut optimae spei, sic dilectissimi

Abitum inopinum acerbe deflentes solari

voluit

Daniel Gruuf Nycopensis,

Sudermannia-Svecus.

 

21. Adr: Caspar Henricus Pegau - Aut: Johannes Schäpperus (cf. 15)

UUB, [Tartu UB]

EPICEDIUM

                        Anxia cur tristi fundis suspiria corde

                        Adsessor celebris, cur spargis lumina rore?

                        Occidit ante dies, CASPAR scitissimus infans

                        Delicium occubuit Patris, Matrisque voluptas.

            5          Hancce facit subito immaturam Morta rapinam,

                        Ante dies rumpens sperata stamina vitae.

                        Sed praemissus adest in coelo, perditus haut est;

                        Non rursum huc veniet, sed nos veniemus ad illum

                        Inter coelicolas; ubi clarae stellulae adinstar

            10        Fulget et aeterno JOVAE grata jubila psallit.

                        Siste igitur lacrymas, Genitor, Genitrixque querelas:

                        Nil prosunt lacrymae, nil luctus, nilque dolores.

 

Anno

 

                        FILIVs In CoeLo pIVs en sIne fIne trIVMphat,

                                    EXCeLso IoVae nVnC sospes IVbILa psaLLens.[2]

Sump£scwn œgrayen

Johannes Schäpperus,

Abogia-Finlandus

 

22. Adr: Caspar Henricus Pegau - Aut: Casparus Pegius (cf. 15)          UUB, [Tartu UB]

EPICEDIUM

                        Tendimus ad metam, metam properamus ad unam,

                                    Quotquot sub leges mors vocat atra suas;

                        Illa rapit Juvenesque senesque senilibus annis.

                                    Vah! ferit Infantes ictibus illa suis!

            5          Idque docet praesens vere scitissimus Infans,

                                    Qui propere in Patrios funere venit agros.

                        Aeternum Superis ibi adest; Pia jubila dicit;

                                    Concinit Excelso cantica grata DEO.

Haec perpauca Consangvineo suo

desideratissimo lugens

fudit

Casparus Pegius.

 

23. Adr: Matthias Rives – Aut: Laurentius Ludenius (Politices elogia; quae /.../ in Regia Gustaviana Adolphina Academia, quae Dorpati /.../ est /.../ oratione solenni die 9. Octobris, anno 1650. /.../ publice memoriterque  /.../ enarrabat Matthias Rives, /.../. Dorpati Livonorum, 1650: J. Vogelius)                                      UUB, [Tartu UB]

GRATULATIO

Nobiliss. et Praestantiss. Dn. Peroranti.

MATTHIAS RIVES:

Per Anag.

HIS VITAM TERAS!

 

                        Nobilis invigiles Rebus communibus; aequam

                                    HISque TERAS VITAM: Nobile Delicium est!

Quod animitus p.

Laurentius Ludenius, Ph. et J.U.D.

Prof. Ord.

 

24. Adr: Matthias Rives – Aut: Georgius Wittingius (cf. 23)                   UUB, [Tartu UB]

GRATULATIO

                        Est laus e claris duxisse Parentibus ortum,

                                    Hos etenim faustos maxima turba vocat;

                        Sed Genus et Virtus quem splendida Nobilitare

                                    Pergunt, majori laude vehendus erit.

            5          Inclyta nam virtus cultorem semper in altum

                                    Evehit, et illum debito honore beat.

                        Hoc cum, MATTHIA RIVES, mediteris; amore

                                    Dignus es, et multa laude vehendus ovas.

                        Eloqueris nobis, facies quae publica rerum,

            10                    Quoque regenda modo clara corona virum.

                        Pergas Eunomiae florentia visere Tempe,

                                    Te virtus stimulis urget anhela suis.

                        Gratulor ipse tuis coeptis nunc pectore toto,

                                    MATTHIA RIVES; Et pia fata precor.

            15                    Hos tuos ausus, Deus in Sione

                                    Prosperet clemens Moderator orbis,

                                    Ut legat fructus viridis cupitos

                                                Patria tellus.

Paucula haec honoris et amoris ergo amantissimo

suo adposuit

Georgius Wittingius,

Goldinga-Curlandus,

SS. Th. Stud.

 

25. Adr: Matthias Rives – Aut: Daniel Gruuf Nycopensis (cf. 23)           UUB, [Tartu UB]

GRATULATIO

                        Impiger extremos curens Mercator ad Indos

                                    Laudatur, variis evehiturque modis,

                        Lintea quod rapidis exponit Carbasa ventis

                                    Objectat vitam Fluctibus atque maris,

            5          Ut duplici pulchras sibi quaerat foenore merces,

                                    (Quas numerosa cohors nocte dieque petit)

                        Rite quibus degat felici in sorte beatus,

                                    Vivificus donec rexerit ossa calor:

Strenuus ast pulchrae Virtutis et Artis Alumnus

            10                    Majori merito laude vehendus erit;

                        Castalias ad aquas Parnassi Montis, amore

                                    Qui dat nubiferis lintea plena Notis,

                        Ut sibi divitias animi non interituras

                                    Congerat, ingenio praemia pulchra suo.

            15        Divitiae ad solam hanc spectant tantummodo vitam,

                                    Atque vel ipsa expers turba saluti habet;

                        Praeter spem fugiunt; celeres ceu fumus in auras,

                                    Et nihil ex illis utilitatis habes?

Contra qui Clariae sequitur vexilla Minervae,

            20                    Et lepidae Musae fidus Amator adest,

                        Quamvis Sisyphios cogatur ferre labores,

                                    (Ut canit effatum; Non sine sente rosa)

                        Attamen egregios felici foenore merces

                                    Consequitur; felix concomitatur honor.

            25        Ergo tuum ingenium laudo, Doctissime RIVES,

                                    Qui Genus e prisca Nobilitate trahis;

                        Quod pulchris studiis pergas ad culmina Pindi

                                    Bellerophontei qua fluit humor equi.

                        Namque tibi laudum hinc consurgent immoritura

            30                    Pondera, quae Genij dona perire negant.

                        Ille opifex rerum, DEVS uno in Numine Trinus,

                                    Qui regit aetherei Sydera fixa Poli,

                        HIsCe tVIs CoeptIs CLarIIs beneDICat ab aXe, Vt

                                    IpsIVs In LaVDes perfICIantVr. aVe.[3]

Sic

Nobilissimo et Literatissimo Dn. Peroranti,

de prospero et felici in studiis successu,

amico animo gratulabatur,

Daniel Gruuf Nycopensis,

Svecus, SS. Theol. Studiosus.

 

26. Adr: Johannes Schaeperus – Aut: Daniel Gruuf Nycopensis (Finnoniae elogia: quae, /.../ in Regia Gustaviana Adolphina Academia, quae Dorpati /.../ est /.../ oratione solenni, die 9. Octobris anno 1650. publice memoriterque /.../ enarrabat Johannes Schaeperus, /.../. Dorpati Livonorum, 1650: J. Vogel) (cf. 3)

SKB, UUB, Kobenhavn KB, [Tartu UB]

GRATULATIO

In Honorem

Doctissimi et Humanissimi Dn. Perorantis.

JOHANNES SCHAEPERUS, ABOENSIS FINLANDUS.

Per Anagr. mut. u in o.

FLOS PHOEBI SUDAS, HAEC RES SANE NON INANIS.

 

Enodatio.

 

                        JOHANNES, Charitum Cultor, FLOS aurea PHOEBI,

                                    Et Boreae Gentis pulcher Ocelle tuae:

                        Omnis in Aonio SVDAt qui gnaviter agro,

                                    Ingenuas Artes nocte dieque colens,

            5          Horrea divitiis magnis cumulabit onusta

                                    Et referet fructus transitione bonos.

                        Ast, velut Agricolae duros perferre labores

                                    Debent, si sperant auricomas segetes;

                        Nam spargunt pingvi terram fimo, renovantque,

            10                    Et cogunt tauros fortia ferre juga;

                        Nunc curvis rastris rimantur fortiter arva,

                                    In quae transmittunt grana minuta manu;

                        Eriguis pratis nunc foenum falce retondent,

                                    Atque labore gravi corpora lassa ferunt:

            15        Sic quoque qui gnavus Clariis luctatur in arvis,

                                    Et dulces pleno gutture sumit aquas;

                        Soepius in duris ponet sua corpora stratis,

                                    Murice quam subeat stamina tincta tori.

                        Cogitur assidue variis operum Labyrinthis,

            20                    Atque onerum duro subdere colla jugo;

                        Horrenda atque feret nunc frigora, nunc simul aestus,

                                    Cum fame soepe sitim, cumque labore metum.

                        Ast, quamvis primum radices sentiat aegras,

                                    Attamen eventu praemia larga feret.

            25        Eunomiae hinc Soboles nunc pergas, docte JOHANNES,

                                    Acriter Aoniis invigilare Choris.

                        Perfringens onus hoc, SVDA per secula: SANE

                                    HAEC RES In Domino NON tua INANIS erit.

                        Et tibi lativagis ubi surgit ABOGIA terris

            30                    Chara, revertenti praemia pulchra dabit.

                        Rex, precor, Aethereus; nunc HAEC tua coepta secundet,

                                    Ulteriusque tuos CHRISTVS adornes agros;

                        Ut tandem valeas studiorum texere telam,

                                    Et charae Patriae commoda ferre tuae.

            35        SaLVe! LaVs VaLeas! resonans passIM assonat ECho,

                                    HIsCe o CresCe, VIre, VIVe, VaLe atqVe VIge.[4]

 

Votum Parentis pro Filio Chariss.

 

                        VsqVe pIIs stVDIIs InsIstere perge, IOHANNES,

                        Vt nostrae PatrIae feLIX habearIs ALVMnVs.[5]

Taàta tÁj filadelf…aj›neka eÙmenšwj

prosšqhke

Daniel GruufNycopensis,

Sudermannia-Svecus.

 

27. Adr: Johannes Schaeperus – Aut: Johannes Jacobi (cf. 26)

SKB, UUB, Kobenhavn KB, [Tartu UB]

GRATULATIO

                        Otia nulla tuis studiis, concedis, Amice;

                        Jam das de Patria, foecundas ore loquelas;

                        Jam das in Studio, Sancti rata dogmata Juris,

                        Auxilio Sacro dum Flamen corda replevit.

            5          Usque precor, CHRISTUS tua coepta secundet amica,

                        Ut tandem pulcram possis contingere metam:

                        Sic tibi per Musas, bona Fama perennis in orbe;

                        Sic stat multa SALUS, vero de fonte SALUTIS.

Quod animitus p.

Johannes Jacobi,

Ingermannus.

 

28. Adr: Sveno Bernhardi Tokelius – Aut: Ericus Holstenius (Disputationum physicarum quinta de motu corporum naturalium in genere; quam /.../ in Regia Academia Gustaviana Adolphina, quae Dorpati /.../ est /.../ sub praesidio Johannis Erici Stregnenesis, /.../ publice ventilandam exhibet et proponit Sveno Bernhardi Tokelius, /.../ ad diem <28.9.> 1650. /.../. Dorpati Livonorum, 1650: J. Vogelius)

H, [Tartu UB]

GRATULATIO

Praestantissimo et Ornatissimo Juveni,

DN. SVENONI BERNHARDI TOKELIO,

Thesium harum authori et propugnatori

strenuo.

 

                        Impiger Aonidum Miles, Splendorque Sororum

                                    Doctarum SVENO: Gratulor ecce tibi.

                        Egregios mentis foetus quia spargis in Orbe;

                                    Cernitur hinc genij visque vigorque tui.

            5          Dum motum rerum scrutaris lumine docto;

                                    Hoc motu clares, ingeniumque moves.

                        Perge pio nisu, SVENO, sic plura movere,

                                    Mota aliquando tibi, pulchra brabea dabunt.

Ita

In felix auspicium appl.

M. ERICUS HOLSTENIUS,

Westmannus.

 

29. Adr: Matthias Nicolai Wåldt – Aut: Daniel Gruuf Nycopensis (Disputatio theologica in Psalmum tertium Davidis selectissimas notas exhibens publicae censurae subjicietur in Regia Academia Dorpatensi, praeside Andrea Virginio, /.../ respondente Matthia Nicolai Wåldt, /.../ d. <31.> Maji /.../. Dorpati Livonorum, 1650: J. Vogelius)                                                                               SKB, H, [Tartu UB]

GRATULATIO

Distichon Numerale.

 

                        ReX PIe, Gnate DeI, faC trVX BeLLona reCeDat;

                                    PaX VIgeat; CererIs CopIa Larga fLVat.[6]

Daniel Gruuf Nycopensis,

Sudermannia-Svecus.

 

30. Adr: Matthias Nicolai Wåldt – Aut: Johannes Petri Fallck (cf. 29)

SKB, H, [Tartu UB]

GRATULATIO

                        Qui Sacrum recolit Studiosa mente volumen,

                                    Et bene rimatur facta stupenda Dei;

                        Hic genio tandem superas volitabit ad auras.

                                    Et hic permagna laude vehendus erit:

            5          Hoc facis, o nisu dum tractas Enthea scripta,

                                    MATTHIA, nostri portio pulchra Chori.

Inde tibi tandem magni tribuentur honores,

            Et felix Summi Regna beata petes.

Doctiss. Dn. Respondentem, Sympatriotam et contubernalem

suum svavissimum, lubens ita honorat

Johannes Petri Fallck /

Westro-Gothus Svecus.

 

31. Adr: Georg Wittingius – Aut: Johannes Kreilingius (Disputatio theologica anniversaria in Psalmum primum Davidis selectissimas notas exhibens, publicae censurae subjicietur in Regia Academia Dorpatensi, praeside Andrea Virginio, /.../ respondente Georgio Wittingio, /.../ d. < > April. /.../. Dorpati Livonorum, 1650: J. Vogelius)                                                                                         H, [Tartu UB]

GRATULATIO

Praestantissimo ac Literatissimo

DN. GEORGIO WITTINGIO,

de praesenti materia erudite

disputanti.

 

                        Felicem Psalmista vocat qui verba Jehovae

                                    rimatur studio nocte dieque pio.

                        Hoc facis, ergo sacri divino Flaminis ore

                                    WITTINGI felix, terque beatus eris.

Quod ipsum Dn. Respondenti

Amico meo singulari

animitus voveo

Johannes Kreilingius.

 

32. Adr: Georg Wittingius – Aut: Petrus Horn (cf. 31)               H, [Tartu UB]

GRATULATIO

                        Usque timens Dominum, felix: Nam floret ut arbor,

                                    Atque suo fructum tempore ferre potest.

                        Non, veluti Paleae a vento jactantur inanes,

                                    Jactatur; firma perstat agitque fide.

Amice scrib.

Petrus Horn/

Dabera Pom.

 

33. Adr: Georg Wittingius– Aut: Zacharias Koch (cf. 31)                       H, [Tartu UB]

GRATULATIO

                        Felix es tanto conamine, Docte GEORGI,

                                    Quando doces Legem pertimuisse Dei.

                        Hinc velut arbor eris, quae consita margine ripae est,

                                    Quaeque affert fructum transitione suum.

Ita animitus precabatur

Zacharias Koch / Pritzwal-

densis Marchiacus.

 

34. Adr: Georg Wittingius – Aut: Hilarius Hoppe (cf. 31)                       H, [Tartu UB]

GRATULATIO

Ad Praestantissimum Dn. Respondentem.

 

                        Perplacuere tibi dulces ante omnia Musae:

                                    Et modo Jessaei Regia Musa Senis:

                        Hanc tibi desponsas, nisu magnoque tueri

                                    Conaris, veluti celsa cathedra docet.

            5          Protinus unanimes plaudunt Heliconis Alumnae,

                                    Has et Davidis Musa canora juvat.

                        Gratulor ipse tibi, ceu fas WITTINGIA Proles

                                    Pergito, sic tandem digna brabea feres.

                        Pensabit studium, quos suscipis atque labores

            10                    Jessaei Regis Musa, adamata tibi.

Hilarius Hoppe /

Stolpa-Pomeranus.

 

35. Adr: Georg Wittingius – Aut: Daniel Gruuf Nycopensis (cf. 31)       

H, [Tartu UB]

GRATULATIO

                        AnqrwpÒn fhsin m£karon tÕ pneàma Qeo‹o,

                   Spoud£zonta nÒmouj perˆ toÝj ¡g…ouj kur…oio:

                   'Anq' ên OUITTIGG fil' ¥delfš se nàn makar…zw,

                   Toàto Óti pr£pteij, p£nu tù Cristù sÝ¢ršskeij:

5        Tîn spoudîn taÝtwn qeîj eÙfhmhs£tw aÙtÕj,

          Sunte…nVs' a¨tou prÕj dÒxan pr£gmata p£nta.

            Perge VeLVt pergIs, VVIttIng o arte poLIte,

                        AspIret stVDIIs NVMInIs aVra tVIs.[7]

TÁj fil…aj¢nupokr…tou ›neka Kur.

Apokrinom»nJ sugca…rwn

œgraye

Daniel Gruuf Nycopensis,

Sudermannia-Svecus.

 



[1] Distichon annum 1650 exhibens

[2] Distichon annum 1650 exhibens

[3] Chronodistichon non recte constructum, annum 1651 exhibens

[4] Distichon annum 1650 exhibens

[5] Distichon annum 1650 exhibens

[6] Chronodistichon annum 1650 exhibens

[7] Chronodistichon annum 1650 exhibens